Gbò Bíb E Gbò E Bà Bugi Bĩ́íná
Éé ní e Jíízọ̀s géè kọ̀ tṍó ea kọ́ọ̀: “Ó gá iei bùlà kọ m beè dù ló gè tú kũ̀ùnà mòn domá boo bàlà booí” é?
Jíízọ̀s beè vee kọọ̀ gbò nen á ié kũ̀ùùnà mòn. Sõò à íe tṍó ea beè kọ́ nè pá a gbò tóm kọọ̀: “Ó gá iei bùlà kọ m beè dù ló ge tú kũ̀ùnà mòn domá boo bàlà booí. Èègà mòn ní em beè domá ẽ́, mè níì kũ̀ùnà mòn nì. M beè dù gé tú èègà mòn tẹlẹ gbàà nvín págbálà nè a tẹ̀, gbàà nvín pábia nè a kà, nè gbàà va nè a kà dóm.” (Máát. 10:34, 35) Éé ní e Jíízọ̀s géè kọ̀ ẹ?
Jíízọ̀s náa géè gbĩ́ gè naa kọọ̀ pò-pòòà á di zẹ̀ẹ̀ pá tọ, sõò a beè nyimá kọọ̀ pò-pòòà é di zẹ̀ẹ̀ sìgà pá tọ. Vóà naa, àé dú bíi kọọ̀ gbò e bà gbĩ́ gè nyoone nvéè Kráìst vaá dììa múú á dã́ból ló kọọ̀ nyíè sìgà pá ba tọ náa é ẹ́ẹ ló ba béèlàfùl. Beè dóm àbèè vaà nen ea gé nyoone Kráìst, àbèè dõòna gbò ea dṹùnà va náa uú vá boo, àé láá tàvàlà vá ló gè gbàntṍ ló nòòmànù Kráìst.
Kpá Káí síè kpóó ló gbò nyòòne nvéè Kráìst kọ bàá zọ̀ ‘dénè nen tõoa mm̀ fẹ́ẹ́-fẹẹ̀ ló.’ (Róm̀ 12:18) Sõò nòòmànù Jíízọ̀s é láá belí “gẹ̀ bé” ea di zẹ̀ẹ̀ sìgà pá tọ. Níí ólò naaá tṍó e enè nen ea di mm̀ tọ ziga ló nòòmànù Kráìst vaá nagbòa à kìn àbèè ge bé uú boo. Tṍó ea meà naa vó, pá tọá “náa é gbĩ́ gè mònie mii.”—Máát. 10:36.
Sìgà tṍó, gbò nyòòne nvéè Kráìst e bà di mm̀ tọ e tẹ̀ àbèè kà náa ólò fã̀ Bàrì é láá kpeesĩ́ ló dìtõ̀ò ea é doà ba bọ́ọ̀ló dẹ̀lẹ̀ nyíé boo. Dì belí nu dòòmà bá, pá ba dúà ló e bà náa ólò fã̀ Bàrì é láá tãagẽ́ va kọ bàá zọẹ̀ va sẹlẹ sẹ̀lẹ̀nù e ba bõ̀ònaló fã̀ ólò sẹlẹ? Tṍó ea meà naa vó, mée ní e bàé gban tṍ lóé? Jíízọ̀s beè kọọ̀: “Kọ̀láá nen ea vulè a tẹ̀ àbèè a kà èlmà nda náa bọ́ ló ge nyooném nvée.” (Máát. 10:37) Mm̀ kà kà, Jíízọ̀s náa géè kọọ̀ gbò nen é íè ge lọl ló togó kèbá ba tẹ̀ nè ba kà kọbé bà láá nyòònèèe nvée. Tãa vó à géè noòmà va bé e bàé láá nè béèlàfùl boo nú ea palàge dú bíi mm̀ ba dùm naa. Beè pá bẹẹ tọ e bà náa ólò fã̀ Bàri náa uú boo bẹẹ gè fã̀ Jìhóvà, èé kilsĩ́ gè vùlè va, sõò Bàrì ní eé palàge vùlèe.
Mm̀ kà kà, nàà uú boo ea aa bá pá tọ é láá palàge biiléi nyíe. Sõò gbò nyòòne nvéè Jíízọ̀s é kilsĩ́ gè kẽ̀èa boo a bel ea kọ́ọ̀: ‘Nen e bè á gé kpènà ló ge mòn tãàgà vaá ú belí bé e nda é ú naa, náa bọ́ló ge nyooném nvée.’ (Máát. 10:38) Gbáló vó, gbò nyòòne nvéè Kráìst ólò ẹ̀b kọọ̀ nàà uú boo ea aa bá pá tọ di zẹ̀ẹ̀ gbò tã̀àgã̀ e bàé ĩimàè. Bà ólò dẹlẹ nagé nyíé boo kọọ̀ ba lé láb é láá naa kọọ̀ pá ba tọ e bà náa ólò fã̀ Bàrì á nyaaná bùlà vaá nó Kpá Káí.—1 Pít. 3:1, 2.