REIREI 2

Te Taetae ae Kaanga Bon te Maroro

2 I-Korinto 2:17

KABWARABWARAANA: Taetae n aron ae ko boni maroro ao e nako mai nanom, n te aro ae e na oti am namakin ibukin am reirei ao ibukia taan ongora.

Katauraoi raoi ao irianna n te tataro. Tataroa buokam bwa ko na aki tabe riki ma arom, ma ko na kaatuua am iango n te baere ko na taekinna. Kaatuua riki iangoan reirei aika kakawaki ake ko riai n taekin. Kabwarabwarai koaua aika kakawaki n oin am taeka ao tai tii wareki taeka ake ko korei.

Ngkana ko baireia bwa ko na wareware man te Baibara ke te boki teuana, kamamatea warekana bwa e aonga ni butiraoi am wareware. Ngkana iai aia taeka aomata aika mwaneweaki, kaota aia namakin n am wareware, ma tiaki n te aro ae e a manga rangi n riao.
Taetae mai nanom. Iangoia bwa e aera ngkai a riai n ongo te rongorongo anne taan ongora. Kaatuua am iango i aoia ao e na oti raoi tabeakinaia ao mwannanoaia n aron teim, kammwakurani baim, ao tein ubum.

Tai kaireruaa bwa te taetae n aron ae bon te maroro, titeboo ma te kakaraki ma raoraom. Karinea am rongorongo n arom n taetae n te aro ae mataata ao e ira raoi tuan te taetaenikawai.
Tarai mataia taan ongora. Teimatoa n tarai mataia taan ongora ngkana e aki kamatauninga anne. Ngkana ko kabwarabwara, taraa temanna ma temanna, n oneani mwin are ko a taraiia nako naba.