Kakaitau Ibukin Aron Iehova N Tituaraoi Ao N Nanoraoi

1, 2. Tera te kakabwaia ae kona n reke irouia raoraon Iehova?

“TI A TIA n tekateka n taanga n te maan ae kaania 35 te ririki,” aikai ana taeka Monika ae te Kristian. “Ti a bon rangi ni kinaira raoi. Ma e ngae n anne, imwin ririki aikai ni kabane, ti bon teimatoa naba n reiakini bwaai ake ti tuai n atai ibukira ni kauoman!” Akea te nanououa, bwa bon aei ae riiriki naba irouia taanga ni mare aika mwaitikurikuri ao irouia aika a iraorao.

² Ti kimwareirei ngkai ti a ririkirake ni kinaia riki naake ti tangiriia. Ma akea mai buakon aaro n iraorao ni kabane aika ti kona ni karikirakei, ae kakawaki riki nakon ara iraorao ma Iehova. Ti na bon aki kona n atai bwaai ni kabane ibukina. (I-Rom 11:33) E na bon reke kakabwaiaakira ao kimwareireira n aki toki ibukini korakoran nanora ni kakaitau n aroaron Iehova.​—Te Minita 3:11.

3. Tera ae ti na rinanona n te kaongora aei?

³ Ti buokaki n te kaongora are imwain aei, bwa ti na kakorakorai nanora ni kakaitau ibukin aron Iehova ni kai kawaraki ao n aki inanonano. Ti na rinanoi ngkai aroaron Iehova aika uoua riki aika anainano ae te tituaraoi ao te nanoraoi. Ni karaoan aei, ti na rikirake iai n ataia raoi ae “e raoiroi Iehova nakoia aomata ni kabaneia; Ao iai ana nanoanga i aon ana mwakuri ni kabane.”​—Taian Areru 145:​9, BG.

E TITUARAOI IEHOVA

4. Tera raoi nanon te tituaraoi ni koaua?

⁴ Tera nanon te tituaraoi? Ti na nora kaekaana n ana taeka Iesu ni Mwakuri 20:35 ae kangai: “E kakukurei riki te anga nakon te anganaki.” E kabwarabwaraa raoi nanon te tituaraoi ni koaua Iesu n ana taeka akana kai ota akanne. E anga ana tai, korakorana ao kaubwaina te aomata ae tituaraoi ni buokiia iai tabemwaang, ao e karaoia ma te kukurei. Ni koauana, e aki katautauaki korakoran te nano n tituaraoi mani buburan te bwaintangira, ma boni man nanon te tia anga. (Wareka 2 I-Korinto 9:7.) Akea temanna ae rangi n tituaraoi riki nakon ‘Atuara ae kukukurei’ ae Iehova.​—1 Timoteo 1:11.

5. E kaotiota te tituaraoi Iehova n aaro raa?

⁵ E kanga Iehova ni kaotiota te tituaraoi? E katauraoi bwaai ake a kainnanoi aomata ni kabane, n ikotaki naba ma te koraki ake a aki taromauria. Ni koauana, “E raoiroi Iehova nakoia aomata ni kabaneia.” E “kaotaa taai i aoia aomata aika buakaka ma aika raoiroi, ao e kabwakaa te karau i aoia aika eti aroia ma aika aki eti.” (Mataio 5:45) Anne bukina are ngke e taetae nakoia ake tiaki kaain te onimaki te abotoro Bauro, e a kona iai n taekina ae kangai ibukin Iehova: E ‘karaoa ae raoiroi bwa e anganingkami te karau mai karawa ao boong ni mari, ao e anganingkami te amwarake ae bati ma ni kaon nanomi n te kimwareirei.’ (Mwakuri 14:17) E mataata ngkanne bwa e tituaraoi Iehova nakoia aomata ni kabane.​—Ruka 6:35.

