Tii Tenanaina Ao Tii Temanna Te Tia Kawakintiibu

“Ngkami aika kam irirai, kam na tekateka naba i aoni kaintokanuea aika tebwi ma uoua, ni motiki taekaia barongan Iteraera aika tengauni ma uabaronga.”​—MATAIO 19:28.

1. Tera aron reitakin Iehova ma kanoan Aberaam, ao bukin tera bwa tiaki nanona bwa e a tinanikuia raoi botannaomata ake tabeua?

E TANGIRA Aberaam Iehova, ngaia are E kaotiota naba ana tangira ae teimatoa nakoia kanoan Aberaam. I nanon te tai ae raka i aon 15 te tienture, e iangoa te botannaomata ae Iteraera Iehova are kanoan Aberaam bwa ana aomata ae rineia ae “bon ana botanaomata.” (Wareka Te Tua-Kaua 7:6, BG.) E nanonaki n anne bwa Iehova e tinanikui raoi botannaomata ake tabeua? E aki. N taai akanne, a kariaiakaki aomata aika tiaki I-Iteraera ake a kan taromauria Iehova ni kanimwia ma ana botannaomata ae kaokoro. A iangoaki aomata aika rairaki aikai, ke aomata ake a rairaki man te Aro n Iutaia bwa kaain naba te botannaomata aei. A na taraaki bwa bon taari naba ngaiia. (Nakoaia Ibonga 19:33, 34) Ao a riai naba n ongeaba nakon ana tua nako Iehova.​—Nakoaia Ibonga 24:22.

2. Tera ana taeka Iesu ae kakubanako ao baikara titiraki aika ueke mai iai?

² Ma e anga ana taeka ae kakubanako Iesu nakoia I-Iutaia ake n ana tai ae kangai: “E na anaaki mairoumi ana tautaeka n uea te Atua, ao e na anganaki te natannaomata are e karikii uaana.” (Mataio 21:43) Antai kaain te botannaomata ae boou aei ao ti kanga n rotaki n te bitaki aei ni boong aikai?

Te Botannaomata ae Boou

3, 4. (a) E kanga te abotoro Betero ni kabwarabwaraa te botannaomata ae boou aei? (b) Antai kaain te botannaomata ae boou aei?

³ E kabwarabwaraa raoi te abotoro Betero taekan te botannaomata ae boou aei. E korea ae kangai nakoia raona ni Kristian: “Bon ‘te reeti n aomata ngkami aika kam rineaki, te koraki n ibonga aika ueea, te botannaomata ae itiaki, te koraki ake ana bwai te Atua, bwa kam na kabutaanako taekan raoiroin aroaron’ teuare weteingkami man te roo nakon ana oota ae kamimi.” (1 Betero 2:9) N aron are e a kaman taekinaki, a moani kaaina te botannaomata ae boou anne I-Iutaia ake a butimwaea Iesu bwa te Mesia. (Taniera 9:27a; Mataio 10:6) Rimwi riki, a bati aika tiaki I-Iteraera ake a kaaina te botannaomata aei, n aron are e kangai Betero: “Bon tiaki ana botannaomata te Atua ngkami ngkoa, ma ngkai ai bon ana botannaomata.”​—1 Betero 2:10.

⁴ E taetae nakon antai Betero ikai? E taekina ae kangai ni moan ana reta: “Ti a manga bungiaki [mairoun te Atua] nakon te kantaninga ae nene, rinanoni mangautin Iesu Kristo man te mate, nakon te tibwanga ae aki kona ni mka, ni baareka, ke ni mane. E kawakinaki i karawa ibukimi.” (1 Betero 1:3, 4) Ngaia are te botannaomata ae boou aei e kaainaki irouia Kristian aika kabiraki ake a kantaningaa te nako karawa. Bon “ana Iteraera te Atua.” (I-Karatia 6:16) E noria te abotoro Ioane n te miitara bwa 144,000 mwaitiia kaain te I-Iteraera n taamnei aei. A “kabooaki naakai mai buakoia aomata bwa moan uaa nakon te Atua ao nakon te Tiibutetei,” bwa a na beku bwa “ibonga” ao a na “tautaeka ma [Iesu] bwa ueea i nanon ririki ake tenga n ririki.”​—Te Kaotioti 5:10; 7:4; 14:1, 4; 20:6; Iakobo 1:18.

