Te Oto Karaki Teuana E Kairiri Nakon Are Teuana Riki
E KOREA ae kangai te abotoro Bauro nakoia Kristian ake a maiu n raabanen te moan tienture C.E.: “Tarataraingkami.” Tera are e kauringia bwa a na tarataraiia mai iai? “Ba e kawa temanna ni kuringkami n ana ataibwai ma mamanan te aba i rouna ae akea uana, n ai aron aia taeka nikawai aomata.”—I-Korote 2:8.
Iai Kristian tabeman i nukan te kauoua n tienture C.E., ake a aki tabe ma ana kauring Bauro, ma a a moanna ni kamanenai iango ake a karioaki irouia taani korei karaki ni kewe rimoa, ibukini kabwarabwaraan aia koaua. Bukin tera? A tangiria bwa a na butimwaeaki irouia aomata n te Embwaea n Rom aika bubura aia reirei ao anne bukina ae a a bati riki iai aomata ake a rairaki nakoia.
Temanna mai buakoia Kristian akanne ae rangi ni kinaaki bon Justin Martyr, are e kakoauaa bwa e a kamani kaoti Ana Tia Taetae te Atua nakoia taani korei karaki ni kewe mai Kuriiti, imwain rokon Iesu. Ni kaineti ma ana iango Justin ao taan reirei ake a boraoi naba ma te iango aei, a taku bwa e a katoki kainnanoia aomata nako karinani karioiango ao oto karaki aikai n te Aro ni Kristian.
E rikirake ni korakora mwaitini kaain ana Aro ni Kristian Justin Martyr. Ma te kakairi n te oto karaki teuana e kairiri nakon oto karaki tabeua riki ao e a reke iai te bwai ae e a taabangaki ngkai kakoauaana bwa aia reirei Kristian. Ni kaotaraean oto karaki aikai, kabotaui ngkanne baika a taekinaki ni booki tabeua aika a na taekinaki imwina ma ana reirei ni koaua te Baibara.
[Picture Credit Line n iteraniba 3]
Devil: Barrators—Giampolo/The Doré Illustrations For Dante’s Divine Comedy/Dover Publications Inc.; angels: Art Resource, NY; trinity relief: Museo Bardini, Florence