REIREI 16
Tera Are E Karaoia Iesu Ngke E Mena n te Aonnaba?
A bati aomata aika iangoa Iesu bwa bon tii te merimeri ae aki konabwai, te burabeti ae rabakau, ke te mwaane ae e a kaani mate. Ma ti kona n reiakina riki taekana man nenerani maiuna n te aonnaba? N te reirei aei, ti na rinanoi bwaai tabeua aika rangi ni kakawaki ake e karaoi Iesu, ao aron rotakim iai.
1. Tera ana mwakuri Iesu ae rangi ni kakawaki?
Ana mwakuri Iesu ae rangi ni kakawaki bon “[tataekinan] te rongorongo ae raoiroi ae taekan ana Tautaeka n Uea te Atua.” (Wareka Ruka 4:43.) E tataekina te rongorongo ae raoiroi ae e na katea te tautaeka n uea te Atua, ke te tautaeka, ae e na katoki aia kangaanga aomata nako.a E rangi ni mwakuri korakora Iesu i nanon tenua ao te iterana te ririki, n tataekina te rongorongo ae kaunganano aei.—Mataio 9:35.
2. E aera ngke e karaoi kakai Iesu?
A bati “mwakuri ni kakai ma baika kamimi ma kanikina ake e karaoi te Atua . . . rinanon Iesu” aika kabwarabwaraaki n te Baibara. (Mwakuri 2:22) Mani mwaakan te Atua, are e a kona iai Iesu n taua aron te ang ma te karau, ni kaamwarakeia nga ma nga, ni kamarurunga ae e aoraki, ao ni kauta naba te mate. (Mataio 8:23-27; 14:15-21; Mareko 6:56; Ruka 7:11-17) E oti raoi man ana kakai Iesu aikai bwa e boni kanakomaiakaki iroun te Atua. E oti naba iai bwa e boni kona Iehova ni katoki ara kangaanga ni kabane.
3. Tera ae ti reiakinna mani maiun Iesu?
E ongeaba Iesu iroun Iehova n taai nako. (Wareka Ioane 8:29.) N aki ongea kakaitaraana, ma e boni kakaonimaki Iesu n uaa matena ni karaoi baike e tuangnga Tamana. E kaotia iai bwa a boni kona ni beku iroun te Atua aomata, n aki ongei kangaanga. E katuka ‘te banna ni katoto [Iesu] nakoira bwa ti na toua raoi mwini mwanekana.’—1 Betero 2:21.
REIAKINA AE BATI RIKI
Iangoa aron Iesu n tataekina te rongorongo ae raoiroi ao ni karaoi kakai.
4. E tataekina te rongorongo ae raoiroi Iesu
E rianna Iesu irabubua te maire ni kawai aika bubu, n tataekina iai te rongorongo ae raoiroi nakoia aomata aika bati. Wareka Ruka 8:1, ao maroroakin titiraki aikai:
E uarongorongo Iesu tii nakoia aomata ake a botaki n ongora irouna?
E kangaa ni kakorakoraa Iesu ni kakaaeia aomata?
E a kaman taekinna te Atua ae e na tataekina te rongorongo ae raoiroi te Mesia. Wareka Itaia 61:1, 2, ao maroroakin titiraki aikai:
E kangaa Iesu ni kakororaoa te taetae ni burabeti aei?
N am iango, a riai naba n ongo te rongorongo ae raoiroi aei aomata ni boong aikai?
5. E taekin reirei aika manena Iesu
E aki tii tataekina te rongorongo ae raoiroi ibukin Ana Tautaeka n Uea te Atua Iesu, ma e taekin naba reirei aika manena. Iangoi katoto tabeua man ana Kabwarabwara i aon te Maunga. Wareka Mataio 6:14, 34 ao 7:12, ao maroroakin titiraki aikai:
Tera te taeka n reirei ae manena are e taekinna Iesu ni kiibu aikai?
N am iango, e boni manena naba ngkai te taeka n reirei aei?
6. E karaoi kakai Iesu
E anga te mwaaka Iehova nakon Iesu bwa e aonga ni karaoi kakai aika bati. Ibukin noran te katoto teuana, wareka Mareko 5:25-34 ke kaota te TAAMNEI. Ao maroroakin titiraki aikai.
N aron ae oti n te taamnei, tera are e kakoauaa raoi te aine are aoraki?
Tera ae anaaki iai nanom n te kakai aei?
Wareka Ioane 5:36, ao maroroakina te titiraki aei:
Tera ae ‘kaotaki’ n ana kakai Iesu, ke ae e kakoauaaki ibukina?
Ko ataia?
Angiin rongorongon Iesu aika ti atai, a bon nako mani bokin te Baibara aika aua aika aranaki bwa taian Euangkerio, aika Mataio, Mareko, Ruka, ao Ioane. A taekin rongorongon Iesu aika kakaokoro taani korei Euangkerio aikai. Ma ngkana ti wareki booki aika aua aikai, ao e na tabwanin raoi iroura aroni maiun Iesu.
MATAIO
e korea te moan Euangkerio. E katuruturui iai ana angareirei Iesu, moarara riki ana angareirei Iesu ibukin Ana Tautaeka n Uea te Atua.
MAREKO
e korea te kabanea n uarereke n Euangkerio. E taekini baika kakukurei aika bati.
RUKA
e kaatuua taekan kakawakin te tataro iroun Iesu ao arona n akoiia aine.
IOANE
e kaota aroaron Iesu, n arona ni mwanewei ana taeka aika bati ake e taekin nakoia raoraona ni kaan ao tabeman riki.
A TAKU TABEMAN: “Bon tii te mwaane ae raoiroi Iesu, ma tiaki te Mesia.”
Tera ngkoe am iango?
KAKIMOTOTOANA
E tataekina Ana Tautaeka n Uea te Atua Iesu, e karaoi kakai, ao e ongeaba nakon Iehova n taai nako.
Kauring
Tera ana mwakuri Iesu ae rangi ni kakawaki ni menana n te aonnaba?
Tera ae kakoauaaki man ana kakai Iesu?
Baikara ana reirei Iesu aika manena?
NORI NABA AIKAI
Tera ae e rangi n tataekinna riki Iesu?
“Ana Tautaeka n Uea te Atua—Bukini Kakawakina Iroun Iesu” (Te Taua-n-Tantani, Okitobwa 1, 2014)
Wareka aron rotakini maiun te mwaane temanna man aron Iesu n anga boni ngaia.
“I Bon Tii Tabeakinai” (Te Taua-n-Tantani, Okitobwa 1, 2014)
Nori ana mwakuri Iesu aika rangi ni kakawaki n ana mwakuri ni minita ake e karaoi n te aro ae baireaki raoi.
a E na kabwarabwaraaki riki taekan Ana Tautaeka n Uea te Atua, n Reirei 31-33.