Iai Riki Aika A Raonia Taani Kabiraki?

5. (a) E kaineti nakoia antai te taeka ae “ana Iteraera te Atua? (b) Bukin tera ngkai e aki onoti n taai nako nanon te taeka ae “Iteraera”?

⁵ E mataata raoi ngkanne bwa te taeka are n I-Karatia 6:16 ae “ana Iteraera te Atua,” e nanonaki iai tii Kristian aika kabiraki. Ma iai riki taai ake e kabongana iai te botannaomata ae Iteraera Iehova bwa te banna ke te kaikonaki ae nanonia iai Kristian tabeman aika tiaki taani kabiraki? E kona ni kaekaaki anne n ana taeka Iesu aikai nakoia ana abotoro aika kakaonimaki: “I karaoa te berita ma ngkami ibukin te tautaeka n uea, n ai aron Tamau ni karaoa te berita ma ngai, bwa kam na amwarake ma ni moi n au taibora n au tautaeka n uea, ao n tekateka i aoni kaintokanuea ni motiki taekaia barongan Iteraera ake tengauni ma uabaronga.” (Ruka 22:28-​30) E na karaoaki aei n te tai are a a manga “kaboouaki bwaai” iai ke n taini manga karaoani bwaai ae n tain Ana Tautaeka Kristo ae Manna Tenga te Ririki.​—Wareka Mataio 19:28.

6, 7. E kaineti nakoia antai te taeka ae “barongan Iteraera aika tengauni ma uabaronga” n te rongorongo are ni Mataio 19:28 ao n Ruka 22:30?

⁶ A na beku te koraki ake 144,000 bwa ueea i karawa, ibonga ao taani motikitaeka n te Tautaeka ae Maanna Tenga te Ririki. (Te Kaotioti 20:4) Antai aika a na motiki taekaia ao n tautaekania? Ni Mataio 19:28 ao Ruka 22:30, ti tuangaki iai bwa a na motiki taekaia “barongan Iteraera aika tengauni ma uabaronga.” Antai ngkanne aika tei ibukini “barongan Iteraera aika tengauni ma uabaronga” n te rongorongo aei? A tei ibukia aomata ake a kantaningaa te maiu i aon te aba ake a onimakina ana karea Iesu ma tiaki kaain te koraki n uea ao n ibonga aei. (E aki warekaki te baronga are Rewi ngke a karinanaki barongan Iteraera ake 12.) Te koraki ake a nanonaki ni barongan Iteraera ake 12 n te rongorongo aei, bon naake a na karekei kakabwaia n taamnei ngkana a beku bwa ibonga te koraki ake 144,000. Bon ana aomata naba te Atua te koraki aika tiaki ibonga aikai aika kakabwaiaaki, ao e tangiriia ao n akoiia. A bon tau ni kabotauaki ma ana aomata ake n taai ake rimoa.

⁷ E tonu raoi ngkanne, bwa imwin noraia te koraki ake 144,000 aika te Iteraera n taamnei iroun te abotoro Ioane bwa a kanikinaeaki n aki toki imwain te rawawata ae korakora, e noriia naba te “koraki ae uanao” ae a aki kona ni warekaki ake a “nako mai buakoia botannaomata” nako. (Te Kaotioti 7:9) Aikai ake a na otinako man te rawawata ae korakora ao n rin n Ana Tautaeka Kristo ae Maanna Tenga te Ririki. Ikanne are a na raonaki iai irouia birion ma birion aika kautaki. (Ioane 5:28, 29; Te Kaotioti 20:13) Aikai ni kabane ake a na kaaini “barongan Iteraera aika tengauni ma uabaronga” n te aro ni kaikonaki, ake a na motikaki taekaia iroun Iesu ma raona n tautaeka ake 144,000.​—Mwakuri 17:31; 24:15; Te Kaotioti 20:12.

8. A kanga baike a riki n te Bong ni Kabwarabure ni katoa ririki n riki bwa bannan reitakia te koraki ake 144,000 ma nikiraia aomata nako?

