“Kakaraoa Aei”
E na Karaoaki te Kauring n Eberi 5
1. Bukin tera bwa e kakawaki karaoan te Kauring?
1 “Kakaraoa aei bwa kanuringau.” (Ruka 22:19) N ana taeka Iesu akanne, ao e tuangia iai taan rimwina bwa a na karaoa kauringani matena are e anga bwa te karea. Ibukini kakororaoani bwaai ni kabane rinanon te karea ni kaboomwi, bon akea te bong ae kakawaki riki ibukia Kristian nakon te Kauring ae kakaraoaki ni katoa ririki. Ngkai e a uakaan Eberi 5 ae na karaoaki iai te kauring n te ririki aei, ti na kanga ngkanne ni kaotiota ara kakaitau nakon Iehova?—IKoro. 3:15.
2. Ti na kanga ni kaotiota ara kakaitau ibukin te Kauring ni karaoan ara ukeuke n reirei ao kananoan ara iango iai?
2 Katauraoi: Ti kakatauraoi ibukini baika ti iangoi bwa a kakawaki. Ti kona ni katauraoi nanora ibukin te Kauring, ngkana ti karaoa ara ukeuke n reirei n ara utu ao ni kananoi ara iango ni baike a riki n ana kabanea ni bong Iesu i aon te aba. (Etira 7:10) A kona n noraki kiibu ni kaineti ma anne aika karinanaki raoi n te karenta ao n te boki ae Neneran te Baibara ni Katoabong, ao iai naba kiibu aika bati riki aika karinanaki n te iteraniba ae karinaki n te Mwakuri ni Minita aei.
3. Ti na kanga ni kaotiota ara kakaitau ibukin te Kauring ni kabatiaan riki ara ibuobuoki n te mwakuri ni minita?
3 Te Uarongorongo: Ti kona naba ni kaotiota ara kakaitau ngkana ti kabatiaa riki ara ibuobuoki n te mwakuri ni minita. (Ruka 6:45) E na moanaki n te Kaonobong, Maati 17 karaoan te mwakuri ni katobibia te aonnaba, ae kaoaia aomata nakon te Kauring. Ko kona ni bita am babaire bwa ko aonga ni kabanea riki am tai n te mwakuri ni minita, tao n auxiliary bwaiania? E aera ko aki maroroakina aei ma am utu n ami Taromauri n Utu n te tairiki n te wiki ae imwina?
4. Baikara kakabwaia aika ti kona ni karekei ni kaean te Kauring?
4 Ai kakabwaiaakira ngaira ni kaean te Kauring ni katoa ririki! E rikirake kimwareireira ao tangiran Iehova iroura, n iaiangoan tituaraoina ngke e anga Natina ae ana rikitemanna bwa te kaboomwi. (Ioa. 3:16; 1Ioa. 4:9, 10) A a kairaki nanora man aei bwa ti na aki maiu i bon ibukira. (2Kor. 5:14, 15) A kaungaaki naba nanora bwa ti na karaoiroa Iehova i mataia aomata. (TaiAre. 102:19-21) Ni koauana, a ingainga nanoia ana toro Iehova aika kakaitau, nakon te tai ae a na “kaotiota iai maten te Uea” ni karaoan te Kauring n Eberi 5.—1Kor. 11:26.