E Tabeakinira Ara Tia Karikiriki ae Tatangira
1. E KAOTAA TAAI ARA TIA KARIKIRIKI
Ko kona n iangoa aron te maiu n te aonnaba ae akea iai ootan taai? E anga te korakora taai nakon taian aroka bwa a na kona ni karikii baaia, ueeia, uaaia, ao ai koraaia. E buoki naba aroka bwa a na katika te ran man te tano rinanoni wakaaia ao ni karokoi ni baaia ao imwina a a manga kaotinakoi bwa buane n te ea.
2. E KABWAKAA TE KARAU ARA TIA KARIKIRIKI
Te karau bon ana bwaintangira te Atua ae rangi ni kakawaki ae buoka te aonnaba bwa e na karikii amwarake ibukira. E kabwakaa te karau te Atua ao e anganira boong ni mari bwa ti aonga ni kanuaira n te amwarake ao ni kaon nanora n te kimwareirei.
3. E KATAURAOI AMWARAKE AO KUNNIKAIRA ARA TIA KARIKIRIKI
A bati kaaro aika tabeaianga ni karekean amwarake aika tau ao kunnikai ibukia aia utu. Nora ana taeka te Baibara ae kangai: “Taraiia raoi mannikiba i annang, bwa a aki ununiki ke n tai, ke n rikoi uaan arokaia nakon auti ni kaikobwai, ma e ngae n anne, e kakaamwarakeia Tamami are i karawa. Tiaki kam kakawaki riki nakoia?”—Mataio 6:25, 26.
“Karekea reireiami mani kiebu aika rikirake n te tawaana . . . ma I tuangingkami bwa e ngae ngke moan te kaubwai [te Uea are] Toromon, ma e aki roko tamaroan ana kunnikai n tamaroan tekaina mai buakoia. Ngkana ngaia bwa aei aron te Atua ni kunnikaia arokan te tawaana . . . , tiaki e na kukurei riki ni kunnikaingkami?”—Mataio 6:28-30.
Ngkai e kona te Atua ni katauraoi amwarake ao kunnikai ibukira, e kona naba ni buokira ni karekei baika ti kainnanoi riki ni maiura. Ngkana ti ukoukora karaoan nanon te Atua, e kona ni kakabwaiaa ara kakorakora n ununiki ibukini kanara, ke e kona naba ni buokira ni karekea ara mwakuri bwa ti aonga ni kabooi baika ti kainnanoi.—Mataio 6:32, 33.
Ni koauana, iai bukina aika raraoi bwa ti na tangira te Atua ngkana ti iaiangoa taai, te karau, mannikiba, ao taian uee. E na maroroakinaki n te kaongora ae imwina aron ara tia Karikiriki n reitaki ma aomata.