E Kona Ni Kakukurei Te Mwenga Ae Kaokoro Aia Aaro Kaaina

‘Ko na kanga n ataia bwa ko na kamaiua buum?’—1 I-KORINTO 7:16.

KO KONA NI KAKAAEI KAEKAAIA?

Tera ae a kona ni karaoia kaain te onimaki ni karikirakea iai te rau n te mwenga ae kaokoro aia Aaro kaaina?

E na kanga te Kristian ni buokiia kaain ana utu aika tiaki kaain te onimaki bwa a na butimwaea te taromauri ae koaua?

Tera ae a kona ni karaoia tabemwaang ni buokiia raoia n te onimaki ake a maeka ni mwenga aika kaokoro aia Aaro kaaina?

1. Tera rotakin te utu ni butimwaean rongorongon te Tautaeka n Uea?

N TE TAI teuana ngke e kanakoia ana abotoro Iesu ao e taku: “Kam na nako ao kam na uarongorongo ni kangai: ‘E a kaan te tautaeka n uea ae bwaini karawa.’” (Mataio 10:1, 7) E na karekea te rau ao te kukurei te rongorongo ae raoiroi aei nakoia ake a butimwaeia ma te kakaitau ni koaua. Ma e kauringia ana abotoro Iesu bwa a na bati aika a na kaitaraa aia mwakuri n uarongorongo ibukin te Tautaeka n Uea. (Mataio 10:16-23) E kona n riki te kakaaitara ae te kabanea ni karawawata, ngkana a rawa kaain te utu nakon rongorongon te Tautaeka n Uea.—Wareka Mataio 10:34-36.

2. E aera ngkai a kona ni kukurei Kristian aika maeka ni mwenga aika kaokoro aia Aaro kaaina?

² E nanonaki n aei bwa e aki kona n reke te kukurei irouia taan rimwini Kristo ake a maeka ni mwenga aika kaokoro aia Aaro kaaina? Tiaki ngaia anne! E ngae ngke e kona n rangi ni korakora te kakaaitara n tabetai, ma e aki riiriki anne n taai nako. E bae naba n aki teimatoa te kakaaitara n te utu. Ma e boto riki reken te kukurei irouia kaain te onimaki, i aon aroia nakoni kaitaraaia ke te aki bwerengaki. Irarikin anne, e kakabwaiaia te koraki ake a kakaonimaki nakoina Iehova, n arona n angania te kimwareirei n aki ongei kangaanga aika riki. A kona kaain te onimaki ni kabatiaa riki kimwareireia (1) rinanon aia kakorakora ni karikirakea te rau ni mwengaia ao (2) rinanon aia kekeiaki ni koaua ni buokiia kaain aia utu aika tiaki kaain te onimaki, bwa a na butimwaea te taromauri ae koaua.

KARIKIRAKEA TE RAU N TE MWENGA

3. E aera ngkai e riai ni karikirakea te rau te Kristian ae maeka n te mwenga ae kaokoro aia Aaro kaaina?

³ E rangi ni kakawaki te rau n te mwenga bwa e aonga ni karikiuaa koraan te raoiroi n te utu. (Wareka Iakobo 3:18.) E riai ni kakorakoraa te Kristian ni karikirakea te rau ni mwengana, e ngae naba ngkana a tuai ni katiteuanaaki kaaina n te taromauri ae itiaki. E na kanga ni karaoaki aei?

4. A na kanga Kristian ni kateimatoa te rau i nanoia?

⁴ A riai Kristian ni kateimatoa te rau i nanoia. E kainnanoaki iai te tataro ae nako man te nano, ae kona n anganira “te rau are mairoun te Atua,” ae akea kabotauana. (I-Biribi 4:6, 7) E reke te kukurei ao te rau imwini karekean ataakin Iehova ao maiuakinani booto n reirei man te Baibara. (Itaia 54:13) E rangi ni kakawaki te anga kaeka ni bobotaki n te ekaretia ao te ingaingannano n te mwakuri ni minita, ngkana ti kani karekea te rau ao te kukurei. A kona n uataboaki mwakuri ni Kristian n aanga tabeua irouia kaain te onimaki, aika maeka ni mwenga aika kaokoro aia Aaro kaaina. N te katoto, iangoa Enza,a ae e rangi n iowawa buuna ni kakaitaraa. E uataboa te mwakuri ni karekeia taan rimwini Kristo neiei imwini banen ana mwakuri ni mwengana. E taku Enza: “E kakabwaiaai Iehova ni baika raraoi ni katoai taai ake I kakorakoraai iai n tibwaa te rongorongo ae raoiroi nakoia tabemwaang.” A boni karekea te rau, te raunnano, ao te kukurei, kakabwaia aikai.