⁸ E a kamani kaotaki bannan te reitaki i marenaia te koraki ake 144,000 ao nikiraia aomata nako ni baike a riki n te Bong ni Kabwarabure are kakaraoaki ni katoa ririki. (Nakoaia Ibonga 16:6-10, BG) E riai moa te ibonga ae rietata n anga te kao mwaane bwa te karea ibukini “kabaran ana bure, ma aia bure ana utu.” Ngkanne, e kaineti moa ana karea Iesu nakoia kaain ana auti ake ibonga ake a mwakuri i aana, ake a na beku ma ngaia i karawa. N te Bong ni Kabwarabure, a katauraoaki naba uoman kooti ibukin aia bure I-Iteraera ake tabeman riki. N te tai aei, e tei te baronga n ibonga ibukia te koraki ake 144,000, ao nikiraia I-Iteraera a tei ibukia aomata nako ake a kantaningaa te maiu i aon te aba. E kaotaki n te kabotau aei bwa te taeka ae “barongan Iteraera aika tengauni ma uabaronga” ae ni Mataio 19:28, a aki nanonaki iai ana ibonga Iesu aika natinaki iroun te taamnei ma bon taekaia aomata nako ake a onimakina ana karea Iesu.a

9. A tei ibukia antai ibonga ake n te miitara ibukin te tembora are e oti nakon Etekiera, ao a tei ibukia antai I-Iteraera ake tiaki ibonga?

⁹ Iangoa te katoto teuana riki. E anganaki te miitara ae abwabwaki te burabeti are Etekiera ae taekan ana tembora Iehova. (Etekiera, mwakoro 40-48) N te miitara anne, e mwakuri te ibonga n te tembora ni katauraoi kaetieti ao ni butimwaea ana reirei Iehova ma kaetakina. (Etekiera 44:23-31) N te miitara naba anne, a roko kaaini baronga aika kakaokoro n taromauri ao n anga taiani karea. (Etekiera 45:16, 17) Ngkanne n te rongorongo aei, a tei ibonga ibukia taani kabiraki, ao I-Iteraera ake tiaki kaain te baronga n ibonga a tei ibukia aomata ake a kantaningaa te maiu i aon te aba. E kateretereaki n te miitara aei bwa iai uakoraki te botannaomata ake a uaia ni boonnano ni mwakuri ma te koraki n ibonga ake a kaira te taromauri ae itiaki.

10, 11. (a) Tera kakoroan nanon ana taeka Iesu ae ti a tia n noria are e a kakorakoraa te onimaki? (b) Tera te titiraki ibukia tiibu tabemwaang?

¹⁰ E taekinia naba “tiibu tabemwaang” Iesu ake a kaokoro ‘nneia’ ma te “nanai ae uarereke” aika taan rimwina aika kabiraki. (Ioane 10:16; Ruka 12:32) E taku: “E riai bwa N na kairiia naba, ao a na ongo bwanaau, ao a na riki bwa tii tenanaina, ao tii temanna te tia kawakintiibu.” Ai boni kakorakorakira te onimaki n norakin kakoroan nanon taeka aikai! A a tia ni botaki aomata aika uakoraki aikai, ae taekaia taani kabiraki aika karako mwaitiia ao te koraki ae uanao aika tiibu tabemwaang. (Wareka Tekaria 8:23.) E ngae ngke a aki beku n te aro ni kaikonaki tiibu tabemwaang i nanon oon te tembora n taamnei, ma a boni beku i tinanikun oon te tembora.

¹¹ Ma ngkana e kabonganaia I-Iteraera rimoa aika tiaki ibonga Iehova n taai tabetai ni kaikonakiia iai tiibu tabemwaang aika ngkai, a riai naba ni katoong banna ni Kauring te koraki ake a kantaningaa te maiu i aon te aba? Ti nang rinanoni kaekaan te titiraki aei ngkai.

Te Berita ae Boou

12. Tera te babaire ae boou are e a kaman taekinna Iehova?

¹² E a kaman taekina te babaire ae boou Iehova nakoia ana aomata ngke e kangai: “Aio te berita ae N na karaoia ma te bata are Iteraera i mwini boong akekei. . . . N na karina au tua i nanoia, ao N na koroia i nanoia; ao N na riki ba Atuaia, ao ngaiia a na riki ba au aomata.” (Ieremia 31:31-33, BG) Bon rinanon te berita ae boou aei, are e na kona iai ni mimitong ao n teimatoa kakoroan nanon ana berita Iehova nakon Aberaam.​—Wareka Karikani Bwaai 22:18.

