Ko Karerekea ‘Kanam n te Tai ae Riai’?

TI BONI maeka n te tai ae rangi ni karuanikai ma rimoa ni karokoa ngkai. (2 Timoteo 3:1-5) Ni katoabong, ti aitara ma kataakira ni kaineti ma tangiran Iehova ao ara motinnano ibukini kaboraoani maiura ma ana kaetieti aika raraoi. E a kaman nora te tai ae bati iai te kangaanga aei Iesu ao e karau nanoia taan rimwina bwa a na anganaki te kaungaunga ae a kainnanoia ibukin nanomwaakaia ni karokoa te toki. (Mataio 24:3, 13; 28:20) Ibukini kakorakoraan aia onimaki e a rinea te toro ae kakaonimaki bwa e na katauraoi “kanaia n te tai ae riai.”—Mataio 24:45, 46.

Ni moa man rinean te toro ae kakaonimaki n 1919, a a tia ni bobotakaki mirion ma mirion “tabonibai” man taetae ni kabane nakon ana botaki te Atua ao ni kakaamwarakeaki ni bwaai n taamnei. (Mataio 24:14; Te Kaotioti 22:17) Ma tiaki titeboo mwaitin reirei aika a katauraoaki n taetae nako ao a aki kona ni bane aomata ni wareki ara boki n te kaombiuta. N te katoto, a bati aika akea aia viteo ao a boreetiaki kaongora tii n te atureti ae jw.org. E nanonaki ngkanne n aei bwa iai tabeman aika a aki reke irouia kanaia aika a kainnanoi ibukini kateimatoaan nenen aia onimaki? Ti na rinanoi kaekaan titiraki aika kakawaki aika aua bwa ti aonga ni karaoi ara motinnano aika riai.

1. Tera te bwai ae kakawaki n te amwarake are e katauraoia Iehova?

Ngke e kataaki Iesu iroun Tatan bwa e na bitii atibu nakon te amwarake, ao e kaeka Iesu ni kangai: “E aki riai ni maiu te aomata n tii te amwarake, ma e na maiu naba n taeka nako aika otinako mai win Iehova.” (Mataio 4:3, 4) A boni koreaki ana taeka Iehova n te Baibara. (2 Betero 1:20, 21) Ai ngaia are te Baibara bon te bwai ae kakawaki ibukin te amwarake n taamnei ibukira.—2 Timoteo 3:16, 17.

E a tia ana botaki Iehova ni katauraoa Te Baibara ae Tabu—te Rairai ae te Aonnaba ae Boou ni bwanin ke tii te iterana n taetae aika a raka i aon 120 mwaitiia ao n rarakarake ni katoa ririki. Irarikin te rairai anne, a a tauraoi birion ma birion katotoni mwakoron te Baibara riki tabeua ni bwanin ke tii te iterana n taetae aika nga ma nga mwaitiia. E boraoi te mwakuri ae kamimi aei ma nanon Iehova are “e kantaningaiia aeka n aomata nako bwa a na kamaiuaki, ma ni karekea te atatai ae eti ibukin te koaua.” (1 Timoteo 2:3, 4) Ao ibukina bwa “akea te karikibwai teuana ae aki oti i [matan Iehova,]” ti kona ni koaua raoi bwa e na katikiia naake a “ataia bwa a kainnanoa te Atua” nakon ana botaki ao ni katauraoa te amwarake n taamnei ibukia.—Ebera 4:13; Mataio 5:3, 6; Ioane 6:44; 10:14.

