REIREI 45
Ae E Nanonaki n te Tei i Nuka
E reireinia taan rimwina Iesu bwa a na “aki arona aroia kaain te aonnaba.” (Ioane 15:19) Te tei i nuka e nanonaki iai te aki irani waaki n tautaeka n te aonnaba ke n te buaka. Ni koauana, e aki bebete n taai nako te tei i nuka. Ti kona ni bwainingareaki ibukin aei. Ma ti na kangaa n tei i nuka ao n teimatoa ni kakaonimaki ni koaua nakon Iehova ae te Atua?
1. Tera aia iango Kristian ni koaua n aia tautaeka aomata?
A karinea te tautaeka Kristian. Ti karaoa are e taekinna Iesu ao ti “angani Kaitara akana ana bwai Kaitara” n arora n ongeaba nakon tuan te aba, n aroni kabwakaan te taekiti. (Mareko 12:17) E taekinaki n te Baibara bwa a kairiri tautaeka n aomata tii ibukina bwa e kariaia Iehova nakoia bwa a na kairiri. (I-Rom 13:1) Ngaia are ti a ota ngkanne bwa iai tiani mwaakaia ni kairiri tautaeka n aomata aikai. Ti onimakina Atuara ma ana Tautaeka n Uea i karawa bwa e na boni katoki aia kangaanga botannaomata.
2. Ti na kangaa ni kaotia bwa ti tei i nuka?
N aron Iesu, ti aki naba kairekerekeira ma waaki n tautaeka. Ngke a nora teuana mai buakon ana kakai Iesu aomata ao a kani kaueaa, ma e rawa Iesu. (Ioane 6:15) Bukin tera? Ibukina bwa e kangai imwina, “tiaki ana bwai te aba au Tautaeka n Uea.” (Ioane 18:36) Ngkai taan rimwin Iesu ngaira, ti kaotia bwa ti tei i nuka n aanga aika bati. N te katoto, ti aki nako ni buaka. (Wareka Mika 4:3.) Ti karinei bwaai aika tei ibukin te aba n aron te buraeki, ma ti aki tiaruuti nakoina ibukina bwa titeboo ma ti a bobaraaki n taromauria. (1 Ioane 5:21) Ao ti aki naba tei n itera ake tabeua ke ni kaitaraa te bwaatei teuana ke te tia tei temanna. N aanga aikai ao tabeua riki, ti a kaotia iai bwa ti boni kakaonimaki raoi ni koaua nakon Ana Tautaeka n Uea te Atua.
REIAKINA AE BATI RIKI
Nori baika a kona n kataa teira i nuka, ao arom naba ni karaoi motinnano aika e na kukurei iai Iehova.
3. A tei i nuka Kristian ni koaua
A katea te banna ni katoto ibukira Iesu ao taan rimwina. Wareka I-Rom 13:1, 5-7 ao 1 Betero 2:13, 14. Imwina, kaota te TAAMNEI ao maroroakin titiraki aikai.
E aera bwa ti riai ni karineia tautaeka n aomata?
Baikara aanga tabeua ae ti kaotia iai bwa ti aantaeka nakoia?
A kona n taekinna aaba tabeua bwa a tei i nuka n tain te buaka ngkai a aki ira te boo ni buaka. Ma a boni boutokaiia naba aaba ake a buaka i marenaia n aroia n anga te mwane ke bwaai ni buaka. Tera raoi ae nanonaki n te tei i nuka? Wareka Ioane 17:16. Imwina, kaota te TAAMNEI ao maroroakina te titiraki aei.
Tera ae nanonaki n te tei i nuka?
Tera arom ngkana a tua tautaeka n aomata karaoan te bwai teuana ae e kauntaba ma ana tua te Atua? Wareka Mwakuri 5:28, 29. Imwina, kaota te TAAMNEI ao maroroakin titiraki aikai.
Ngkana e kauntaba aia tua aomata ma ana tua te Atua, antai ngkanne ana tua ae ti riai n ongeaba iai?
Ko kona n iangoi baika a rinanoi Kristian ake a na aki ongeaba iai nakoia tautaeka n aomata?
4. Tei i nuka n am iango ao n am mwakuri
Wareka 1 Ioane 5:21. Imwina, kaota te TAAMNEI ao maroroakin titiraki aikai.
N aron ae oti n te taamnei, e aera ngke e motinnanoia Ayenge bwa e na aki boutokaa te bwaatei teuana ke botaki aika irekereke ma te nano n aba, n aron te tiaruuti nakon te buraeki?
N am iango, e karaoa ana motinnano ma te wanawana?
Baikara riki bwaai aika a kona n kataa teira i nuka? Kaota te TAAMNEI, ao maroroakin titiraki aikai.
Ti na kangaa n tei i nuka ngkana e a roko tain te kaboo n te takaakaro ibukin aaba aika kakaokoro?
Ti na kangaa n teimatoa n tei i nuka e ngae ngkana ti a rotakibuaka ke ni kakabwaiaaki n aia babaire kaain te tautaeka?
E na kangaa n rotaki teira i nuka, ni baika ti ongoraei n te rongorongo ke mairouia raoraora?
N itera raa ae e riai iai te Kristian ni kateimatoa teina i nuka n ana iango ao n ana mwakuri?
E KONA NI KANGAI TEMANNA: “E aera ngkai ko aki tiaruuti nakon te buraeki ke n anenea kunan te aba?”
Ko na kangaa ni kaeka?
KAKIMOTOTOANA
A kakorakoraia n tei i nuka Kristian ni kaineti ma te waaki n tautaeka, n aia iango, n aia taeka, ao n aia mwakuri.
Kauring
Tera ae ti riai n angania tautaeka n aomata?
E aera ngkai ti teimatoa n tei i nuka ni kaineti ma te waaki n tautaeka?
Baikara bwaai aika a kona n kataa teira i nuka?
NORI NABA AIKAI
Baikara bwaai aika ti kona ni kakeaira iai bwa ti aonga teimatoa n tei i nuka?
Tera ae a kona ni karaoia utu bwa a aonga n tauraoi imwaini kataakia ni kaineti ma teia i nuka?
E aera ngkai kamanoan abam bon tiaki te mwakuri ae rine riki?
Noria bwa ko na kangaa n teimatoa n aki arona aroia kaain te aonnaba ngkana ko karaoa am motinnano ibukin am mwakuri ni kareketianti.
“A na Uotii Oin Uotaia Aomata n Tatabemania Nako” (Te Taua-n-Tantani, Eberi 1, 2006)