6, 7. (a) Antai aomata ake e kukurei riki Iehova ni katauraoi baika a kainnanoi? (b) Kabwarabwaraa aron te Atua ni katauraoi bwaai ibukia taan taromauria aika kakaonimaki.

⁶ E kimwareirei riki Iehova ni katauraoi baika a kainnanoi taan taromauria aika kakaonimaki. E taku te Uea ae Tawita: “Bon te tei ngai ngkoa, ao I a kara ngkai; Ma I tuai men nora te aomata ae raoiroi ae kitanaki, Ma natina aika bububuti te amarake.” (Taian Areru 37:​25, BG) A bati Kristian aika kakaonimaki ake a a tia n rinanoi bwaai ni kakoaua ibukin ana mwamwannano Iehova. Iangoa te katoto aei.

⁷ Tabeua te ririki n nako, ao e aitara ma te kangaanga teuana te tia uarongorongo ae kabwanina ana tai ae Nei Nancy ao e taku. “I kainnanoa $66 ibukin boon te auti ae I maeka iai are e na riai ni kabwakaaki n ningabong.” E ururing rikaaki Nancy ma n taku: “I aki ataia bwa e na kanga n reke irou te mwaiti ni mwane aei. I tataroa moa au kangaanga, ao imwina I a nako ni karaoa au mwakuri are te touati. I aki kantaningaia bwa e na rangi ni bati aika a na bwaintangiraai n te tairiki anne ibukina bwa bon te wiki anne ae e kakarako iai aomata aika roko n amwarake. Ma I mimi bwa a a roko tabeman n amwarake n te tairiki anne. Ngke e a boo au tai ni motirawa ao I a ikotii bwaai n tangira akanne ao bon $66 mwaitina ni kabane.” E kakoauaa raoi Nancy bwa e tituaraoi Iehova ao n anganna te mwaiti raoi are e kainnanoia.​—Mataio 6:33.

8. Tera ana bwaintangira Iehova ae te kabanea n raoiroi?

⁸ E kona n reke irouia aomata nako ana bwaintangira Iehova ae te kabanea n raoiroi. Tera te bwai anne? Bon ana karea ni kaboomwi Natina. E taku Iesu: “E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane onimakinna, ma e na reke irouna te maiu are aki toki.” (Ioane 3:16) Eng, e tauraoi ana bwaintangira Iehova ae te kabanea n raoiroi ibukia aomata ni kabane ake a motinnanoia bwa a na butimwaeia. A na rangi ni kakabwaiaaki te koraki ake a onimakina Iesu bwa a na karekea te maiu n aki toki! (Ioane 10:10) Iai te bwai ni kakoaua teuana ae raoiroi riki ibukini kaotan tituaraoin Iehova?

KATOTONGA IEHOVA N TITUARAOI

9. Ti na kanga ni katotonga Iehova n tituaraoi?

⁹ Ti na kanga ni katotonga Iehova n tituaraoi? “E anganganira bwaai ni kabane ni kabatiai ibukini kakukureiara” Iehova, ngaia are ti riai n “tauraoi n ibuokanibwai” ma aomata bwa ti aonga ni boutokaa kimwareireia. (1Timoteo 6:​17-19) Ti kukurei ni kamanenai kaubwaira bwa ara bwaintangira nakoia aika tangiraki iroura ao ni buokiia te koraki ake a kainnano. (Wareka Te Tua-Kaua 15:7.) Tera ae kona ni buokira bwa ti na ururinga bwainan te tituaraoi? Tabeman Kristian a kakaraoa te aroaro ae manena aei: Ngkana a anganaki te bwaintangira, a a manga kakaaea aia tai are a na anga iai aia bwaintangira nakon temanna riki. E kakabwaiaaki te ekaretia ni Kristian bwa a a rangi ni bati iai taari mwaane ao aine aika karikirakea te nano n tituaraoi.