2. Tera buokara man ara boki ibukini katauraoan amwarake n taamnei?

Ngkana e na karikirakea ana onimaki ae nene te aomata, e riai ni karaoa ae bati riki nakon are e na wareka te Baibara. E riai n ota n te bwai are e warekia ao ni maiuakini baike e a tia n reiakin. (Iakobo 1:22-25) E boni butimwaea te koaua anne te iunaki ae te I-Tiobia n te moan tienture. E wareka Ana Taeka te Atua ngke e a titirakinna te tia tataekina te rongorongo are Biribo ni kangai: “Ko bon ota n te bwai ane ko warekia?” E taku te iunaki: “N na kanga n ota ngkana akea ae reireinai?” (Mwakuri 8:26-31) E karaoa nanon anne Biribo rinanoni buokan te iunaki bwa e na karekea te atatai ae eti man Ana Taeka te Atua. E rangi n anaaki nanon te iunaki ni baike e reiakin ao e a bwabetitoaki. (Mwakuri 8:32-38) N aron naba anne, ti a tia ni buokaki n ara boki aika aanaki man te Baibara bwa ti na karekea te atatai ae eti ibukin te koaua. A bon rotaki iai nanora ao ti a kaungaaki bwa ti na maiuakini baike ti reiakin.—I-Korote 1:9, 10.

A karerekei bwaai n taamnei aika mwaitikurikuri ana toro Iehova rinanoni booki ike a amwamwarake ma ni momoi iai. (Itaia 65:13) N te katoto, n Te Taua-n-Tantani ae katauraoaki n taetae aika a raka i aon 210 mwaitiia, e a kabwarabwaraaki iai te taetae ni burabeti man te Baibara, e karikirakei arora n iaiangoi koaua aika nano ibukin te onimaki ao ni kaungaira naba nakoni maiuakinani booto n reirei man te Baibara. N te maekatin ae te Awake! ae boreetiaki tao n taetae aika 100 mwaitiia, e a karababaaki iai ara atatai ibukin ana mwakuri ni karikibwai Iehova ao e kaotaki iai arora ni maiuakina te reirei ni kairiri ae manena man te Baibara. (Taeka N Rabakau 3:21-23; I-Rom 1:20) E katauraoi reirei aika boto man te Baibara te toro ae kakaonimaki n taetae aika a raka i aon 680 mwaitiia! Ko kamwawaa am tai ni katoabong ni wareka te Baibara? Ko wawareki maekatin aika boou ni kabane ao booki nako aika tauraoi n am taetae ni katoa ririki?

Irarikini karaoani booki n ana botaki Iehova, a boni katauraoaki naba booto n iango ibukini kabwarabwara aika aanaki man te Baibara ake a na taekinaki n ara botaki, ruunga ao bwabwaro. Ko kukurei n ongoraei kabwarabwara, kaotioti ao maroro aika a kakaraoaki ni bobotaki akanne? Ni koauana, e katauraoa te baka n amwarake n taamnei Iehova ibukira!—Itaia 25:6.

3. E na rikirake ni mamaara am onimaki ngkana a aki kona n reke iroum booki ni kabane aika a a tia ni katauraoaki n am taetae?

Te kaeka iai e na bon aki. Ao ti aki riai ni mimi ngkai n taai tabetai, a kona ana toro Iehova tabeman ni karekei amwarake n taamnei aika bati riki nakoia ake tabeman. Bukin tera? Iangoa aroia abotoro. A karerekei kaetieti aika bati riki nakoia taan rimwini Kristo ake tabeman n te moan tienture. (Mareko 4:10; 9:35-37) Ma e ngae n anne, a bon aki mamaara aia onimaki taan rimwini Kristo ake tabeman akanne, bwa a boni karerekei baika a kainnanoi.—I-Ebeto 4:20-24; 1 Betero 1:8.

E kakawaki naba ataakin ae a bati mai buakon ana taeka Iesu ao ana mwakuri ake e karaoi ni menana i aon te aba aika a aki koreaki n rongorongo ake n taian Euangkerio. E korea ae kangai te abotoro Ioane: “Ni koauana, a rangi ni bati riki bwaai ake e karaoi Iesu, ao ngkana arona bwa a koreaki ni kabane taekaia, ao I taku ngai bwa a aki kona kaain te aonnaba ni kawakini mwaitin nira ni boki aika a na koreaki.” (Ioane 21:25) E ngae ngke a bati riki rongorongon te aomata ae kororaoi ae Iesu ake a ataia taan rimwina n te moan tienture nakon ae ti ataia, ma ti bon aki tare ni baikanne. E a tia Iehova n taraia raoi bwa ti na ataa ae tau ibukin Iesu ao n riki bwa taan toua mwini mwanekana.—1 Betero 2:21.

