REIREI 37
Te Bae E Taekinaki n te Baibara Ibukin te Mwakuri ao te Mwane
Ko a tia n taonakinako n te raraoma ibukin te mwakuri ao te mwane? E kona ni kangaanga karekeani kainnanora ao te beku iroun Iehova ma nanora ni kabane. Ti anganaki te taeka n reirei ae manena man te Baibara ae kona ni buokira.
1. Tera ae e taekinaki n te Baibara ibukin te mwakuri?
E tangirira te Atua bwa ti na kukurei n ara mwakuri. E taekinaki n te Baibara bwa “akea te bwai ae raoiroi riki iroun te aomata nakon . . . karekean te kimwareirei n ana mwakuri korakora.” (Te Minita 2:24) E mwakuri korakora Iehova. Ngkana ti kakairi irouna n arora ni mwakuri korakora, ti kakukureia iai ao n namakina te raunnano.
E kakawaki te mwakuri. Ma ti aki riai ni kariaia bwa e na kakawaki riki nakon taromaurian Iehova iroura. (Ioane 6:27) E berita bwa ngkana ti moanibwaia ao e na bon tabeakini kainnanora n te itera n rabwata.
2. Tera arom n iaiangoa te mwane n te aro ae riai?
E ngae ngke e taekinaki n te Baibara bwa “te mwane . . . te bwai ni kamanomano,” ma e kauringira naba bwa e aki kona te mwane n tii ngaia ni kakukureira. (Te Minita 7:12) Ngaia are ti kaungaaki bwa ti na aki bakimwane ma a na ‘rau nanora n ara bwai aika iroura.’ (Wareka Ebera 13:5.) Ngkana e teimatoa n rau nanora ni baika iai iroura, ti a kainaomataaki iai man te bwarannano ae reke n tangiran ae bati riki. Ti aki kona iai n taarau. (Taeka N Rabakau 22:7) Ao ti kamanoaki mani karuanikain te takaakaro n te mwane ao ukeran aanga ni karekemwane aika baitii ma a karuanikai.
3. Ti na kangaa n tituaraoi n ara mwane?
Iehova bon te Atua ae tituaraoi, ao ti kakairi irouna ngkana ti “tituaraoi, ao . . . [n] tauraoi n ibuokanibwai.” (1 Timoteo 6:18) Ti kona n tituaraoi n ara mwane ngkana ti boutokaa te ekaretia ao ni buokiia tabemwaang ake a kainnanoa te ibuobuoki, moarara riki aika raora n te onimaki. E kakawaki riki iroun Iehova bwa bukin tera ngkai ti anga, ao tiaki mwaitin ae ti anga. Ngkana ti tituaraoi n anga mai nanora, ti na boni kukurei ao ni kakukureia naba Iehova.—Wareka Mwakuri 20:35.
REIAKINA AE BATI RIKI
Nori kakabwaia aika kona n reke man iangoan te mwakuri n te aro ae riai ao ngkana a rau nanora.
4. Karinea Iehova man arom ni mwakuri
E riai n rotaki arora n iangoa te mwakuri n ara iraorao ma Iehova. Kaota te TAAMNEI, ao maroroakin titiraki aikai.
Tera ae anaaki iai nanom n te taamnei ni kaineti ma aroaron Jason n ana tabo ni mwakuri?
Tera are e karaoia ae oti iai bwa e iaiangoa te mwakuri n te aro ae riai?
Wareka I-Korote 3:23, 24, ao maroroakina te titiraki aei:
E aera bwa e kakawaki aroarora n ara mwakuri?
E kakawaki te mwakuri. Ma ti aki riai ni kariaia bwa e na kakawaki riki nakon taromaurian Iehova iroura
5. Ti kakabwaiaaki ngkana a rau nanora
A bati aomata aika kataia ni karekea aia mwane ae bati. Ma e kaungaira te Baibara bwa ti na karaoa te bwai ae kaokoro. Wareka 1 Timoteo 6:6-8, ao maroroakina te titiraki aei:
Tera ae kaungaira te Baibara bwa ti na karaoia?
E ngae ngke a karako ara bwai ma ti boni kona ni kukurei. Kaota te TAAMNEI, ao maroroakina te titiraki aei.
E ngae ngke e karako aia mwane utu aikai, ma tera ae karekea kukureia?
Ma tera arora ngkana a bati ara bwai ma ti tangira riki are i aona? E kaikonaka Iesu taekan te karuanikai anne. Wareka Ruka 12:15-21, ao maroroakina te titiraki aei:
Tera reireiam man ana kaikonaki Iesu?—Nora kibuna 15.
Wareka ao kabotaua Taeka N Rabakau 10:22 ma 1 Timoteo 6:10. Ao maroroakin titiraki aikai:
Tera ae kakawaki riki? Karekean ara iraorao ma Iehova ke karekean te mwane ae bati? Bukin tera?
Baikara kangaanga man tangiran te mwane ae bati?
6. E na karekei baika ti kainnanoi Iehova
E kona ni kataaki onimakinan Iehova iroura ngkana a riki ara kangaanga ibukin ara mwakuri ke te mwane. Kaota te TAAMNEI n nora arora ni kaaitarai kataaki akanne, ao maroroakin titiraki aikai.
Baikara kangaanga ake e kaaitarai te tari te mwaane ae n te taamnei?
Tera are e karaoia bwa e na tokanikai n ana kangaanga?
Wareka Mataio 6:25-34, ao maroroakina te titiraki aei:
Tera ae e beritanna Iehova bwa e na karaoia nakoia te koraki ake a moanibwaia?
A TAKU TABEMAN: “I riai ni mwakuri korakora ibukini boutokaan au utu. I a aki kona n taromauri ni katoa wiki.”
Tera te kibu ae ko a kakoauaa iai bwa moanibwaian taromaurian Iehova bon te motinnano ae te kabanea n tamaroa n taai nako?
KAKIMOTOTOANA
Ti kainnanoa te mwakuri ni kareketianti ao te mwane, ma a aki riai ni katabetabeira n ara beku ibukin Iehova.
Kauring
Tera ae kona ni buokiko bwa ko na iaiangoa te mwakuri n te aro ae riai?
Ko kangaa ni kakabwaiaaki ngkana e rau nanom?
Ko na kangaa ni kaotia bwa ko onimakina ana berita Iehova are e na katauraoi bwaai ibukia ana aomata?
NORI NABA AIKAI
Noria bwa e kabuakakaaki te mwane n te Baibara ke e aki.
“E Koaua ae te Mwane Boni Wakaani Baika Bubuaka ni Kabane?” (Te kaongora n jw.org)
Reiakina arora ni kabongana ara mwane n te aro ae kukurei iai te Atua.
“Tera ae E Taekinaki n te Baibara Ibukin te Anganga?” (Te kaongora n jw.org)
Nora te bae kaira te tia takaakaro n te mwane ao te tia iraa, bwa e na bita aroaroni maiuna.
“I Rangi n Tatangira te Kabobirimwaaka Irouia Aoti” (Te Taua-n-Tantani, Nobembwa 1, 2011)