10. Tera te anga teuana ae rianako ni bwainan te tituaraoi?

¹⁰ Te anga teuana ae te kabanea n raoiroi ae ti na bwaina iai te tituaraoi, bon te anga ngaira n ara mwakuri ao n ara taetaenikawai. Ti na kanga ni karaoa anne? Boni mani kamanenaan ara tai, korakorara n ibuobuoki ao ni kaungaia aomata. (I-Karatia 6:10) Ibukin tuoan arora n aei, ti kona n titirakinira ni kangai: ‘A ataia aomata bwa I kukurei n anga ngai ibukia ao n ongoraei baika a tabeaianga iai? Ngkana e bubutii temanna buokana n ana mwakuri teuana ke tabena n ana auti, I butimwaeia ngkana e angaraoi irou? N ningai te kabanea n tai are I kamoamoaa ma nanou ni koaua kaain au utu temanna ke raou n te onimaki?’ Ngkana ti ‘bwabwaina te anganga,’ ti a boni koaua raoi ngkanne bwa ti a kaaniaki riki ma Iehova ao raoraora.​—Ruka 6:38; Taeka N Rabakau 19:17.

11. Baikara aaro tabeua ake ti kona n tituaraoi iai nakon Iehova?

¹¹ Ti kona naba n tituaraoi nakon Iehova. Ti kaungaaki n te Baibara bwa ti na ‘neboa Iehova n ara bwai nako.’ (Taeka N Rabakau 3:​9, BG) A irekereke “ara bwai nako” ma ara tai, korakorara, ao kaubwaira, ake ti kona n anga ma nanora ni koaua n ara beku ibukina. A kona naba n reiakinaki ataei bwa a na tituaraoi nakon Iehova. E taku te karo ae Jason: “Ngkana a anga aia bwaintangira n te Tabo n Taromauri ara utu, ti kairiia natira bwa a na karinna n te bwaoki ni bwaintangira. A kimwareirei iai ibukina bwa ngkana a karaoa aei, a a bon ‘angan Iehova te bwai teuana.’ ” Ngkana a namakina kakukurein te anganga nakon Iehova ataei man uarerekeia, a na bae n teimatoa n tituaraoi nakon te Atua n aia tai n ikawairake.​—Taeka N Rabakau 22:6.

E NANORAOI IEHOVA

12. Tera ae nanonaki n te nanoraoi?

¹² Aroaron Iehova teuana riki ae rangi n anainano bon te nanoraoi. Tera ae nanonaki n te nanoraoi? Te moan taeka ae rairaki n angiin te tai bwa “nanoraoi” n te Baibara ae te Rairai ae te Aonnaba ae Boou, nanona raoi “aki imanono.” (Tito 3:​1, 2) E aki imanono te aomata ae nanoraoi, ao e aki naba tuamatoa n taai nako, ke ni kakanneti ao n iowawa. Ma e kekeiaki ni bwaina te akoi n aroarona nakoia aomata, ao e iaiangoi naba baika a aitara ma ngaai. E tauraoi n ongora irouia aomata ao e nanoraoi nakoni baike a tangiri ao ni bitii ana babaire.

13, 14. (a) E kanga Iehova ni kaotiota te nanoraoi? (b) Tera reireiara ni kaineti ma te nanoraoi man te baere e karaoia te Atua nakon Rota?

¹³ E kanga Iehova ni kaotiota te nanoraoi? E iaiangoi aia namakin ana toro ma te akoi, ao n angiin te tai e kaekai aia bubutii. N te katoto, iangoa te baere e karaoia Iehova nakon te aomata ae raoiroi are Rota. Ngke e a moti ana iango Iehova bwa e na kamaunai kaawa ake Totom ma Komora, e bon angan Rota te kaetieti ae mataata bwa e na birinako nakoni maunga. Ma iai bukina tabeua are e a bubutii iai Rota kariaiakana bwa e na birinako nakon te tabo riki teuana. Iangoia moa, e boni butiaki Iehova iroun Rota bwa e na bitii Ana kaetieti!​—Wareka Karikani Bwaai 19:​17-20.

