Aberaam Te Mwaane Ae Nanorinano

E tekateka Aberaam i aan nuun ana umwanrianna n tain te kabuebue ae korakora n te ngaina. Ngke e tabe n tarataraa te tabo are maeka iai ao e a noriia naba mwaane aika teniman aika a kawara te tabo are e mena iai.a E aki tabwara ma e a biri naba nakoia ni kaumakia bwa a na motirawa teutana, ao ni katoong baike e na karekei ibukia. E angania “te maibi ni berena” ma e a manga baireia bwa a na anganaki mwaane akanne amwarake aika kakaokoro n aron te bwerena ae e a tibwa mwai, te bwata, te miriki ao te irikomaiu ae rangi n raoiroi ma ni maraurau. E aki tii kaotiota te akoi ae rianako Aberaam ni katauraoan te amwarake nakoia ana iruwa, ma bon te nanorinano naba ni koaua n aron ae ti nang noria.—Karikani Bwaai 18:1-8, BG.

TERA TE NANORINANO? Te nanorinano bon te aki nanorieta ke te aki kainikatonga. E iangoiia aomata ni kabane te aomata ae nanorinano bwa a kakawaki riki nakoina n aanga nako. (I-Biribi 2:3) E butimwaei aia iango tabemwaang, ao e tatauraoi ni karaoi mwakuri aika mangori ibukia.

E KANGA ABERAAM NI KAOTIOTA TE NANORINANO? E kukurei Aberaam ni beku ibukia tabemwaang. N aron are e taekinaki mai imwaina, e bon aki tabwarabwara Aberaam ni karekei baika a kainnanoi iruwa ake teniman akekei, ngke e moan noriia. E waekoa naba ni katauraoa te amwarake buuna are Tara. Ma noria bwa antai ae karaoi angiini mwakuri: E biri Aberaam ni butimwaeia iruwa, e tuangia bwa a na katoonga te amwarake teutana, e nakon ana nanai ao e rinea te man ae e na tiringnga, ao e angania iruwa akekei te amwarake. N oneani mwin are e na bane n angania ana toro baika a na karaoaki, e boni biririmoa ni karaoi mwakuri aika mangori aikai te mwaane ae nanorinano aei. E aki naba iangoia bwa e rabakau riki ni karaoi baikanne ibukia tabemwaang.

E kakauongo Aberaam nakon aia iango te koraki ake a mena i aan ana kairiri. E karako rongorongon aroia ni mamaroro i marenaia Aberaam ma Tara n te Baibara. Ma uoua te tai are ti wareka iai taekan Aberaam ni butimwaea ana iango Tara, ao ni karaoa nanona. (Karikani Bwaai 16:2; 21:8-14, BG) Teuana mai buakoni baika a riki akanne, e boni “bati n rawawata nanon Aberaam” ngke e moan ongo ana iango Tara. Ma ngke e taetae Iehova nakon Aberaam, e kaotia bwa e raoiroi ana iango Tara ngaia are e a kananorinanoa n nanoraoi teuaei ao ni karaoa nanona.

BAIKARA REIREIARA MAI IAI? Ti na boni kukurei ni beku ibukia tabemwaang ni bwainan te nanorinano ni koaua. Ti na kukurei naba ni karaoi bwaai ni kabane aika ti kona ni karaoi bwa a aonga ni mwengaraoi.

Ti kona naba ni kaotiota te nanorinano ni butimwaei aia iango tabemwaang. Tao ti wanawana riki ngkana ti kariaia aia iango tabemwaang, n oneani mwin are ti na aki butimwaea te iango teuana tii ibukina ngkai tiaki ara iango. (Taeka N Rabakau 15:22) A kakabwaiaaki riki te koraki ake a kairiri ngkana a tauraoi ni butimwaei aia iango tabemwaang. E taku temanna te mataniwi ae mwaatai ae John: “I a tia ni kakoauaa bwa e angania aomata inaomataia ni kaotii aia iango te mataniwi ae raoiroi.” E a manga taku riki: “E kainnanoaki bwainan te nanorinano bwa ko kona n ataia ae tao iai ana anga temanna, ae mena i aan am kairiri ni karaoi bwaai n te aro ae raoiroi riki. Mangaia are akea te aomata temanna ke te mataniwi n tii ngaia ae a raraoi ana iango.”

Ngkana ti katotonga Aberaam ni kakauongo nakon aia iango tabemwaang ao ni karaoi mwakuri aika mangori ibukia, ti a karekea iai akoara iroun Iehova. Ni koauana, “e kaaitaraia akana kainikatonga te Atua, ma e anga te akoi ae rianako nakoia akana nanorinano.”—1 Betero 5:5.

[Kabwarabwara mai nano]