Gbò Bíb E Gbò E Bà Bugi Bĩ́íná
Éé ní ea náa vaá 2 Sámuẹ̀l 21:7-9 à kọọ̀ Dévìd “beè ié tóè sàn kilma ló Mèfíboshẹ̀t” boo tṍó ea beè lọ̀à Mèfíboshẹ̀t bá kọ bàá fẹ́ẹ ẹ́?
Gbò e bà dõogẽ bugi tení boo nõ̀òtẽ́í a bĩ́íná bíbvá. Sõò mm̀ gbò gã́belá, bàà nen ní ea beè kọ̀là Mèfíboshẹ̀t e, vaá gè nó nú ea beè naaá é dọ bélè nèi.
Méné Sọ́ọ̀l ea dú Ízràẹ̀l beè ié àlàbà kà nvín págbálà nè bàà kà pábia. Béè a sã́áná beè kọ̀là Jónatàn. Tṍó e tṍó téní, a beè ié dõòna kà nvín págbálà ea bée kọlà Mèfíboshẹ̀t gbàà a gã̀ ea bée kọlà Rizpah. Béè nvín Jónatàn beè kọ̀là nàgé Mèfíboshẹ̀t. Vóà naa, nvín Sọ́ọ̀l nè nvín a nvín beè gbá kọ̀là Mèfíboshẹ̀t.
À íe tṍó e Méné Sọ́ọ̀l beè gbĩ́ gè fẹ́ dénè pá Gíbiòn e ba beè di zẹ̀ẹ̀ pá Ízràẹ̀l. À dọa bàlà kẽ kọọ̀ a beè fẹ́ gã́bug ọ̀và. Náa beè dú lé naa vó. Ló éé? Boo béè kọọ̀ mm̀ deè Jóshùàa, gbò e bà di togó buù kà tẽ́gã beè zọ̀ pá Gíbiòn bãaa mm̀ zíl fẹ́ẹ́-fẹẹ̀ ló.—Jós. 9:3-27.
Zílá beè dìvá gbàà dọ̀ọ̀mà tṍó e Méné Sọ́ọ̀l bẹl. Sõò ménéí beè lọ̀l togó kèbá zílá vaá gbĩ́ gè fẹ́ pá Gíbiòn. Vó beè naa kọọ̀ “miì nen [á] di bá Sọ́ọ̀l nè pá a tọ.” (2 Sám. 21:1) Dee deè nvée, Dévìd beè gbóó dú méné. Pá Gíbiòn e bà sígá beè kọ́ nú ea beè naaáá nèe. Dévìd beè gbóó bĩiná va bé e bàé láá vaalàẹ̀ gyọ́ọ gè uumá pọ́lọ́ e Sọ́ọ̀l beè sìa naa kọbé Jìhóvà tã́ànèè dee bá ba kunukẽ̀. Tãa vó e pá Gíbiòn bĩ́íná kpègè, ba beè kọ á tú àlàbà kà nvín gbálàa ea beè “noo gè” fẹẹ̀ vaá neè va bé bà fẹ́ẹ̀ va. (Nóm. 35:30, 31) Dévíd beè naa nú e bà bĩ́íná.—2 Sám. 21:2-6.
Besĩ́ à kalá dọ̀ tṍóá, ba beè fẹ́ Sọ́ọ̀l nè a nvín Jónatàn gbẹá dẽè bé, sõò nvín Jónatàn ea kọlà Mèfíboshẹ̀t beè di-dí dùm. Bùló nu beè naa kọ á gbẹá kọ̀và aa pá nvín vaá náa beè zọ̀ a nómá tẹ̀ naa uú boo pá Gíbiòn. Dévìd beè zọ̀ Jónatàn bã̀àa mm̀ zíl kọ bàé dúè bàà díì díílá kóò, ea é dọ bélè nè gbò nvín ea aàẹ́ m, bã̀àna Mèfíboshẹ̀t ea dú nvín Jónatàn. (1 Sám. 18:1; 20:42) Nòòtẽ́á kọ́ọ̀: ‘Méné [Dévìd] beè ié tóè sàn kilma ló Mèfíboshẹ̀t, nvín Jónatàn ea dú nvín Sọ́ọ̀l, boo béè zíl e Dévìd beè zọ̀ Jónatàn ea dú nvín Sọ́ọ̀l zilá gbẹá kèsĩ́ Jìhóvàa.”—2 Sám. 21:7.
Náa kal ló béè vó, Dévìd beè naa nú e pá Gíbiòn bĩ́íná. A beè tú bàà kà nvín Sọ́ọ̀l nèva, e béè enè ọ̀và beè kọ̀là Mèfíboshẹ̀t, bií ló vòò kà pá nvín a nvín. (2 Sám. 21:8, 9) Nú e Dévìd náaí beè naa kọọ̀ mii á gá dina ból tọ́ọ̀ nen gbẹá boo kunukẽ̀a.
Nòòtẽ́í bọọ èlmà pọ́ì nú ea beè naaá. Log Bàrì náa beè tàvàlà ge dã́tẽ́ ló. A beè kọọ̀: “Bàá gá fẹ́ gbò pá nvín boo béè nú e ba tẹ̀ náa.” (Dìt. 24:16) Jìhóvà náa gáẹ̀ beè tenmá kọ bàá fẹ́ bàà kà nvín Sọ́ọ̀l bií ló vòò kà pá nvín a nvín be bà náa beè sí pọ́lọ́. Logá beè kpáá kọọ̀: “Fẹi nen boo béè pọ́lọ́ e ẹlẹ sí.” Be à sẹlẹ bàà kà nvín Sọ́ọ̀l bií ló vòò kà pá nvín a nvín e ba beè fẹ̀a beè zọ̀ Sọ́ọ̀l noo gè fẹ́ dénè pá Gíbiòn. Vó beè naa kọ bàá fẹ́ va dẽè pọ́lọ́ e áá ọ̀và beè sì.
Nòòtẽ́í tẹ́lẹ bàlà kẽ kọọ̀ nen ea sí pọ́lọ́ náa é láá leevè bel a bá tení dú ló gè bugi togó àbèè ge kọọ̀ nú e ba beè kọ á naa ní ea náanìèe. Kpá Próvẹẹ̀b kọ́ọ̀: “Sí tóm ló èèlè eo gé téní boo leevè, mè dénè nu eo gé náa é íe togó.”—Próv. 4:24-27; Ẹ́fẹ. 5:15.