5. Tera te kangaanga ae a aitara ma ngaai n angiin te tai kaain te onimaki ni mwenga aika kaokoro aia Aaro kaaina, ao tera te ibuobuoki ae tauraoi?

⁵ Ti riai ni kakorakoraira ni karikirakea te reitaki ae rau ma kaain ara utu aika tiaki kaain te onimaki. E bae ni kangaanga karaoan aei, bwa n tabetai a kona ni kauntaba ma booto n reirei man te Baibara baike a tangirira bwa ti na karaoi. A kona n un kaain ara utu tabeman aika tiaki kaain te onimaki ni maiuakinan booto n reirei aika eti iroura, ma n tokina e na reke te rau. Ni koauana, e kona n riki te bobuaka n iango ae akea riaina, man te aki nanoraoi nakon te bwai teuana ae aki urui ana boto n reirei te Baibara. (Wareka Taeka N Rabakau 16:7.) Ngkana ti kaaitara ma te kangaanga, e kakawaki ukeran ana boto n reirei te Baibara mani booki ake mairouia kaain te toro ae kakaonimaki ma ni wanawana ao mairouia unimwaane.—Taeka N Rabakau 11:14.

6, 7. (a) E aera ngkai tabeman a kakaaitaraia kaain aia utu ni moanakin aia reirei ma Ana Tia Kakoaua Iehova? (b) Tera ae e riai ni karaoia te aomata ae reirei n te Baibara ke ae kaain te onimaki ni kaitaraakina irouia kaain ana utu?

⁶ E kainnanoaki onimakinan Iehova ni karikirakean te rau n te mwenga, ao ataakin aia namakin kaain te utu aika tiaki kaain te onimaki. (Taeka N Rabakau 16:20) A kona naba aomata aika tibwa reirei n te Baibara, ni kaota te ataibwai n aei. A kona tabeman buumwaane ke buuaine aika tiaki kaain te onimaki n aki totokoiia buuia man reiakinan te Baibara. A kona ni kakoauaa ae e raoiroi aei ibukin te utu. Ma ake tabeman riki, a kaotiota te riribai. E kaotia Esther ae e a riki ngkai bwa te tia Kakoaua, bwa e rangi ni “korakora unna” ngke e moan reirei n te Baibara buuna ma Ana Tia Kakoaua Iehova. E taku neiei: “I karenakoa ana boki ke I kabuekia.” E taku Howard, are e kakaitaraa ana reirei buuna n te Baibara n te moantai: “A bati buumwaane aika raraoma bwa rimwi a burebureaki buuia bwa a na kaaina te katei n Aro teuana. E bae n aki ataa arona ni kaitaraa te baere e iangoia te buu te mwaane bwa e karuanikai, ngaia are e a kona ni kaitaraa buuna.”

⁷ E riai ni buokaki te aomata ae kaitaraaki irouni buuna, bwa e na ataia ae e aki riai ni katoka ana reirei n te Baibara. N angiin te tai e kona ni kaetii kangaanga ni bwainan te nimamannei ao kaotiotan te karinerine nakoni buuna ae tiaki kaain te onimaki. (1 Betero 3:15) E taku Howard, “I rangi ni kaitaua buu bwa e teimatoa n rau ao n aki un!” E kabwarabwaraa ni kangai buun teuaei: “E kairoroai Howard bwa N na katoka au reirei n te Baibara. E taku bwa e a tia ni kamaraaki atou. N oneani mwin ae N na kauntaeka, I a tuangnga bwa tao e eti ana taeka, ao I aki kona n ataia bwa e na kanga n riki anne nakoiu. Ngaia are I a tuangnga bwa e na wareka te boki are I reirei iai. E a warekia ao e aki kona ni kakewei baike a taekinaki iai. E rangi n rotaki nanona iai.” E rangi n raoiroi ururingan ae a kona n namakinna raao ni mare aika tiaki kaain te onimaki bwa a a botu ke e a ruanikai aia mare, ngkana a kitanaki irouia buuia ibukini kaeani bobotaki ao te mwakuri ni minita. Ma a kona n taobarai aekan namakin akanne te karaunano ao te tangira.