13, 14. (a) Antai kaain te berita ae boou? (b) Antai aika kakabwaiaaki iai ao n te aro raa ae a “tautaua bukin” te berita ae boou aei?

¹³ E taekina te berita ae boou aei Iesu n te tairiki are imwaini matena ngke e kangai: “E tei te mwangko aei ibukin te berita ae boou ae aanaki n raraau ae e na kawawaeaki ibukimi.” (Ruka 22:20; 1 I-Korinto 11:25) A nanonaki naba Kristian ni kabane n te berita ae boou aei? A aki. A kaaina te berita ae booub aei tabeman aika ai aroia abotoro ake a moi n te mwangko anne n te tairiki arei. E karaoa te berita riki teuana Iesu ma ngaiia bwa a na uaia n tautaeka n ana Tautaeka n Uea. (Ruka 22:28-30) A na uaia n ibuokanibwai ma Iesu n ana Tautaeka n Uea.​—Ruka 22:15, 16.

¹⁴ Tera aroia ake a na maeka i aon te aba i aan ana Tautaeka n Uea? A boni kakabwaiaaki naba man te berita ae boou aei. (I-Karatia 3:8, 9) E ngae ngke a aki kaainna ma a bon “tautaua bukin” te berita aei n aroia n aantaeka nakon ana kaetieti n aron are e a kaman taekinia te burabeti are Itaia ni kangai: “Ianena, aika nimta Iehova, ba a na toro i Rouna, ma n tangira aran Iehova, ma n riki ba ana toro, ao aomata aika kakawakina te tabati n aki kamatauninga, ma n tautaua bukin au berita, ni kabaneia; N na boni kairiia nakon au maunga ae tabu, ao N na kakukureiia i nanoni maneabau n tataro.” E a manga taku Iehova: “E na atongaki maneabau ba te maneaba n tataro ae neia botanaomata ni kabaneia.”​—Itaia 56:6, 7, BG.

Antai Aika A Riai ni Katoong Banna ni Kauring?

15, 16. (a) Tera are e kairekerekea te abotoro Bauro ma te berita ae boou aei? (b) Bukin tera bwa a aki riai ni katoong banna ni Kauring te koraki ake a kantaningaa te maiu i aon te aba?

¹⁵ A a tia te koraki ake n te berita ae boou aei n “ninikoria . . . ni kabongana te kawai n rin nakon te Ruu ae Moan te Tabu.” (Wareka Ebera 10:15-20.) Aikai te koraki ake a na “karekea te tautaeka n uea are e aki kona ni kamwaeieieaki.” (Ebera 12:28) Ngaia are bon tii aika a na uea ao n ibonga ma Iesu Kristo i karawa ake a na moi man te “mwangko” are e tei ibukin te berita ae boou. Kaain te berita ae boou aei bon ake a a tia ni beritanaki bwa a na mareaki ma te Tiibutetei. (2 I-Korinto 11:2; Te Kaotioti 21:2, 9) Ma a riki bwa taani mataku aika karinerine aomata nako aika a aki katoong banna, ake a kaea te Kauring ae katoa ririki karaoana.

¹⁶ E buokira Bauro n ota bwa te koraki ake a kantaningaa te maeka i aon te aba a bon aki katoong banna ni Kauring. E taekina ae kangai nakoia Kristian aika kabiraki: “Bwa ni katoatai are kam kana iai te bwerena aei ao ni moi n te mwangko aei, ao kam kaotiota iai maten te Uea, ni karokoa rokona.” (1 I-Korinto 11:26) E na ‘roko’ n ningai te Uea? N te tai are e roko iai n anaa te kabanea ni kabiraki nakoni mwengaia ae karawa, ae raoia te koraki ake a na riki bwa buuna. (Ioane 14:2, 3) E mataata ngkanne bwa irirakin Ana Katairiki te Uea ni katoa ririki, e na aki teimatoa nako waakinana. A na teimatoa “nikiraia” ana kariki te aine aika mena i aon te aba ni katoong banna aikai ni karokoa rekeni kaniwangaia i karawa. (Te Kaotioti 12:17) Ngkana ngaia bwa a katauaki naba ni katoong banna aikai te koraki ake a na maeka i aon te aba n aki toki, ngkanne e na teimatoa naba n aki toki te katairiki ae karaoaki iai te Kauring aei.

