Rekeni Kakabwaiaau Aika Bati Man te Ongeaba Iroun Iehova

ANNE te bwai ae I ururingnga mangkoa ibukin tamau are nimamannei ao ni mwamwakuri. E ataa raoi te kaetitaeka ae riai ngaia are e a atikaki nanona ngkekei naba, ngke e ongoraea te rongorongo man te Baibara n 1935. Man te tai arei, e kakorakoraa n tibwai baike e tabe n reiakin nakoira ngaira aika natina. E rawa n te moantai tinau ni kitana katein ana Aro ae te Katorika. Ma imwin te tai ae aki maan, e a moanna n reiakini koaua tabeua man te Baibara ao n taekinna bwa kaanga ai bon ana Aro.

E rangi ni kangaanga bwa a na reirei ma ngaira au karo bwa tii teutana rabakaun Tinau ni wareware ao ni koroboki ao Tamau e mwamwakuri ma ni babane riki ana tai n ara tawaana. N tabetai, e a rangi ni kua n te aro are e a nimatutu n tain te reirei. Ma e uaana ana kakorakora. Bon te karimoa ngai ngaia are I a ibuobuoki n reireina tariu ao mwaaneu aika uoman. E irekereke anne ma te baere e aki toki n taekinna Tamau ae ana tangira Noa ibukia ana utu are e kaota iai ongeabana nakon te Atua. I rangi n tatangira te karaki man te Baibara aei! Tabeua te tai imwina, ti a bane ni kaei bobotaki n te ekaretia n te Tabo n Taromauri i Roseto degli Abruzzi ae te kaawa ae mena i etan taari i Adriatic i aon Itare.

Bon 11 au ririki n 1955 ngke I mwananga ma tinau riaoni maunga nako maeao ni kaea ara moani bwabwaro i Rom. Man te tai anne ni karokoa ngkai, I iangoi bobotaki aika bubura aikai bwa teuana mai buakoni maiun te Kristian ae moan te kakawaki.

N te ririki are imwina, I a bwabetitoaki ao imwina I a waekoa ni kabwanina au tai n te mwakuri ni minita. Ngke ai 17 au ririki, I a riki bwa te special bwaiania i Latina ae te kaawa ae mena i maiakin Rom ae tao 330 te kiromita raroana ma mwengau. Bon te kaawa ae e a tibwa maekanaki, ngaia are a aki kona aomata n tabe ma aia iango tabeman ngkana a butimwaea te rongorongo man te Baibara. I rangi n ingainga ma raou ni bwaiania n tibwai nako booki aika bati ake aanaki man te Baibara, ma kioina ngkai ai tibwa tebwi tabun au ririki I bon rangi n ururingia au utu! E ngae n anne, I tangiria bwa N na ongeaba n te kaetieti are I anganaki.

I a manga mwiokoaki bwa N na mwakuri i Milan ni buoka te katauraoi ibukin te Bwabwaro Ibukin Aaba Aika Kakaokoro n 1963 ae kangai atuna, “Te Euangkerio ae Aki Totoki.” N tain te bwabwaro, I anga nanou bwa N na ibuobuoki i rarikia aomata aika bati riki n ikotaki naba ma te tari te mwaane ae ataei ae Paolo Piccioli mai Florence. Ni kauabongin te bwabwaro, e a anga ana kabwarabwara ae kakannongora teuaei i aon te tiku n aki mare. I uringnga bwa I iango ni kangai: ‘E na bon tiku n aki mare te tari aei.’ Ma e ngae n anne, ti a moanna ni kokororeta ao ikanne are ti a ataia bwa titeboo baike ti iaiangoi n aron tiara, tangiran Iehova ao ai nanora ae korakora n ongeaba irouna. N te 1965, I a mare ma Paolo.

MARORORA MA MATANIWI N AARO

I regular bwaiania i Florence i nanon tebwina te ririki. E rangi ni kakukurei noran te rikirake n taian ekaretia, ai moarara riki rikirakeia rooro n rikirake. Ti kukurei ni kabanei ara tai ni mamaroro ma ngaiia ni kaineti ma bwaai n taamnei ao n te kaakibotu are e kan takaakaro riki iai Paolo ae te butibooro. E mataata ngkanne bwa e kakawaki irou au tai ma kaainnabau, ma I kona n noria naba bwa a kakabwaiaaki iai rooro n rikirake ma utu n te ekaretia ao a kainnanoa mwannanoaia ao ana tai Paolo.