BUOKIIA BWA A NA BUTIMWAEA TE TAROMAURI AE KOAUA

8. Tera te reirei ni kairiri are e anga te abotoro Bauro nakoia Kristian aika tiaki kaain te onimaki buuia?

⁸ E anga ana taeka n reirei te abotoro Bauro nakoia Kristian, bwa a na aki kitania raoia ni mare tii ibukin ae tiaki kaain te onimaki.b (Wareka 1 I-Korinto 7:12-16.) E kona ni kateimatoaaki kukurein ane e onimaki n iaiangoan ae e kona n riki bwa te Kristian te rao ni mare ae tiaki kaain te onimaki, e ngae naba ngke e maeka n te mwenga ae kaokoro aia Aaro kaaina. Ngkana ti kani kataia n ringa nanon te aomata ae tiaki kaain te onimaki n rongorongon te koaua, iai te kauring ae riai n iangoaki ae e na kaotaki n rongorongo aika imwina.

9. Tera te kauring ae riai n iangoaki ngkana ti moan taekina te koaua man te Baibara nakoia kaain ara utu aika tiaki kaain te onimaki?

⁹ E taku Jason ngke e iaiangoa ana namakin n reiakinan te koaua man te Baibara: “I kani kaongoia aomata nako!” N te tai are e a ataia te aomata ae reirei n te Baibara bwa a boni koaua baike e reiakin, e a bae n rangi ni kukurei n te aro are e a kuri ni katoatai n tataekinna. E bae ni kantaningaiia kaain ana utu aika tiaki kaain te onimaki bwa a na butimwaea rongorongon te Tautaeka n Uea n te tai ae waekoa, ma e kona naba ni butimwaeaki ma te riribai te rongorongo ae raoiroi. Tera aron rotakini buun Jason n ingaingan nanona are n te moantai? E taku neiei, “I rangi ni mimi irouna.” E taku temanna te aine ae butimwaea te koaua 18 te ririki imwini buuna: “Te aomata ngai ae I kan rereirei teutana imwin teutana.” Ngkana ko kaira te reirei n te Baibara ngkai ma te aomata ae akea nanoni buuna ni kan raonna n te taromauri ae koaua, e aera ko aki katoatai ni karaoa te reirei ni kataneiai ma ngaia bwa e aonga ni kaaitarai kangaanga ma te akoi? E taku Mote: “E na timtim au reirei n ai aron te karau, E na riki au taeka n ai aron te aoi; N ai aron te karau ae te maatim i aon te uteute ae maraurau.” (Te Tua-Kaua 32:2, BG) N angiin te tai, e raoiroi riki tibwaani koaua aika baireaki n aron maatim ni karau nakon are a kabatiaaki.

10-12. (a) Tera te reirei ni kairiri are e anga te abotoro Betero nakoia Kristian aika tiaki kaain te onimaki buuia? (b) E na kanga temanna are e reirei n te Baibara n reiakina maiuakinan te reirei ni kairiri n 1 Betero 3:1, 2?

¹⁰ E kairaki iroun te Atua te abotoro Betero bwa e na anga te reirei ni kairiri nakoia buuaine aika Kristian, ake a maeka ni mwenga aika kaokoro aia Aaro kaaina. E korea ae kangai: “Kam na aantaeka nakoia oini buumi, bwa ngkana a aki ongeaba buumi nakon te taeka, ao a na anaaki nanoia n aroaromi, e ngae ngke kam aki taetae, ibukina bwa a nori aroaromi aika itiaki ae raonaki n te karinerine ae bati.” (1 Betero 3:1, 2) E kona te buu te aine n anaa nanoni buuna nakon te taromauri ae koaua, n arona n aantaeka ao n rangi ni karinea buuna, e ngae ngke e iowawa nakoina. N aron anne, e riai naba te buu te mwaane ae kaain te onimaki ni maiuakina te aroaro ae kakukureia te Atua, ao n riki bwa atun te utu ae tatangira, n aki ongei kaitaraana ake a kona ni wai mairouni buuna ae tiaki kaain te onimaki.—1 Betero 3:7-9.

