E Taekini Keewe Ibukin te Atua te Aro ae Kewe

Ngkana bon te tangira Atua, ao e aera ngkai a a bati mwakuri aika bubuaka aika karaoi Aaro ake a taku bwa a tei ibukin te Atua? A boni kewe Aaro aikai, ao a taekini keewe ibukin te Atua. A kangaa n taekini keewe ibukin te Atua? Tera ana namakin iai te Atua? Ao tera ae e na karaoia ibukin anne?

1. E kangaa te Aro ae kewe n taekini keewe ibukin te Atua n ana reirei?

E “butimwaea riki te kewe nakon te koaua ibukin te Atua” te Aro ae kewe. (I-Rom 1:25) N te katoto, a bati Aaro aika a aki reireinia aia aomata aran te Atua. Ma e taekinna te Baibara bwa e riai ni kamanenaaki aran te Atua. (I-Rom 10:​13, 14) A taekinna tabeman mataniwin Aaro bwa ngkana e riki te kangaanga, ao bon anne ana babaire te Atua. Ma bon te kewe anne. E bon aki kona ni karikii baika bubuaka te Atua. (Wareka Iakobo 1:13.) E kananokawaki bwa man aia kewe Aaro aikai, e a kangaanga iai irouia aomata bwa a na tangira te Atua.

2. E kangaa te Aro ae kewe n taekini keewe ibukin te Atua n ana mwakuri?

E aki iangoiia aomata n aron ana iango Iehova te Aro ae kewe. E taekinna te Baibara bwa te Aro ae kewe e “a uaatao ana bure ao a a rota karawa.” (Te Kaotioti 18:5) N tienture aika bati, a a tia Aaro ni kairekerekeia ma te waaki n tautaeka, a boutokaa te buaka, are a mate iai aomata aika mwaitikurikuri. Tabeman mataniwin Aaro a rangi ni maiuraoi, ma a kairoroiia aia aomata bwa a na karikirake ibukini maiuraoia. A oti mani mwakuri aikai bwa a aki ataa te Atua, ao a aki riai n tei ibukina.​—Wareka 1 Ioane 4:8.

3. Tera ana namakin te Atua ibukin te Aro ae kewe?

Ngkana ko a un naba ni baika e kakaraoi te Aro ae kewe, n am iango tera ana namakin Iehova? E tangiriia aomata, ma e rangi n un irouia mataniwin Aaro aika a taekini keewe ibukina ao a karaoa ae aki riai nakoia aia aomata. E berita bwa e na boni kamaunaaki te Aro ae kewe ao e “na aki manga noraki.” (Te Kaotioti 18:21) E a kaan te tai are e nang karokoa iai n tokina te Aro ae kewe te Atua.​—Te Kaotioti 18:8.

REIAKINA AE BATI RIKI

4. E aki butimwaei Aaro ni kabane te Atua

A bati aika kakoauaa ae Aaro kaanga ai aroni kawai aika kakaokoro aika kairiri nakon te Atua. Ma e koaua anne? Wareka Mataio 7:​13, 14, ao maroroakina te titiraki aei:

• E kangaa te Baibara ni kabwarabwaraa te kawai ae tiki nakon te maiu?

Kaota te TAAMNEI, ao maroroakina te titiraki aei.

TAAMNEI: E Butimwaei Aeka n Taromauri Nako te Atua?​—Mwakorona (3:22)

• E koaua bwa e taekinaki n te Baibara ae e kukurei te Atua irouia Aaro aika bati?

5. E aki kaotiota ana tangira te Atua te Aro ae kewe

A taekini keewe ibukin te Atua Aaro n aanga aika bati. Te anga teuana ae rangi ni buakaka riki bon irekerekeia ma te buaka. Nora te katoto teuana, kaota te TAAMNEI. Ao maroroakin titiraki aikai.

TAAMNEI: Te Bwai Are A Karaoia Aaro n te Kauoua ni Buaka Are Kabutaa Aonnaba (2:22)

• Tera are a karaoia Aaro aika bati n tain te Kauoua ni Buaka Are Kabutaa Aonnaba?

• Tera am namakin n te baere a karaoia?

Wareka Ioane 13:​34, 35 ao 17:16. Ao maroroakin titiraki aikai:

• N am iango, tera ana namakin Iehova ngke a irekereke Aaro ma te buaka?

• A riki baika bubuaka aika bati mairoun te Aro ae kewe. Tera ae ko a tia n noria ae a kabwaka iai Aaro ni kaotiota ana tangira te Atua?

6. E kani kainaomataia aomata te Atua man te Aro ae kewe

Wareka Te Kaotioti 18:​4,a ao maroroakina te titiraki aei:

• Tera am namakin n ataakin ae e kani buokiia aomata nako te Atua, ake a a tia ni mwamwanaaki iroun te Aro ae kewe?

7. Teimatoa n reiakina taekan te Atua ae koaua

E riai bwa e na rotaki arom n iangoa te Atua, n ana waaki te Aro ae kewe? Iangoa aron te nati te mwaane ae rawa nakon ana kairiri ae raoiroi tamana. E kitana mwengana ao e a karaoi baika a rangi ni buakaka. E aki kukurei te karo aei n ana mwakuri natina. E aera ngkai e aki riai ni bukinaki te karo aei n aroni maiun natina are karitei?

• E riai bwa ti na bukina naba Iehova ao ni katoka reiakinan taekana tii ibukin ana waaki te Aro ae kewe?

KAKIMOTOTOANA

E a tia n taekini keewe ibukin te Atua te Aro ae kewe n ana reirei aika kairua ao n ana mwakuri aika bubuaka. E na boni kamauna te Aro ae kewe te Atua.

Kauring

• Tera am namakin n ana reirei te Aro ae kewe ao te baere e karaoia?

• Tera ana namakin Iehova iroun te Aro ae kewe?

• Tera ae e na karaoia te Atua nakon te Aro ae kewe?

NORI NABA AIKAI

Reiakin aanga aika uoua ae a aki kakukureia iai te Atua angia Aaro.

“Titeboo Aaro Nako? A Bane ni Kairiri Nakon te Atua?” (Te kaongora n jw.org)

E aera Iehova ngkai e tangirira ao tabeman riki bwa ti na taromauria?

“E Riai Bwa Ko na Kaaina te Botaki n Aro Teuana?” (Te kaongora n jw.org)

A a tia Aaro i nanon ririki aika bati n taekini keewe ibukin te Atua, are a kakoauaa iai aomata bwa e aki tabeakinira ao e karawawataira. Reiakina te koaua ibukini keewe aika tenua aikai.

“Keewe Aika Kairiri Nakon Iangoan ae E Aki Tatangira te Atua” (Te Taua-n-Tantani, Nobembwa 1, 2013)