REIREI 10
Ko na Kangaa ni Buokaki n Aia Botaki n Taromauri Ana Tia Kakoaua Iehova?
Ko a tia ni kaoaki nakon aia botaki n taromauri Ana Tia Kakoaua Iehova? Ngkana ko tuai ni kaakaea, e na bae n nako nanom teutana ngkana ai tibwa am moantai ni kaea. Tao ko iango ni kangai: ‘Tera ae kakaraoaki ni botaki n taromauri aikai? E aera ngkai a kakawaki? E aera ngkai I riai ni kaea?’ N te reirei aei, ko na nora iai aron te kaai ni botaki ma tabemwaang ni buokiko ni kaania riki te Atua ao ni buokiko naba ni maium.
1. A aera Ana Tia Kakoaua Iehova ngkai a kaai ni bobotaki?
Nora aron te tia korea te Baibara ni kabwarabwaraa bukina ae moan te kakawaki ngkai ti kaai ni bobotaki: “N na karaoiroa Iehova i buakon te botaki n aomata ae rangi ni bati kaaina.” (Taian Areru 26:12) N aron anne, a karekea naba te kimwareirei ae rianako Ana Tia Kakoaua Iehova n aia bobotaki. Ni katobibia te aonnaba ao a bobotaki ni katoa wiki, ni karaoiroa te Atua, n anene, ao n tataro. Ni katoa ririki, ao iai naba taai ake a kaei iai aia botaki n taromauri aika bubura.
2. Tera ae ko na reiakinna n ara bobotaki?
Ti reiakina Ana Taeka te Atua n ara bobotaki, bwa e ‘kabwarabwaraaki raoi ao ni kaotaki ae nanonaki iai.’ (Wareka Neemia 8:8.) Ni kaean ara bobotaki, ko na reiakina iai taekan Iehova ao aroarona aika raraoi. Ngkana ko a nora riki aron tangiram irouna, ane ko na kaaniaki riki iai ma ngaia. Ko na nora naba arona ni kona ni buokiko ni karekea te raunnano ni maium.—Itaia 48:17, 18.
3. Ko na kangaa ni buokaki n arom n itamwaomwao ma tabemwaang n ara bobotaki?
E tuangira Iehova bwa ti na “iaiangoira i marenara bwa ti aonga ni kaungaira nakon te tangira ma mwakuri aika raraoi, ao ti na aki kaaki arora ni bobotaki.” (Ebera 10:24, 25) N ara bobotaki, ko na kaitiboo ma aomata aika tabeakinia raoi i marenaia n ai arom, aika te koraki aika kan reiakina riki taekan te Atua. Ko na ongora mairouia baika kaungaunga man te Baibara. (Wareka I-Rom 1:11, 12.) E na reke naba am tai ni maroro ma te koraki aika a aitara ma kangaanga ngkai a tiku n aki mare ao aika a a tia naba ni mare. Aikai bukina tabeua ngkai e tangirira Iehova bwa ti na katoatai ni bobotaki!
REIAKINA AE BATI RIKI
Nori baika kakaraoaki n aia bobotaki Ana Tia Kakoaua Iehova ao bukina ngkai e kakawaki kaeani bobotaki aikai.
4. Aia bobotaki Ana Tia Kakoaua Iehova
N te moan tienture, ao a katoatai Kristian ni botaki n taromauria Iehova. (I-Rom 16:3-5) Wareka I-Korote 3:16, ao maroroakina te titiraki aei:
Tera aroia Kristian rimoa n taromauria Iehova?
Ni boong aikai, a katoatai naba Ana Tia Kakoaua Iehova ni bobotaki n aia Tabo n Taromauri. Ibukini kan ataakin te bae kakaraoaki n aia botaki, kaota te TAAMNEI. Ao nora taamnein te botaki n taromauri n te ekaretia, ao maroroakin titiraki aikai.
Baikara baika riki n te Tabo n Taromauri aika titeboo ma baika ko wareki n I-Korote 3:16?