¹¹ A bati katoto ni boong aikai aika kaota kakawakini maiuakinan ana reirei ni kairiri Betero anne. Iangoa aron Selma. E aki kukurei buuna ae Steve, ngke e moan reirei neiei n te Baibara ma Ana Tia Kakoaua Iehova. E taku teuaei: “I un, I kokoo, I tauaninne, ao I raraoma.” E taku Selma: “E boni kangaanga naba te maeka ma ngaia imwain ae I kunea te koaua. E rangi ni kakaiun. E a korakora riki arona aei ngke I a moana au reirei n te Baibara.” Ma tera ae buokia?

¹² E uringa te reirei teuana Selma mairoun te tia Kakoaua are e reirei ma ngaia. E taku: “N te bong teuana ao I a rawa n reirei n te Baibara. N te tairiki are imwaina, e oreai Steve ngke I kataia ni kaotaa n te bwai teuana, ao I rangi n nanokawaki ma n nanoangaai i bon irou. Imwini kaotan au namakin ao te baere e riki nakoiu nakon te tari te aine anne, e a tuangai ngkanne bwa N na wareka 1 I-Korinto 13:4-7. Ngke I tia ni warekia ao I a iango ni kangai: ‘E tuai mani karaoa teuana mai buakoni baika raraoi aikai nakoiu Steve.’ Ma e buokai te tari te aine arei bwa N na iango n te aro ae kaokoro ngke e titirakinai ni kangai: ‘Iraua mai buakoni mwakuri n tangira akanne ae ko a tia ni kaotiotia nakoni buum?’ I kaeka ni kangai: ‘Akea bwa e rangi ni kangaanga te maeka ma ngaia.’ E aamarau te tari te aine arei ao e taku: ‘Selma, antai ae kataia ngkai n riki bwa te Kristian? Ngkoe ke Steve?’ Ngke I a ataia ae I riai n bita au iango, I a tataro nakon Iehova bwa e na buokai ni kaotiota riki au tangira nakon Steve. E a moanna n riki te bitaki teutana imwin teutana.” E a butimwaea te koaua Steve, 17 te ririki imwina.

AROIA TABEMWAANG NI KONA N IBUOBUOKI

13, 14. A kanga tabemwaang n te ekaretia ni buokiia ake a maeka n te mwenga ae kaokoro aia Aaro kaaina?

¹³ N aroni maatim ni karau aika a kamwaimwa aontano ma ni buoka rikiraken te aroka, a bati naba kaain te ekaretia aika boutokaa kukureia Kristian aika maeka ni mwenga aika kaokoro aia Aaro kaaina. E taku Elvina mai Brazil: “I buokaki n tei n nene n te koaua n aia tangira mwaaneu ao tariu n te onimaki.”

¹⁴ E kona te akoi ao tabeakinaia aomata mairouia kaain te ekaretia, n rota nanon temanna kaain te utu ae tiaki kaain te onimaki. E taku temanna te buu te mwaane mai Nigeria are e butimwaea te koaua 13 te ririki imwini buuna: “Ngke I mwananga ma temanna te tia Kakoaua, ao e a tii uruaki naba ana kaa. E kakaaeia raona aika taani Kakoaua n te kaawa ae uakaan, ao a karekea nnera n te tairiki anne. A tabeakinira raoi n aron ae kaanga ti a kamani kinaira man uarerekera. N te tai naba anne, I a namakina te itangitangiri ni Kristian are e a kaman tataekinna buu.” E taku temanna te buu te aine mai Engiran, ae e kaaina te koaua 18 te ririki imwini buuna: “Ti uaia ni kaoaki irouia taani Kakoaua bwa ti na amwarake ma ngaiia. I boni butimwaeaki raoi n taai nako.”c E taku temanna te buu te mwaane man te aba naba anne are e a manga riki bwa te tia Kakoaua: “A mwamwannano taari mwaane ao aine n te aro are a kawarira, ke ni kaoira nakoni mwengaia. E rangi n otara riki aei ngke I a rin n te onnaoraki bwa a bati aika kakawarai.” Ko kona ni kakaaei naba aanga ake ko na kaotiota iai tabeakinaia kaain am utu aika tiaki kaain te onimaki?

