Titiraki Mairouia Taani Wareware

E aera ngkai e taekinaki n 2 Tamuera 21:7-9 bwa Tawita “e kaotiota te atataiaomata . . . nakoni Mebiboteta” ao imwina e a manga anga Mebiboteta bwa e na tiringaki?

Tabeman ake a a tia ni wareka te rongorongo aei a boni mimi iai. Ma uoman mwaane aika aranaki bwa Mebiboteta aika irekereke ikai, ao ti kona n ataa te koaua ngkana ti rinanon te bwai ae riki.

Iai natin Uean Iteraera are Tauro mwaane aika itiman ao uoman aine. Ana karimoa bon Ionatan. Iai naba natina te mwaane ae arana Mebiboteta irouni buuna ni kewe ae Ritiba. E kakaongora bwa iai naba natin Ionatan ae arana Mebiboteta. Ngaia are bon iai natin Tauro ae arana Mebiboteta ao tibuna naba.

N te taina, ao e a ribaiia kaaini Kibeon ake a mena i buakoia Iteraera te Uea are Tauro ao e a kataia ni kamaunaia. N taraana ao a bati i buakoia ake a tiringaki. E teretere bwa e rangi ni bure anne. Bukin tera? Ibukina bwa n ana bong Iotua ao a karaoa te berita n raoi baatuan Iteraera ma kaaini Kibeon.—Iot. 9:3-27.

E teimatoa naba ni kamanenaaki te berita anne n ana tai te Uea are Tauro. Ma Tauro e kataia ni kamaunaia kaaini Kibeon. Ibukin anne, e a riki “te katuturaraa i aon Tauro ao i aoia kaaini batana.” (2Tam. 21:1) Imwina, e a riki Tawita bwa te uea. A kaongoa Tawita, kaaini Kibeon ake a reke maiuia taekan te bure ae kakaiaki aei. E tua Tawita bwa tera ae riai ni karaoaki ibukini kabwaraan ana bure Tauro bwa e aonga ni manga kakabwaiaaki abaia tibun Iteraera iroun Iehova. A aki tangira te mwane kaaini Kibeon, ma a tangira tiringakia itiman natin teuare ‘e bairea kamaunaakia.’ (WarIte. 35:30, 31) E kariaia anne Tawita.—2Tam. 21:2-6.

N te tai anne, e a tia ni mate Tauro ao Ionatan n te buaka, ma e maiu natin Ionatan ae Mebiboteta. E mwauku teuaei imwini kabuanibwaina ngke e uarereke ao e bon aki ira tibuna ni buakania kaaini Kibeon. A a tia ngkoa Tawita ma Ionatan ni berita ibukin reitakia, ike a a kona ni kakabwaiaaki iai ana kariki n ikotaki ma natin Ionatan are Mebiboteta. (1Tam. 18:1; 20:42) E kangai taekana: “E kaotiota te atataiaomata te uea [are Tawita] nakoni Mebiboteta are natin Ionatan, are natin Tauro, ibukin te taetae n tuea are karaoaki i matan Iehova.”—2Tam. 21:7.

Ma e kariaia Tawita aia bubutii kaaini Kibeon. E anganako bwa a na tiringaki uoman natin Tauro aika mwaane, are temanna mai buakoia boni Mebiboteta, n ikotaki ma niman tibun Tauro ake mwaane. (2Tam. 21:8, 9) Ana waaki Tawita aei, e a katoka iai te bure ibukin te katuturaraa i aoia Iteraera.

E bati riki ae nanonaki n te rongorongo aei. E mataata raoi iai ana tua te Atua aei: “A aki riai ni kamateaki naati ibukin te bwai ae a karaoia tamaia.” (TuaKau. 24:16) E na bon aki kariaia Iehova te bwai are e riki nakon natin Tauro ake uoman ma tibuna ake niman ngke arona bwa akea aia bure. E taekinaki riki aei n te tua anne: “E riai ni kamateaki te aomata tii ibukin oin ana bure.” E boni bae n iai irekerekeia kanoan Tauro ake itiman ma ana waaki Tauro ni kamaunaia kaaini Kibeon. Ngaia are a a bon anaa uaan aia mwakuri.

N te rongorongo aei, e katuruturuaki iai bwa te aomata ae karaoa te bure, e aki kona ni karekea aonana man iangoan ke taekinan ae e tii ira nanon te babaire. E taekinaki naba aei n te taeka n rabakau: “Kaboraoa raoi kawaini waem, ao ane a na eti kawaim ni kabane.”—TaeRab. 4:24-27; IEbe. 5:15.