Aberaam Te Mwaane Ae Tatangira

E rangi n taonaki n te nanokawaki ae korakora Aberaam. E a bon tia ni mate buuna are Tara. E korakora ururingani maiuia ni kukukurei ngke e bwaeta nanona ni kaboo nakoina. E bon tang naba ngke e rikirake rawawatana. (Karikani Bwaai 23:1, 2) Bon tiaki kanikinaean te mamaara ke te maama bwakan rannimatan Aberaam, ma boni kakoauaan teuana mai buakon aroarona ae moan te raoiroi are ana tangira.

TERA TE TANGIRA? Te tangira bon te namakin ae kaan te reitaki iai ma te aomata ke korakoran tangirana. E kaota ana namakin ibukia te koraki ake e tangiriia te aomata ae tatangira n ana mwakuri, ao ni karaoan anne e a bon anga ngaia.

E KANGA ABERAAM NI KAOTIOTA TE TANGIRA? E kaotia Aberaam bwa e tangiriia ana utu. Akea te nanououa bwa Aberaam bon te mwaane ae rangi n tatabetabe. Ma e ngae n anne, e rangi ni mutiakin nanoia kaain ana utu ke kainnanoia ni kaineti ma te onimaki. Ni koauana, e ataia Iehova bwa Aberaam bon atun te utu are e kairiri nakon te taromauri. (Karikani Bwaai 18:19) Ma te bwai ae kakawaki riki bwa Iehova e kaota taekan ana tangira Aberaam. Ni kataetaean Aberaam, E a taekina iai Itaaka bwa ‘natina ae e tangiria.’—Karikani Bwaai 22:2, BG.

Ti kona ni kakoauaa ana tangira Aberaam n aron rotakina ni mateni buuna ae tangiria ae Tara. E tanginiweneia buuna Aberaam. E ngae ngke bon te mwaane ao e korakora, ma e aki maamaa ni kaota rawawatana. E kaotiota te korakora Aberaam ao te nimamannei naba.

E kaotia Aberaam bwa e tangira Atuana. E kaotiota te tangira anne ni maiuna ni kabane. N te aro raa? Ti kona ni kauringaki n te baere e taekinaki n te Baibara n 1 Ioane 5:3 ae kangai: “Bon aei tangiran te Atua, ae ti na kakairi n ana tua.” Ni kaineti ma te kabwarabwara anne, bon te banna ni katoto ae rianako aroaron Aberaam ibukin tangiran te Atua.

E ongeaba n taai nako Aberaam n te baere e tuangaki iroun Iehova ngkekei naba. (Karikani Bwaai 12:4; 17:22, 23; 21:12-14; 22:1-3) E aki ongea rawawatan ke bebeten te ongeaba Aberaam nakon te baere e tuangaki, ao e aki naba nanokawaki ngkana e ataa bukin tuangakina iroun Iehova. E aki ongei naba mwini karaoani baikanne. E kukurei ni karaoa te baere e tangiria te Atua. E iangoi baike e tuangaki Aberaam bwa te anga are e kaotiota iai tangiran Iehova.

BAIKARA REIREIARA MAI IAI? Ti kona ni katotonga Aberaam ni kaotiota te reitaki ae kaan ma tabemwaang, ao ai moarara riki kaain ara utu. Ti na aki kariaia taiani kangaanga ni maiura bwa a na karibwaa ara tai ibukia te koraki ake ti tangiriia.

Ti riai naba ni karikirakea tangiran Iehova i nanora. E kona ni kakorakoraaki te aeka n tangira anne ni maiura. N te katoto, e kona ni kaungaira bwa ti na bitii anuara, ara taetae ni kawai ao aroarora ni maeka n te aro ae kakukureia te Atua.—1 Betero 1:14-16.

Ni koauana, e aki bebete n taai nako te ongeaba n ana tua nako Iehova. Ma ti kona ni kakoauaa bwa Teuare e buoka Aberaam bon Teuare e atongnga bwa ‘raoraona,’ ao e na boutokaira naba. (Itaia 41:8, BK) E beritanaki n te Baibara ana Taeka ae kangai: “E na kateimatoaingkami ma ni kakorakoraingkami.” (1 Betero 5:10) Ai karaunanora te berita ae mairoun Raoraon Aberaam ae onimakinaki!

[Bwaoki n iteraniba 10]

E Koaua Bwa E Mamaara te Mwaane Ngkana E Tang?

A a bati aika a kakoauaa anne. Tao a na rangi ni mimi nakanne n ataakin ae Aberaam, bon temanna mai buakoia mwaane ake a rangi ni korakora ma ni kakaonimaki ake a taekinaki n te Baibara, bwa a tang n taai ake a rawawata iai. Tabeman mai buakoia nakanne bon Ioteba, Tawita, te abotoro Betero, unimwaane n te ekaretia i Ebeto ao ai Iesu. (Karikani Bwaai 50:1; 2 Tamuera 18:33; Ruka 22:61, 62; Ioane 11:35; Mwakuri 20:36-38) E teretere ngkanne bwa tiaki te reirei man te Baibara are e mamaara te mwaane ngkana e tang.