Àé láá dú kọọ̀ o kpeesĩ́ ló nàà uú boo ea aa bá pá bọọ tọ, àbèè kọọ̀ o sọbá sìgà nu boo béè ge tú Boǹ Méné Bàrì naamá túá kà nu mm̀ o dùm. (Máát. 6:33) Be à dì naa vó, òé láá agala boo kọọ̀ Jìhóvà mon tóm eo gé sí mm̀ bọ́ọ̀ló dẹ̀lẹ̀ nyíé boo. (Híb. 6:10) Àé láá dú kọọ̀ o mon bé e bel e Jíízọ̀s beè lòa dú kà-kà naa, a beè kọọ̀: “Nen ea sọbá tọ, àbèè pá a vígà, àbèè a kà, àbèè a tẹ̀, àbèè pá a nvín, àbèè a ól boo béè ge nyoone nvéè nda nè ge ló lé kpẹ̀aí, é íé vòò tub tóm tọ, nè pá vígà, nè kà, nè gbò pá nvín, nè ól bií ló bíígá ló mm̀ nakà bàlà booí, vaá mm̀ bàlà boo ea é dú, à íena gé dùm e bè náa tá.” (Máàk 10:​29, 30) Gbò tã́áná dee bá eo ni íe palàge bọọ èlmà gbò nú eo ni sọbá boo béè ge fã̀ Bàrì.​—Ps. 37:4. w24.03 9 ¶5

Kíì gyã́á beè dọ Jùdíà vaá a beè iná ló gbò níí Kráìst e ba beè di kĩá. Tṍó e pá vígà e bà di Ántìọ̀k dã́ naa vó, ba beè “bilá ló kọ buù ọ̀và á lọ̀làgì nu nyòòmà bé e bá buù ọ̀và tóólá naa domá, kọbé bà nveemàè bá nèe ba gbò vígà mm̀ Kráìst e bà di Jùdíà.” (Tóm 11:​27-30) Náa kal ló béè kọọ̀ pá vígà e kíi beè dọ lóá ólò tõó kpã́á, gbò níí Kráìst e bà di Ántìọ̀k beè beeláfùl ge nvèè bá nèva. (1 Jọ́ọ̀n 3:​17, 18) Beele é láá zogè nàgé kọ è íèè tóe sàn tṍó e dã́à kọọ̀ búùló kyọ̀àsĩ́ nu nááá ló pá vìgà. È ólò valẹ̀bá nè lóó​—tení dú ló gè bĩiná gbò kànen be à íe tóm eé láá sì mm̀ ge nvèèmà bá, ge nè lọ̀là-lọ̀là, àbèè ge tãagã ló Bàrì má pá vígà e búùló kyọ̀àsĩ́ nu nááá lóá. Pá vígà págbálà nè pábia é láá ié nágé bíi ló nvèè bá kọbé bà láá ié nu gè tõoma dùm. Tṍó e bẹẹ Méné Kráìst Jíízọ̀s, é dú gé tú bèèla bel tẹlẹ boo gbò pọ́lọ́ lab dògò, è gbĩ́ì kọ á mòn kọ è íè tóe sàn naa ní ea é kọ́ nèi kọọ̀, “dui gé bãí kĩée e Bàrì gé lẹẹlà bel.”​—Máát. 25:​34-40. w23.07 4 ¶9-10; 6 ¶12

Jíízọ̀s beè nó dùm gbọ́ọ́-gbọọ̀ ló lọl bá Jìhóvà. A beè lẹ̀ẹ̀làẹ domá boo kunukẽ̀í kọ á gé kọ́ kpẹ̀a nè “pá Ízràẹ̀l e bà bélí naanà ból ea pe.” Sõò a beè zogè kọ à dúè gbọ́ọ́-gbọọ̀ ló tṍó ea géè sí tómí. À íe tṍó e ene kà ńnváá e náa dú Ízràẹ̀l beè bànee kọ á bóè a nvín pábia e “zọ di m . . . , ea gé túe sĩ́ sĩg kẽ.” Jíízọ̀s beè tó sàn ńnvááá vaá bó a nvín pábia. (Máát. 15:​21-28) Bugi togó boo dõona kà nu dòòmà bá. Tṍó ea ã́àa dààmà togó a sìtóm kọ̀ kpẹ̀a, Jíízọ̀s beè kọọ̀, “Nen ea amam sàn . . . , nda é amànàe gé sàn.” (Máát. 10:33) Sõò, é kọ a beè àmà sàn Pítà ea beè àmàe sàn taà tómá? Ẽ́èe. Jíízọ̀s beè tó sàn Pítà boo béè kọ a beè ọgá vaá ié zìgà. Jíízọ̀s beè sila ló Pítà tṍó ea kẽeà aa kemà ú, vaá naa kọ á nyimá kọ à vulèèe nè ge kọ a beè iàẹ̀ ló neèe. (Lúùk 24:​33, 34) Jìhóvà nè Jíízọ̀s Kráìst íe dùm gbọ́ọ́-gbọọ̀ ló. Èé kọ́ vàẹ kilma ló beele é? Jìhóvà gbĩ́ kọọ̀ é dú gbọ́ọ́-gbọọ̀ ló. w23.07 21 ¶6-7