Te Rongorongo ae Eti ao ae Kona n Onimakinaki

Ruka 1:3

KABWARABWARAANA: Kamanenai bwaai ni kakoaua aika kona n onimakinaki ni buokiia iai taan ongora bwa a na karekea otaia ae eti.

ARONI KARAOANA:

• Kakaaei ao kamanenai booki aika kona n onimakinaki. Kabotoa am maroro i aon Ana Taeka te Atua ao warekia ngkana e angaraoi. Ngkana ko taekina te rabakau n aonnaba, te rongorongo man taabo ni kanakorongorongo, rongorongon temanna, ke bwaai ni kakoaua riki tabeua, kaman tuoa bwa e na eti ao ni koaua am rongorongo anne.

• Kamanenai booki n te aro ae riai. Kabwarabwarai kiibu n aron ae boraoi ma kanoan te kibu ae bwanin, te rongorongo ae bwanin n te Baibara, ao booki ake a katauraoaki iroun “te toro ae kakaonimaki ma ni wanawana.” (Mat. 24:45) Kamanenai booki mai tinanikun ana botaki Iehova n te aro ae eti raoi ma ana rongorongo te tia koreia, ao n aron are e nanonna iai.

• Maroroakina te bwai ni kakoaua. Imwini warekan te kibu ke mwaneweani kanoan te boki teuana, tabeki titiraki ma te akoi ke kamataataa te reirei ae kakawaki ni buokiia taan ongora bwa a na karekea otaia iai.