¹⁴ E kona ni kai kabuakakaaki Rota bwa e mamaara ao e karitei. Ni koauana, e na boni kamaiuaki Rota iroun Iehova n taabo ake e mena iai, ngaia are bon akea riaini maakun Rota. Ma e ngae n anne, e boni maaku naba Rota n te bwai are e namakinna, ma e bon nanoraoi Iehova iai. E kariaia bwa e na birinako Rota nakon te kaawa are E a tia n iangoia bwa e na kamauna. (Wareka Karikani Bwaai 19:​21, 22.) E teretere bwa e aki tuamatoa Iehova ao e kona ni bitii ana tua. E bon atataiaomata ao n nanoraoi.

15, 16. E kanga ni kaotiotaki aron Iehova ae te nanoraoi n te Tua Rinanoni Mote? (Nora te taamnei ane mai moan te kaongora aei.)

¹⁵ Iangoa te katoto riki teuana ni kaineti ma aron Iehova ae te nanoraoi ae kaotiotaki n te Tua Rinanoni Mote. Ngkana iai kaain Iteraera ae rangi ni maiu ni kainnano ao e aki kona n reke irouna te tiibutetei ke te kooti bwa ana karea, e kona n onea mwina n uoman te turukon ke uoman te bitian. Ma tera ae na karaoia te aomata anne ngkana ai bon akea ana bwai ao e aki kona naba ni karekei uoman te bitian? Ni kaineti ma anne, e kariaiakaki iroun Iehova te I-Iteraera ae rangi ni maiu ni kainnano bwa e na anga ana karea ae te baraua ae tii teutana. Ma e ngae n anne, nora te kabwarabwara ae kakawaki aei: Bon tiaki te burawa n aki akaka, ma bon te “baraua ae manti raoi,” ae te aekaki are kakamanenaaki ibukia iruwa aika rine. (Karikani Bwaai 18:​6, BG) E aera bwa e kakawaki aei?​—Wareka Nakoaia Ibonga 5:​7, 11.

¹⁶ Iangoia bwa aongkoa kaain Iteraera ngkoe ao ko rangi maiu ni kainnano. Ngke ko roko n te umwanrianna ae tabu ma te baraua ae tii teutana bwa am karea, ao ko a noriia naba kaain Iteraera aika kaubwai riki bwa a roko ma aia nanai. Ko boni bae ni maamaa ibukin am karea ae te baraua ae taraa n aki kakawaki. Ma imwina, ko a uringnga are e kakawaki am karea iroun Iehova. Bukin tera? Bukina teuana, e tangiria Iehova bwa e na rangi n tamaroa te baraua anne. Titeboo ma e kangai Iehova nakoia tibun Iteraera ake a maiu ni kainnano riki: ‘I ataia bwa kam aki kona n anga ami karea ae bati n aroia ake tabeman, ma I ataia naba bwa kam bon anga ami kabanea n tamaroa.’ Ni koauana, e kaotiota te nanoraoi Iehova n arona n iaiangoi tian aia konabwai ana toro ao baike a aitara ma ngaai.​—Taian Areru 103:14.

17. Baikara mwakuri aika ti kona ni koaua raoi iai bwa e butimwaei Iehova?

¹⁷ A kona n reke kabebeteara man ataakin ae e nanoraoi Iehova ni butimwaei ara beku aika ti karaoi ma nanora ni kabane. (I-Korote 3:23) E taku te tari te aine ae e a kara ae kaain Itare ae Constance: “Te bwai ae I rangi ni kani karaoia n taai nako, boni kaongoaia aomata taekan au tia Karikiriki. Bon anne bukina ngkai I teimatoa n uarongorongo ao n reirei ma aomata n te Baibara. N tabetai, I uringaaba ngkai I a aki kona ni karaoa ae bati riki ibukini mamaaran rabwatau. Ma I bon ataia ae e ataa tian au konabwai Iehova, e bon tangirai ao e kukurei ni baika I kona ni karaoi.”

