3 Te Ikarinerine

AE NANONAKI IAI

Taanga aika ikarinerine a tabeakinia i marenaia e ngae naba ngkana a aki boraoi n iango n te bwai teuana. E taku te boki ae Ten Lessons to Transform Your Marriage: “A aki kamatoa taanga aikai i aon aia iango aika kakaokoro, ma a mamaroroakini. A kakauongo ma te karinerine i marenaia ao a karaoi aia babaire aika nakoraoi ibukia ni kauoman.”

TE BOTO N REIREI MAN TE BAIBARA: “Te tangira . . . e aki ukera oini kabwaiana.”—1 I-Korinto 13:4, 5.

“Ngkana N na karinea buu nanona bwa N na kaotiotia ae e rangi ni kakawaki irou, ao I aki kani karaoa te bae e na uruana arona ke ara mare.”—Micah.

BUKINA NGKAI E KAKAWAKI TE IKARINERINE

Ngkana akea te ikarinerine irouia taanga, e kona ni kai reke n aia taetaenikawai, te kabuakaka, te kaunun, ao te kakaniko naba, aika aroaro ake a taku taani kakaae bwa moani mwaneka nakon te buuraure.

“Tiribureani buum, bwainingareana, ke bwaintakaakaroana, e kona n uruana arona, e na kabuaa onimakinam irouna, ao e na uruaki iai am mare.”—Brian.

TE BWAI AE KO KONA NI KARAOIA

TUOKO I BON IROUM

Tataraa tein am taetaenikawai ao am mwakuri i nanon teuana te wiki. Ao titirakiniko ni kangai:

• ‘Mwaitira au tai ni kakabuakakaa buu ao ni kakamoamoaa?

• ‘Aaro raa aika okoro ake I kaokaota iai karineani buu?’

MAROROAKINI BAIKAI MA BUUM

• Baikara mwakuri ao taeka ake a buokingkami n tat

• abemaningkami n namakinna ae kam karineaki iai?

◼ Baikara mwakuri ao taeka ake kam namakinna iai bwa kam aki karineaki?

• TAIAN IBUOBUOKI

• Korei baika tenua aika ko tangiri bwa e na kaotaki iai karineam. Tuanga buum bwa e na karaoa naba anne. Kaaibibitii ami beeba, ao mwakuria kaotiotan te karinerine n itera ake a tangiraki iai.

◼ Karinani kakatekeni buum ao tuangnga ae e bwaka nanom n aroarona akanne.

“Karineani buu nanona kaotana n au mwakuri bwa e kakawaki irou ao I kani kakukureia. E aki nanoni karaoani baika bubura n taai nako, bwa n tabetai e kona naba n oti te karinerine ni koaua ni baika uarereke aika ko kakaraoi.”—Megan.

E aki kakawaki bwa ko na iangoiko bwa ko bwabwaina te karinerine ke ko aki, ma ae kakawaki riki, bon namakinana irouni buum bwa e karineaki ke e aki.