“A na Riki Bwa Au Aomata”

17, 18. E kanga ni kakororaoaki nanon te taetae ni burabeti are n Etekiera 37:26, 27?

¹⁷ E a kaman taekina katiteuanaakia ana aomata Iehova n taeka aikai: “N na karaoa te berita n raoi ma ngaiia: e na riki ba te berita ae akea tokina i rouia: ao N na kamaekaia, ma ni kabatiaia, ma ni kamena maneabau ae tabu i buakoia n aki toki. Ao e na memena naba umau i rouia; ao N na riki ba Atuaia, ao ngaiia a na riki ba au aomata.”​—Etekiera 37:26, 27, BG.

¹⁸ A bane ana aomata te Atua ni kakabwaiaaki mani kakoroan nanon te berita ae rangi n tamaroa aei, ae beritanakin te rau irouia Kristian. Eng, e a tia Iehova ni beritana te rau nakoia ana toro nako aika ongeaba. E teretere raoi uaan taamneina i buakoia. E a tei i buakoia umwana ae kaikonakaki ikai bwa aia taromauri Kristian ae itiaki. A a riki raoi bwa ana aomata ngkai a a tia ni kaaki waaki n taromauri boua ao ni karika Iehova bwa tii Atuaia ae a taromauria.

19, 20. Antai aika a nanonaki naba i buakoia aomata ake e atongia Iehova bwa “ana aomata” ao tera are e a kakoroaki bukina n te berita ae boou aei?

¹⁹ Ai boni kakimwareireira te riki bwa taani kakoauaa te katiteuanaaki aei i marenaia aomata aika uakoraki n ara tai aikai! E ngae ngke e aki reke irouia te koraki ae uanao ae tabe n rikirake mwaitiia kantaningaan te nako karawa, ma a rangi ni kakatonga ngkai a a riki bwa raoraoia taan nako karawa. A a tia ni kanimwia ma ana Iteraera te Atua. Ni karaoan aei, a mena iai i buakoia te koraki ake e arania Iehova bwa “ana aomata.” Ti a nora kakoroani bukin te taetae ni burabeti aei irouia ae kangai: “A na nim ma Iehova botanaomata aika bati n te bong arei, ao a na riki ba ana aomata: ao E na mamaeka i buakom.”​—Tekaria 2:11; 8:21, BG; Wareka Itaia 65:22, BG; Te Kaotioti 21:3, 4.

²⁰ E a tia Iehova ni kakoroi bukini baikai ni kabane rinanon te berita ae boou aei. Mirion ma mirion aomata aika ianena ni bwaai n taamnei ake a a tia n riki ngkai bwa ana botannaomata Iehova ae tangiraki irouna. (Mika 4:1-5) A motinnanoia bwa a na teimatoa n tautaua bukin te berita aei n aroia ni butimwaei baike a katauraoaki iai ao n ongeaba nakoni kaetietina. (Itaia 56:6, 7) Ni karaoan aei, a a karekei iai kakabwaia aika rangi ni bati ae te rau ae teimatoa ma ana Iteraera te Atua. Ko bia rinanon anne ngkai ao n aki totoki!

[Kabwarabwara ae nano]

Ko Uringnga?

• Antai “barongan Iteraera aika tengauni ma uabaronga” ake a na motikaki taekaia irouia te koraki ake 144,000?

• Tera aron aia iraorao te koraki aika kabiraki ao tiibu tabemwaang ni kaineti ma te berita ae boou?

• A riai Kristian ni kabane ni katoong banna ni Kauring?

• Tera te katiteuanaaki are e a kaman taekinaki ibukin ara bong aikai?

[Graph/Taamnei n iteraniba 29]

(Ibukini bitakin taeka, nori booki)

A bati aika a beku ngkai ma kaain Ana Iteraera te Atua

7,313,173

4,017,213

1,483,430

373,430

1950 1970 1990 2009