REIREI 39
Ana Iango te Atua Ibukin te Raraa
E rangi ni kakawaki te raraa. Ngkana akea te raraa ao ti aki kona ni maiu. Ngkai te tia Karikiriki te Atua, iai riaina n tuangira aroni kabonganaan te raraa. Tera ae e taekinna ibukin te raraa? E kona ni kanaki ke ni karinaki iroun temanna? Ko na kangaa ni karaoi am motinnano aika raoiroi i aon aei?
1. Tera ana iango Iehova ibukin te raraa?
E taku Iehova nakoia taan taromauria n taai ake e koreaki iai te Baibara: “Maiuni baika maiu ni kabane te raraa.” (Nakoaia Ibonga 17:14) Iroun Iehova, e tei te raraa ibukin te maiu. Kioina ngkai e tabu te maiu ao bon te bwaintangira mairoun te Atua, e tabu naba ngkanne te raraa.
2. Tera ae e taekinna te Atua ibukin te raraa?
E tua Iehova nakoia taan taromauria imwain aia tai Kristian bwa a na aki kana te raraa. (Wareka Karikani Bwaai 9:4 ao Nakoaia Ibonga 17:10.) E kamatoaa riki te tua aei ngke e tua te rabwata n tautaeka nakoia Kristian bwa a na “teimatoa n rawa [nakon] . . . te raraa.”—Wareka Mwakuri 15:28, 29.
Tera ae nanonaki n te rawa nakon te raraa? Ngkana e tuangko te taokita bwa ko na rawa nakon te kamanging, ko na bon aki nimma. Ma te koaua bwa ko kona ni kang amwarake ake iai te kamanging iai ke ni karinna rinanon ian rabwatam? Ko na bon aki. N aron naba anne, ana tua te Atua ibukin te rawa nakon te raraa e nanonaki iai bwa ti riai n aki nimma ke ni kana irikon te man ae aki katiinakoaki raraana. Ti aki riai naba ni kang amwarake aika iai te raraa iai.
Ma tera aroni kabonganaan te raraa bwa te bwainnaoraki? Iai tabeua waaki ni bwainnaoraki aika a urua ana tua te Atua. E irekereke anne ma karinan te raraa ae bwanin ke teuana mai buakoni mwakoron raraa aika taian red cell, white cell, platelet, ao te plasma. Tabeua waaki ni bwainnaoraki a aki rangi ni mataata raoi bwa a urua ana tua te Atua ke a aki. N te katoto, tabeua waaki ni bwainnaoraki a irekereke ma kabonganaani mwakorokoro n raraa man teuana mai buakoni mwakoro n raraa. Ake tabeua, a irekereke ma kabonganaan oin raraan te aomata. Ngkana ti iaiangoi baikai, ti bon riai ni karaoi oin ara motinnano iai.a—I-Karatia 6:5.
REIAKINA AE BATI RIKI
Nenera arom ni karaoi motinnano ibukin te bwainnaoraki ni kaineti ma kabonganaan te raraa.
3. Karaoi motinnano ibukin te bwainnaoraki aika kakukureia Iehova
Ko na kangaa ni karaoi motinnano ibukin te bwainnaoraki aika boraoi ma ana iango te Atua ibukin te raraa? Kaota te TAAMNEI, ao maroroakini kakawakini karaoan aanga aikai.
Tataro ibukin te wanawana.—Iakobo 1:5.
Ukeri booto n reirei man te Baibara ao arom ni maiuakin.—Taeka N Rabakau 13:16.
Kakaaea bwa baikara bwainnaoraki aika tauraoi n am tabo.
Atai bwainnaoraki aika ko riai n aki butimwaei.
Taraia raoi bwa e na itiaki mataniwin nanom n am motinnano ae ko karaoia.—Mwakuri 24:16.b
Ko riai n ataia bwa akea temanna ae riai ni karaoa am motinnano ibukini baika irekereke ma te mataniwinnano, e ngae naba ngkana boni buum, te unimwaane, ke am tia Reirei n te Baibara.—I-Rom 14:12.