N aron ae oti n te taamnei aei, iai riki te bae ko noria ae anaaki nanom iai ibukin te botaki n taromauri?
Wareka 2 I-Korinto 9:7, ao maroroakina te titiraki aei:
E aera ngkai akea te rikomwane n aia botaki n taromauri Ana Tia Kakoaua Iehova?
Kaai n rinanon te reirei teuana ma am tia reirei, ae e na karaoaki n te botaki n te wiki aei.
Tera kanoan te botaki ae ko tangiria riki, ke ae e manena riki nakoim?
Ko ataia?
N jw.org, ko kona n nori iai taabo ao taai ibukini bobotaki n taromauri aika karaoaki ni katobibia te aonnaba.
A karaoaki naba n ara botaki n taromauri, kabwarabwara, kaotioti, ao taamnei. A moanaki ao ni motikaki ara botaki n te anene ao n te tataro
Ni kanoan ara botaki tabeua, ao a kaoaki kaain te botaki bwa a na anga aia kaeka
A butimwaeaki aomata ni kabane—mwaane, aine, kaara ao ataei
Akea te rikomwane n ara bobotaki. A aki anaa te kanrin Ana Tia Kakoaua Iehova ke te karemwangko
5. E kainnanoaki te kakorakora ibukini kaeani botaki aikai
Iangoa aia katoto ana utu Iesu. Ngkana a na kaea te botaki ae katoa ririki, a riai n rianna i nanon tao 60 te maire rinanoni kawai aika maungaunga mai Natareta nako Ierutarem. Wareka Ruka 2:39-42, ao maroroakin titiraki aikai:
N am iango, e kainnanoaki te kakorakora n te mwananga nako Ierutarem aei?
E aera ngkai ko riai ni kakorakorako ni kaei bobotaki?
N am iango, e materaoi karaoan anne? Bukin tera?
E taekinaki n te Baibara bwa e rangi ni kakawaki te kaai ni botaki n taromauri. Wareka Ebera 10:24, 25, ao maroroakina te titiraki aei:
E aera ngkai ti riai ni katoatai ni kaei bobotaki?
A TAKU TABEMAN: “Ko aki kainnanoa ae ko na botaki n taromauri ma aomata. E a tau naba te reirei n te Baibara ni mwengam.”
Tera te kibu ke te katoto n te Baibara ae kaotaki iai bwa e bon tangirira Iehova bwa ti na bobotaki?
KAKIMOTOTOANA
Kaeani bobotaki e na buokiko n reiakina riki taekan Iehova, ni kakorakoraa riki am iraorao ma ngaia, ao n uaia n taromauria ma tabemwaang.
Kauring
E aera ngkai e kaungaira Iehova bwa ti na kaai ni bobotaki n taromauri?
Tera ae ko na reiakinna n aia botaki Ana Tia Kakoaua Iehova?
N am iango, iai riki itera aika ko kona iai ni buokaki ni bobotaki n taromauri?
NORI NABA AIKAI
Tera arom ngkana e nako nanom ni kaean te botaki n taromauri? Nora aron te mwaane temanna are e namakina naba anne, ae e a tatangiri ngkai bobotaki n taromauri.
Nora aron te ataeinimwaane temanna ni kimwareirei ni bobotaki n taromauri ao te bae karaoia bwa e aonga n teimatoa ni kakaaei.
Nora aroia tabeman ni kaota aia namakin ibukini kaeani bobotaki n taromauri.
“E Aera Ngkai Ti Riai ni Kaea te Taromauri n te Tabo n Taromauri?” (Te kaongora n jw.org)
Nora aron te mwaane ae kaaina te kaeng teuana ni bitaki maiuna imwini kaean aia botaki n taromauri Ana Tia Kakoaua Iehova.
“Ai Bon Iriau Nako Naba Au Katii” (Te Taua-n-Tantani, Turai 1, 2014)