KATOTONGA IEHOVA N NANORAOI

18. Tera te anga teuana ae a kona iai kaaro ni kakairi n ana katoto Iehova?

¹⁸ Ti na kanga ni kona ni katotonga Iehova n nanoraoi? Iangoa riki te bwai are e karaoia Iehova nakon Rota. Bon Iehova te tia tautaeka ae mwaaka ma e ngae n anne, e boni kakauongo naba ma te akoi ngke e kaota ana iango Rota. Ao e butimwaeaki ana bubutii Rota iroun te Atua. Ngkana te karo ngkoe, ko kona ni kakairi n ana katoto Iehova? Ko kona n ongoraea aia bubutii natim ao ko karekea te bwai ae a tangiria ngkana e riai? Ni kaineti ma aei, e taekinaki n Te Taua-n-Tantani ae bwain Tebetembwa 1, 2007 bwa a kona tabeman kaaro ni karinia natiia n taini maroroakinan tuua ibukini mwengaia. N te katoto, a iangoia kaaro bwa a na bairea ao n rinea te tai are a riai n okira iai te auti ataei. Ma a kona naba kaaro aika Kristian n ongora n aia taeka natiia ibukin te tai ae na baireaki. N taai tabetai, a kona n iangoia kaaro bwa a na karaoi bitaki tabeua nakon te tai are a a tia ni motikia, tii ngkana e aki urui booto n reirei man te Baibara. A kona n namakinna kaaro bwa ngkana a rinanoi aia iango natiia ibukin tuani mwengaia, a a kaungaaki riki iai ataei bwa a na ota raoi ao n ongeaba iai.

19. A na kanga unimwaane n te ekaretia ni katotonga Iehova n nanoraoi?

¹⁹ A kekeiaki unimwaane n te ekaretia ni katotonga aron Iehova n nanoraoi rinanon iaiangoani baika a aitara ma ngaai raoia n onimaki. Uringnga are a boni kakawaki naba iroun Iehova aia angakarea tibun Iteraera ake a maiu ni kainnano riki. N aron naba anne, iai taari tabeman ake e karako te bwai ae a kona ni karaoia n te mwakuri ni minita, tao ibukin aorakia ke a a kara. Ma tera ae na karaoaki ngkana a a bwara nanoia naaka a tangiraki aikai ibukin tianakin aia konabwai? A karau nanoia ma te akoi unimwaane n tuangia ae e tangiriia Iehova ngkai a a anganna aia kabanea n tamaroa.​—Mareko 12:​41-44.

20. E koaua bwa bwainan te nanoraoi bon te kerikaaki man te beku ibukin te Atua? Kabwarabwaraa.

²⁰ Ni koauana, ti aki kani kairuaa bwainan te nanoraoi ma rawara ni karaoa ara beku ibukin te Atua tii ibukini kawakinara i bon iroura. (Mataio 16:22) Ti aki kani karaoa anne ao imwina ti kakaaea aonara n taekinna bwa ti boni bwaina te nanoraoi. Ma ti bane ni kainnanoa te ‘kakorakora” ibukini boutokaan te Tautaeka n Uea. (Ruka 13:24) Ni koauana, ti kakorakoraira ni kabaeranti booto n reirei aika uoua. N te itera teuana, ti kakorakoraira bwa ti na aki kerikaaki man ara beku. Ao n te itera are teuana, ti ururingnga ae e tuai man tuangira Iehova te bwai ae riaon ara kona. Ngkana ti anganna ara kabanea n tamaroa, ti a kakoauaa iai bwa e kukurei. Tiaki ngkanne kukurei ni beku iroun te Toka ae rangi n tatangira ao n nanoraoi? N te kaongora ae imwina, ti na maroroakin iai aroaron Iehova aika anainano aika uoua riki.​—Taian Areru 73:28.