ATUN TE MAEKATIN: E AERA NGKAI E RANGI NI BATI TE RAWAWATA? E NA TOKI N NINGAI?
A Rangi ni Bati Aomata Aika Raoiroi Aika Bua Maiuia!
Noelle bon te teei ae uarereke ae rangi n tatangiriia aomata ao ni babaeakina te korotaamnei. N te tairiki teuana n tain te kabuebue, e nakonako i akun ana auti ao e a tii bwaka naba nako nanon aia tabo n uaua. E boni bwabwa, uoua te wiki imwaini koron ana kaaua n ririki.
Charlotte, Daniel, Olivia, Josephine . . . Aikai araia tabeman mai buakoia ataei aika 20 aika onoua ke itua aia ririki mai buakoia 26 ake a mate ngke a katiiaki n te tabo n reirei i Connecticut n te U.S.A., n Ritembwa 14, 2012. N taini kanuringan te bwai ae riki aei, e atongi araia ataei te Beretitenti ae Obama ao e tuangia aomata ake a ongora aika rawawata nanoia ni kangai: “A riai n toki kangaanga aikai.”
E kitana Iraq n 1996 Nei Bano ae tebwi ma wanua ana ririki ao e mwaing ma ana utu nako Norway. Iai aran neiei n takaakaro ae Sun Rays irouia raoraona. Ma e kananokawaki, bwa n Turai 22, 2011 ao Bano bon temanna mai buakoia aomata aika 77 ake a tiringaki iroun te tia iowawa ae tiritiri are e taetae ni kamoamoa ni kangai: “I kani kabwaraa au bure . . . bwa I aki kona ni kamateia aika bati riki.”
A okioki n ribootinaki aeka ni karaki aika rangi ni kauruakinano aikai ni katobibia te aonnaba. Iangoa aron te rawawatannano ao te maraki ae reke imwini kabuanibwai, te iowawa, te buaka, mwakuri n iowawa aika tiritiri, kabuanibwai aika karina ao kangaanga riki tabeua. A a rangi ni bati aomata aika raoiroi aika bua maiuia ao a a rangi ni bati naba ake a karawawataaki n akea bukina n angiin te tai!
A bukina te Atua tabeman ao a iangoia bwa e aki tabeakinia te botannaomata ara tia Karikiriki. A kakoauaa tabeman riki bwa e nori rawawatara te Atua ma e rineia bwa e na aki buokira. Ma ake tabeman riki, a taekinna bwa a a kamani baireaki rikini kangaanga akanne. E taraa n ae ai akea tokin iango aikai i aon te reirei aei. Ti na nori ia kaekaaia aika karaunano ma n onimakinaki? Ni kaongora aika imwina, ti na nenera iai Ana Taeka te Atua ae te Baibara ibukini kaekaan ae tera ae karikii rawawata ao tera aroni katokaia.