Korea am motinnano bwa a aonga n ataa taekana tabeman.
4. A ukera te bwainnaoraki ae te kabanea n tamaroa Ana Tia Kakoaua Iehova
Ti kona n ongeaba nakon ana tua te Atua ibukin te raraa ao ni karekea naba te bwainnaoraki ae tamaroa n akea te raraa. Kaota te TAAMNEI.
Wareka Tito 3:2, ao maroroakina te titiraki aei:
E aera bwa ti riai ni kaotiota te karinerine ao te nimamannei ngkana ti maroro ma taokita?
E na Aki Butimwaeaki |
E na Motinnanoia te Kristian |
|---|---|
A. Te plasma |
Mwakorokoro n raraa man te plasma |
B. Taian white cell |
Mwakorokoro n raraa man taian white cell |
C. Taian Platelet |
Mwakorokoro n raraa man taian platelet |
D. Taian Red cell |
Mwakorokoro n raraa man taian red cell |
5. Ngkana a kainnanoaki mwakorokoro n raraa
E reke te raraa mani mwakoro n raraa aika aua aika taian red cell, white cell, platelet, ao plasma. Iai i nanoni mwakoro n raraa aikai bwaai aika uarereke ao a aranaki bwa mwakorokoro n raraa.c A kabonganaaki mwakorokoro n raraa aikai ni bwainnaoraki ibukini buakanakin aoraki ao buokani katokan tiinakon te raraa.
Ni kaineti ma mwakorokoro n raraa, e riai te Kristian ni karaoa oin ana motinnano ae kairaki ni mataniwin nanona ae kataneiaaki n te Baibara. A kona ni motinnanoia tabeman bwa a na rawa nakon te bwainnaoraki ke te waaki ni bwainnaoraki ae irekereke ma mwakorokoro n raraa. Tabeman a kona n namakinna bwa e raoiroi ma mataniwin nanoia butimwaeani mwakorokoro n raraa.
Ni karaoan am motinnano, iangoa te titiraki aei:
N na kangaa ni kabwarabwaraa nakon te taokita, bukina ngkai I rawa ke ngkai I butimwaea kabonganaani mwakorokoro n raraa?
E KONA NI KANGAI TEMANNA: “Tera te kangaanga ni butimwaean te karin raraa?”
Tera ngkoe am iango?
KAKIMOTOTOANA
E tangirira Iehova bwa ti na iangoa te raraa bwa e tabu.
Kauring
E aera Iehova ngkai e iangoa te raraa bwa e tabu?
Ti kangaa n ataia ae ana tua te Atua ibukin te rawa nakon te raraa, e nanona naba iai te karinraraa?
Ko na kangaa ni karaoi am motinnano aika raraoi ibukini kabonganaan te raraa bwa te bwainnaoraki?
NORI NABA AIKAI
Baikara bwaai aika ti riai n iaiangoi moa imwain ae ti motinnanoia bwa ti na butimwaea kabonganaan oin raraara n te waaki ni bwainnaoraki?
“Titiraki Mairouia Taani Wareware” (Te Taua-n-Tantani, Okitobwa 15, 2000)
Tera ae ko riai n iangoia ngkana ko na motinnanoia bwa ko na butimwaei mwakorokoro n raraa ke ko na aki?
“Titiraki Mairouia Taani Wareware” (Te Taua-n-Tantani, Tun 15, 2004)
Learn Nora aroia unimwaane ake a beku n te Komete ae Tabe ma te Onnaoraki ni buokiia taari.
b Nora nambwa 5, “Ngkana a Kainnanoaki Mwakorokoro n Raraa,” ao Kabwarabwaraana 3, “Waaki ni Bwainnaoraki Aika Irekereke ma te Raraa.”
c A iangoi mwakoro n raraa ake aua tabeman taokita bwa mwakorokoro n raraa. Ngaia are ko riai n taraia raoi bwa e na ota n am motinnano am taokita ibukin aki butimwaean te raraa ae bwanin ke te red cell, white cell, platelet, ke te plasma.