I teimatoa ni kimwareirei n ururingaia aomata aika bati ake ti reirei ma ngaiia n te Baibara. Temanna mai buakoia bon Adrian, are e taekini baike e reiakin nakoia utu aika uoua. A bairea te maroro ma te mitinare temanna i aon aia koaua Aaro n aron te Temanna n teniman ao te taamnei ae aki mamate. Ao a kaoti teniman mitinare nakon te maroro anne. E kai ataaki irouia naake ti reirei ma ngaiia bwa a kangaanga ao a aki boraoi aia kabwarabwara mitinare akanne ngke a a kabotaui ma ana reirei te Baibara aika mataata. Eng, e kakoauaaki n te maroro arei bwa a a boni bitaki nanoia. Imwin tabeua te tai, a a riki tabeman man utu akanne bwa taani Kakoaua.

Ni koauana, iai kaokoron ara aanga n uarongorongo ni boong aikai. N taai akekei, e riki Paolo bwa te tia maroro ae “mwaatai” ma mataniwi n Aaro ao a bati taai ake e mamaroro iai ma ngaiia. I uringa te maroro teuana are e karaoaki nakoia aomata aika tiaki taani Kakoaua. E mataata bwa a a kamani boniwia taani kaaitara bwa a na tabeki titiraki ake a iangoi tabeman mai buakoia taan ongora bwa a rangi ni kangaanga kaekaaia. Ma e ngae n anne, e a rikirake ni kabuebue te maroro. E titiraki temanna bwa a riai n irekereke Aaro ma te tautaeka n aron are e kakaraoaki n tienture aika bati ke a aki. Ibukin anne, e a mataata bwa e a oti kairuaia mataniwi n Aaro. A tiringaki taura n te tai ae waekoa ao e katokaki te maroro. N ririki ake imwina, ti a kunea bukin tiringan taura n te tai arei bwa te boraraoi ngkana arona bwa e aki nakoraoi te maroro n aron are a kantaningaia mataniwi n Aaro.

MWIOKO AIKA BOOU

Tebwina te ririki imwin tekatekau n taanga ma Paolo, ti a kaoaki bwa ti na karaoa te mwakuri ni mwamwananga i aon abara. Bon iai ana mwakuri ni kareketianti Paolo ae bubura boona iai, ngaia are e aki bebete karaoan ana motinnano. Ma imwin iaiangoana ao tataroakinana, ti a motinnanoia bwa ti a tauraoi ibukin te mwioko ae boou anne. Ti kukurei ni kabanei ara tai ma utu ake a butimwaeira nakoni mwengaia. N angiin te tai ti ukeuke n reirei n te tairiki n te kurubu ao imwina e buokiia ataei Paolo ma aia bwai n reirei ai moarara riki ngkana te numera. Irarikin anne, e rangi ni kani wawareware Paolo ao e ingainga n tibwai baike e a tia ni wareki aika kakannongora ao ni kaunganano. Ti aki toki n uarongorongo n te Moanibong ni kaawa ake akea iai taani Kakoaua ao ni kaoia aomata nakon te kabwarabwara ae baireaki ibukin te tairiki.

Imwin uoua te ririki n te mwakuri ni mwamwananga n ara aono, ti a kaoaki bwa ti na mwakuri n te Betaera i Rom. E mwiokoaki Paolo bwa e na tararuai baika a kakawaki ake a irekereke ma te tua ao ngai I kammwakuraki n te Tabo Ibukini Karaoani Maekatin. E kangaanga karaoan te bitaki aei ma ti kakorakoraira n ongeaba iai. E rangi ni kakukurei norani kabuburaan te aobiti n tararua ao te rikirake ae korakora n te botaki n itaritari i aon Itare. N te tai anne, a a karekea kinaakia i aan te tua ae te bwai ae kakawaki Ana Tia Kakoaua Iehova i aon Itare. Ti boni kukurei n te aeka ni mwioko aei.

Ni mwakurira n te Betaera i aon Itare, ti a kaotiota iai kakaonimakira ni kaineti ma reireiara ae kakawaki man te Baibara i aon te raraa. Ni moan 1980 tabun, iai te manga tang teuana ni kaineti ma te raraa are e a karika te kauntaeka. E kairua bukinaia te taanga teuana aika taani Kakoaua ibukini maten natiia te aine, e ngae ngke e boni mate man aorakin te raraa ae kakaiaki are e reke naba irouia aomata aika bati n aonon te Meriteranian. A ibuobuoki kaain te utu ni Betaera nakoia rooia ake a tei ibukia kaaro aika Kristian. A buokaki aomata n te boroutia ao katoton te Awake! teuana ae okoro, bwa a na karekei koaua ao n oota raoi bwa tera ae taekinaki n Ana Taeka te Atua ibukin te raraa. Inanon namwakaina akanne, e aki toki Paolo ni kabanea 16 te aoa ni mwakuri ni katoabong n akea motirawana. I kabanea au kona ni boutokaia n ana mwakuri korakora ae kakawaki aei.