15, 16. Tera ae kona ni buoka ane onimaki bwa e na kateimatoa kukureina ngkana a teimatoa kaain ana utu n aki kaaina te onimaki?

¹⁵ Ni koauana, a aki bane ni butimwaea te koaua raao ni mare, naati, kaaro, ke kaain te utu ni kaan tabeman aika tiaki kaain te onimaki, e ngae ngkana e kabanea te ririki ae bati temanna ae kaain te onimaki ni kaotiota te aro ni kakaonimaki ao n uarongorongo ma te akoi nakoia. A teimatoa tabeman n aki bwerengaki ke ni kakaaitara. (Mataio 10:35-37) Ma e kona n rangi n uaana ngkana a kaotiotii aroaro aika kakukureia te Atua Kristian. E taku temanna te buu te mwaane ae tiaki ngkoa kaain te onimaki: “Ko aki kona n ataa te bae e riki n ana iango ao i nanon te aomata ae tiaki kaain te onimaki, ngkana e a moanna kaain te onimaki ni kaotiotii aroaro aika raraoi aikai. Mangaia are tai kabwaraa nanom irouni buum ae tiaki kaain te onimaki.”

¹⁶ E kona ni kukurei te aomata ae kaain te onimaki, e ngae naba ngkana e teimatoa n aki kaaina te onimaki kaain ana utu. E taku temanna te tari te aine ibukini buuna ae aki butimwaea rongorongon te Tautaeka n Uea imwin ana kakorakora i nanon 21 te ririki: “I teimatoa ni kimwareirei ngkai I kakorakoraai ni kakukureia Iehova, I kateimatoa kakaonimakiu, ao ni mwakuri ni kakorakoraa au onimaki. I a kaaniaki riki ma Iehova ao ni kawakina nanou ngkai I katabetabeai ni mwakuri aika irekereke ma te onimaki n aron te ukeuke n reirei i bon irou, kaakaeani bobotaki, te mwakuri ni minita, ao buokaia tabemwaang n te ekaretia.”—Taeka N Rabakau 4:23.

TAI BWARANNANO!

17, 18. E na kanga te Kristian ni kateimatoa ana kantaninga n te mwenga ae kaokoro aia Aaro kaaina?

¹⁷ Tai bwarannano ngkana ngkoe te Kristian ae ko kakaonimaki ae ko maeka n te mwenga ae kaokoro aia Aaro kaaina. Uringnga ae “E na aki kitania ana aomata Iehova i bukin arana ae kakanato.” (1 Tamuera 12:22, BG) E na memena iroum tii ngkana ko teimatoa n nimtia. (Wareka 2 Rongorongo 15:2.) Ngaia are “kakukureiko iroun Iehova.” Ni koauana, “angan Iehova arom nako; ao onimakinna.” (Taian Areru 37:4, 5, BG) “Botumwaaka n tataro” ao onimakina ae e kona Tamara are i karawa ae tatangira, ni buokiko n nanomwaaka i aani kangaanga n aekaia nako.—I-Rom 12:12.

¹⁸ Bubutiia Iehova taamneina ae raoiroi bwa e na buokiko ni karikirakea te rau ni mwengam. (I-Ebera 12:14) Eng, e na rikirake te rau ae kona n ringi nanoia kaain te utu aika tiaki kaain te onimaki, teutana imwin teutana. Ko na namakina te kukurei ao raun nanom ma am iango ngkana ko “karaoi bwaai ni kabane ibukin neboan te Atua.” (1 I-Korinto 10:31) Ai kaungananora ataakin ae ko boutokaaki ma te tangira n aia kakorakora tarim ao mwaanem n te ekaretia ni Kristian!

[Kabwarabwara mai nano]

[Taamnei n iteraniba 30]

Rinea te tai ae riai ni kabwarabwaraa iai am koaua

[Taamnei n iteraniba 31]

Kaota tabeakinaia raao aika tiaki kaain te onimaki