Iangoi naba reeta ake a kanakoaki irouia abotoro nakon ekaretia ake n te moan tienture. Bon tii teuana ana reta Bauro ae e aki kawakinaki n te Baibara. (I-Korote 4:16) E koaua bwa e a aki tau kanara n taamnei ibukina bwa e aki reke iroura te reta anne? Tiaki ngaia anne. E atai baika ti kainnanoi Iehova ao e a tia n anganira ae tau ibukini kateimatoaan nenen ara onimaki.—Mataio 6:8.

Ni boong aikai, iai kurubu tabeua i buakoia ana toro Iehova aika a bati riki kanaia n taamnei aika tauraoi ibukia nakoia ake tabeman riki. Ko kamanena te taetae ae tii tabeua iai booki aika katauraoaki? Ngkana ngaia anne, ko riai n ataia bwa e bon tabeakiniko Iehova. Reiakina te reirei ane iroum, ao ngkana e angaraoi, irii bobotaki aika karaoaki n te taetae ae ko ota iai. Ao kakoauaa bwa e na boni kateimatoa nenen am onimaki Iehova.—Taian Areru 1:2; Ebera 10:24, 25.

4. E na moanna ni mamaara am onimaki ngkana e aki reke iroum te reirei ae boreetiaki n te atureti ae jw.org?

Ti katauraoi katoton ara maekatin ao booki riki tabeua ibukin te reirei n te Baibara n ara atureti ae kakawaraki n te Internet. Iai naba n te atureti reirei aika reke iai buokaia taanga, rooro n rikirake ao te koraki ake iai natiia aika uarereke. A kakabwaiaaki utu man iaiangoan reirei aikai n aia tai n Taromauri n Utu. Irarikin anne, a bon ribootinaki n ara atureti ae kakawaraki kaetieti aika okoro n aron te angabeeba n te Kireata ao te boowi ni katoa ririki, ao e teimatoa ni kaongoia kaain ara botaki n itaritari ni katobibia te aonnaba taekani kabuanibwai aika karina ao aia mwakuri tautaeka aika rotakibuaka iai ana aomata Iehova. (1 Betero 5:8, 9) Bon te bwai ni mwakuri naba ae rangi n uaana te atureti ae kakawaraki n te Internet ibukin te uarongorongo, ike e a katauraoaki iai te rongorongo ae raoiroi n aaba ake e totokoaki iai ara mwakuri ke ni katabuakaki.

Ma e boni kona naba n teimatoa n nene am onimaki, e ngae ngkana e reke ke e aki iroum ara atureti ae kakawaraki n te Internet. E a tia te toro ae kakaonimaki ni mwakuri korakora ni katauraoi reirei aika tau mwaitiia aika boreetiaki ibukini kateimatoaani kanuaakia ana tabonibai n tatabemania nako ni bwaai n taamnei. Mangaia are ko riai n aki iangoia bwa ko kabaeaki bwa ko na kabooa teuana mai buakoni kukune aika boou, tii ibukini karekean te atureti ae jw.org. A kona tabeman ni karaoi aia babaire n tii ngaiia ni karekei katoton reirei n te mwaiti ae tau aika boreetiaki n ara atureti ae kakawaraki n te Internet ao n angania te koraki ake akea aia Internet, ma bon tiaki tabeia ekaretia.

Ti rangi ni kaitaua Iesu ibukini kateimatoaan ana berita ni kaineti ma baika ti kainnanoi ibukin ara onimaki. Ngkai a a waekoa n roko n tokia kabaneani boong aika kangaanga aikai, ti a kona ni kakoauaa bwa e na bon teimatoa Iehova ni katauraoi ‘kanara n te tai ae riai’ ibukin ara onimaki.