TE BITAKI RIKI TEUANA NI MAIURA

Inanon tekatekara n taanga n te maan ae 20 te ririki, ti a manga kaaitara ma bitaki aika ti aki kantaningai. Ai 41 au ririki ao Paolo 49 ngke I a kaongoa ae n au iango, I a bikoukou. Inanon ana boki teuana I a nori taeka aikai ibukin te bong anne: “Te tataro: Ngkana e boni koaua aei, buokira bwa ti na teimatoa ni karaoa ara mwakuri ni kabwanina ara tai, ti na aki motirawa man ara mwakuri ibukin te Atua ao ti na riki naba bwa kaaro aika raoiroi aia katoto. Ma e a moamoa riki, buokai bwa N na maiuakina 1 te katebubua mani bwaai ake I a kaman taekini ngkoa n au kabwarabwara mai moa i nanon 30 te ririki aika tibwa nako.” E taraa n ae a kaai ni kaekaaki ara tataro iroun Iehova man norani mwina.

E rangi ni korakora te bitaki nakoni maiura imwini bungian Ilaria. Ni koauana, iai taai ake a a bwara nanora iai n aron naba are mwaneweaki n Taeka N Rabakau 24:​10, (BG) ae kangai: “Ngkana ko nimamate ni bongin te rawawata, Ao e karako korakoram.” Ma ti bon ibuobuoki i marenara n ururingani kakawakin te uaia n ikaungaunga.

E aki tabwara Ilaria n taekinna bwa e rangi ni kukurei ngkai e ikawairake irouia taani Kakoaua aika uoman ake a rangi n tabetabe ni kabwanina aia tai n te mwakuri ni minita. E bon nabeaki raoi ao e ikawairake n te utu ae rangi n tamaroa. I bon tatauraoi ibukini baike e kainnanoi n te ngaina. Ao n te tairiki ngkana e okira te auti Paolo n angiin te tai, iai tabena ae riai ni katiaa ma e bon reke naba ana tai n takaakaro ma ngaia ao ni buokia n ana bwai n reirei. E karaoa anne e ngae naba ngkana e na tiku ni karokoa te aoa uoua ke tenua n te karangaina ni katiai oin tabena. E aki toki ni kangai Ilaria: “Bon raoraou tamau ae I tatangiria.”

N aron ae ko kona n iangoia, e kainnanoaki te kakaonimaki ao n tabetai te kairiri ae matoa ibukini buokan Ilaria bwa e na teimatoa n toua mwanekan te Kristian. I uringnga ae n te tai teuana, e takaakaro buaka nakon raoraona. Ti kabwarabwaraa nakoina man te Baibara bukin riaina n aki karaoa arei. Ti kairia bwa e na kabwaraa ana bure nakon raoraona i matara.

E kukurei n taekinna Ilaria bwa e kaitauia ana karo ibukini kaotiotan tangiran te mwakuri ni minita. Ao e a bati riki ootana ibukini kakawakin te ongeaba nakon Iehova ao irakin ana kaetieti ngkai e a mare.

TE ONGEABA N TAAI NI KANANOKAWAKI

N 2008, e a ataia Paolo bwa e a kaentia. N te moantai, e taraa n ae e kona ni marurung Paolo man te aoraki ae kakaiaki aei ao e korakora ana kaungaunga nakoiu. Irarikini kakaaeani bwainnaoraki aika rangi n ibuobuoki ake a tauraoi n te tai anne, I butiia Iehova ma Ilaria n ara tataro ae abwabwaki bwa e na buokira ni kaaitarai taai aika imwaira. E ngae n anne, I a tataraa te aomata are e korakora ngkoa bwa e a tabe ni mamaara teutana imwin teutana. E rotai te nanokawaki ae korakora ngke e a mate n 2010. I karekea kabebetean nanou ae bati mani baike ti a tia ni kakororaoi n tekatekara n taanga n te maan ae 45 te ririki. Ti angan Iehova ara kabanea n tamaroa. I ataia ae e na teimaani kakawakin ara mwakuri. Ao I ingainga ni kariariaa manga kautan Paolo n aron ana taeka Iesu n Ioane 5:​28, 29.

I iaiangoia bwa boni ngai te ataei ae uarereke arei are e tatangira rongorongon Noa. E bon tuai bitaki au motinnano. I kan ongeaba iroun Iehova n aki ongea te bwai ae I tuangaki bwa N na karaoia. I boni kakoauaa bwa bwaai n tutuki, angakarea ke baika I kabuai, a bon uarereke riki ni kabotauaki ma kakabwaia aika kakukurei mairoun Atuara ae tatangira. I a bon tia n rinanon aio ao I kaungako bwa e rangi ni manena naba ibukim.