Tera te Rongorongo ae Raoiroi?

1. Tera te rongorongo mairoun te Atua?

E tangiriia aomata te Atua bwa a na maiu ni kukurei n te aonnaba. E karika te aonnaba ma bwaina nako, ibukina bwa e tangiriia botannaomata. E a kaan te tai are e na karokoa iai te maiu ae tamaroa riki n taai aika a na roko, ibukia aomata n aaba nako. E na kabebeteia botannaomata man rawawataia.​—Wareka Ieremia 29:11.

Akea te tautaeka n aomata ae e a tia ni katoka te tiritiri, te aoraki, ke te mate. Ma iai te rongorongo ae raoiroi. E a kaan te tai are e nang onei mwin aia tautaeka aomata te Atua n ana tautaeka. A na maeka ma te rau ao te marurung te koraki ake a mena i aan ana tautaeka.​—Wareka Itaia 25:8; 33:24; Taniera 2:44.

2. Bukin tera bwa e rangi ni kakawaki te rongorongo ae raoiroi ni boong aikai?

E na toki te rawawata ngkana e a kamaunaia aomata aika buakaka man te aonnaba te Atua. (Tebania 2:3) E na riki anne n ningai? E a kaman taetae ni burabetinaki n Ana Taeka te Atua, taekani baika karawawataaki iai ngkai botannaomata. A kaotaki ni mwakuri aika buakaka aika riki n te aonnaba, bwa e a kaan ana tai te Atua ni kamauna te buakaka.​—Wareka 2 Timoteo 3:1-5.

3. Tera ae ti riai ni karaoia?

Ti riai n reiakina taekan te Atua man ana Taeka ae te Baibara. Kaanga ai aron te reta nakoira mairoun te karo ae tatangira. Ti tuangaki iai aroni karekean te kawai ibukin te kukurei ni maiura ngkai, ao aroni karekean te maiu are aki toki n te aonnaba n taai aika a na roko. Ni koauana, a kona n ribaiko tabeman ngkai e a reke buokam n ota ni kanoan te Baibara. Ma kioina ngkai e beritanna te Atua bwa ti kona ni karekea te maiu ae tamaroa riki n taai aika a na roko, ti aki riai ni kariaia tabeman bwa a na kabwarai nanora n reiakinan te Baibara.​—Wareka Taeka N Rabakau 29:25; Te Kaotioti 14:6, 7.