E Berita te Atua Bwa E na Teimatoa Ara Buraneti

Anne te bwai ae a kunea te tiim teuana ni kakaae ibukini bibitakini kanoan te bong. Ngkana ko kakoauaa te tia Karikiriki ae tabeakinia aomata, ko bae ni kauringaki ni mwin te kakaae aei, aanga aika bati ake e kariki te Atua ibukini manga kaokani marurungin ara aonnaba i bon irouna.

Ma ibukina bwa e rangi ni korakora uruakan te aonnaba aei irouia aomata, e a aki kona ni kamarurungnga i bon irouna. Bukin tera bwa ti kona ni kakoauaa ae te Atua e na boni karaoa te bwai teuana ibukin te baei?

Nori kiibu aika karinanaki n te bwaoki aika a karauaki iai nanora bwa e na bon teimatoa te aonnaba ao ni korakora naba.

• E karikaki ara buraneti aei iroun te Atua. “N te moantai ao e karika karawa ma te aonnaba te Atua.”—Karikani Bwaai 1:1

• Te Atua bon ana bwai ara buraneti aei. “Ana bwai Iehovaa te aonnaba ma kanoana nako.”—Taian Areru 24:1.

• E karaoa ara buraneti te Atua bwa e na teimatoa. “E kamatoaa te aonnaba i aon aana, e na aki kaingingaki mani nnena n aki totoki.”—Taian Areru 104:5.

• E berita te Atua bwa e na teimatoa te maiu n ara buraneti aei n aki toki. “Te Atua ae koaua, ae Teuare karaoa te aonnaba, . . . e aki karaoia bwa e na matebuaka, ma e karaoia bwa e na maekanaki.”—Itaia 45:18.

• E berita te Atua bwa a na maeka aomata n ara buraneti aei n aki toki. “A na abana te aonnaba akana raoiroi, ao a na maeka i aona n aki toki.”—Taian Areru 37:29

E a tia te Atua ni karika te aonnaba ma bwaina nako aika kona ni kaaitarai mwin nako aia mwakuri aomata. E a kaman taekinaki n te Baibara bwa Iehova ae te Atua e na katoki mwakuri aika uruana ara buraneti, n ana tai ae e a tia n namatia.—Te Kaotioti 11:18.

E beritanaki n te Baibara bwa te Atua e na bita ara aonnaba aei nakon te bwaretaiti ae tikauarerei ao e na kaurea baina ni “kabaneia aomata ma maan aika maiu, ni katoki nanoia ni baika a tangiri.”—Taian Areru 145:16.