REIREI 38
Kaotia Bwa E Kakawaki Iroum te Bwaintangira ae te Maiu
A bati baika kamimi ao ni kakukurei ni maiura aei. E ngae ngke ti boo ma kangaanga ma bon iai naba baika ti aki toki ni kukurei iai ni maiura aei. Ti na kangaa ni kaotia bwa e kakawaki iroura te bwaintangira ae te maiu? Ao tera bukina ae moan te kakawaki, ngkai ti karaoa anne?
1. E aera ngkai e riai ni kakawaki iroura te maiu?
E riai ni kakawaki iroura te maiu ibukina bwa bon te bwaintangira mairoun Tamara ae tatangira ae Iehova. Boni ngaia “nibwan te maiu” bwa e karikii baika maiu ni kabane. (Taian Areru 36:9) “Boni ngaia ae anga te maiu ma te ikeike ao bwaai ni kabane nakoia aomata nako.” (Mwakuri 17:25, 28) E anganira Iehova baika ti kainnanoi bwa ti aonga n teimatoa ni maiu. Ma ae kakawaki riki, e kateimatoa maiura n te aro ae ti na kukurei naba iai.—Wareka Mwakuri 14:17.
2. Ti na kangaa ni kaotia nakon Iehova bwa e kakawaki iroura te maiu?
Man te tai are ko moani bikoukouaki iai, ao e a bon tabeakiniko naba Iehova. E kangai Tawita, are te tia taromauria te Atua, i aani kairana n te taamnei: “A norai naba matam ngke I a tibwa beru.” (Taian Areru 139:16) E rangi ni kakawaki iroun Iehova maium. (Wareka Mataio 10:29-31.) E na rangi n rawawata ngkana iai ae e kamatea temanna n oin nanona, ke ae e bakabureia.a (Te Otinako 20:13) E na rawawata naba Iehova ngkana ti karuanikaia maiura ke ngkana ti aki taratara raoi ao ni karuanikaia maiuia tabemwaang. Ngkana ti tararuaa raoi maiura ao ni kaota kakawakin naba maiuia tabemwaang, ti a kaotia iai bwa e kakawaki iroura te bwaintangira ae rangi n tamaroa ae te maiu.
REIAKINA AE BATI RIKI
Iangoi aanga tabeua aika ko kona ni kaotia iai bwa e kakawaki iroum te bwaintangira ae te maiu.
3. Tararuaa marurungin rabwatam
A kabanea maiuia ni beku iroun Iehova Kristian aika katabui maiuia. Kioina ngkai a riai Kristian n anga rabwataia bwa te karea ae maiu ae itiaki a bon riai n tararuaia raoi. Wareka I-Rom 12:1, 2, ao maroroakin titiraki aikai:
Tera ae riai ni kairiko bwa ko na tararuaa raoi marurungim?
Baikara aanga tabeua aika ko kona ni karaoi?
4. Taratara raoi bwa ko na aki ikoaki ke ni kabuanibwai maium
E kaungaira te Baibara bwa ti riai n rarawa nakoni mwakuri aika karuanikai. Kaota te TAAMNEI n nori iai bwaai tabeua aika ko kona ni karaoi ibukini kamanoam.
Wareka Taeka N Rabakau 22:3, ao maroroakina arom ma tabemwaang ni kamanoingkami . . .
n te mwenga.
n te tabo ni mwakuri.
n tain te takaakaro.
ni kabutan te bao ni mwamwananga ke ngkana ko toka iai.
5. Karinea maiun te teei ae tuai ni bungiaki
N ana kario teuana Tawita ao e taekina iai Iehova bwa e tabeakina naba maiun ao rikiraken te teei ae tuai ni bungiaki. Wareka Taian Areru 139:13-17, ao maroroakina te titiraki aei:
E moanaki n ningai maiun te aomata n ana taratara Iehova, ngke e moani bikoukouaki, ke ngkana e a bungiaki?
Iai ana tua Iehova ibukia I-Iteraera rimoa, ae a kamanoaki iai tiina ao ataei ake a tuai ni bungiaki. Wareka Te Otinako 21:22, 23, ao maroroakin titiraki aikai:
Tera ana iango Iehova iroun te aomata ae kabuaa maiun te teei ae tuai ni bungiaki n tiaki nanona?
Tera ana namakin ngkana iai ae karaoa anne n oin nanona?b
Tera am namakin n ana iango te Atua?
E kona naba te aine ae e kakawaki te maiu irouna, n namakinna bwa kabwakaan natina bon tii ngaia te rinerine ae kona ni karaoia. Wareka Itaia 41:10, ao maroroakin titiraki aikai:
Ngkana iai te aine ae e kairoroaki bwa e na kabwakaa natina, e na karekea buokana iroun antai? Bukin tera?
A TAKU TABEMAN: “E inaomata te aine ni baireia bwa e na kabwakaa natina ke e na aki, bwa bon rabwatana.”
Tera ae kairiko bwa ko na kakoauaa ae e kakawaki iroun Iehova maiun te tina ao te teei ae tuai ni bungiaki?
KAKIMOTOTOANA
E reireinira te Baibara bwa ti na tangira te bwaintangira ae te maiu, ti na karinea, ao ni kawakinna raoi. E nanonaki iai maiura ao maiuia tabemwaang.
Kauring
Bukin tera bwa e rangi ni kakawaki maiun te aomata iroun Iehova?
Tera ana namakin Iehova ngkana iai temanna ae tiritiri n oin nanona?
Bukin tera ngkai e kakawaki iroum te bwaintangira ae te maiu?
NORI NABA AIKAI
Ti na kangaa ni kaitaua Iehova ibukin te bwaintangira ae te maiu?
Kakaaea kaekaan te titiraki ae, E na kabwaraa ana bure te aine ae e a tia ni kabwakaa natina te Atua?
“Tera Ana Taeka te Baibara Ibukini Kabwakaan te Teei ae Tuai ni Bungiaki?” (Te kaongora n jw.org)
Tera aron te aomata ae e iaiangoa te bakabure? Nora te ibuobuoki man te Baibara.
a E rangi n tabeakinia aomata aika uruaki nanoia Iehova. (Taian Areru 34:18) E ota n rawawataia are e a kairiia bwa a na kani bakabureiia iai, ao e kani buokiia. Noria bwa e na kangaa ni buoka temanna ni kakorakoraa bwa e na rarawa nakon iangoan te bakabure, n te kaongora ae “I Tangiria ni Mate—E Kona te Baibara ni Buokai Ngkana E Roko ae I a Kani Bakabureai?” i aan Nori Naba Aikai n te reirei aei.
b Naake a a tia ni kabwakaa natiia, a aki riai n taonakinako n te raraoma ibukin aia bure, bwa e kona ni kabwarai aia bure Iehova. Ibukin rongorongona riki, nora te kaongora ae “Tera Ana Taeka te Baibara Ibukini Kabwakaan te Teei ae Tuai ni Bungiaki?” i aan Nori Naba Aikai n te reirei aei.