Gbò Bíb E Gbò E Bà Bugi Bĩ́íná

2 Tẹ̀sàlónaikà 3:14 kọ́ é ‘Palàge bii dẽesĩ́’ sìgà gbò. É kọ níà nú e buù nen ea di mm̀ bõ̀ònatõ̀ò é náa, sẹ̀ gbò kànen ní e bà é náa vó é?

Tṍó e neǹ tóm Pọ́ọ̀l beè emí kpá má pá vígà e bà di Tẹ̀sàlónaikà, a beè kọ́ nè va kọọ̀: “Palàge biilii dẽesĩ́ nen e bè náa gbantṍ ló nú e beele émì mm̀ kpáí.” (2 Tẹ̀s. 3:14) Tṍó ea kil nvéeá, e beè olòó kọọ̀ gbò kànen ní e nakà tùleí dì nè ẽ. Be à íe neǹ vígà e náa tõó boo gbò dùùlà bá deè tṍ ea di mm̀ Kpá Káí bã̀àna tṍó e gbò kànen ni ló bel nèe gã́bug tṍó, gbò kànen ólò láá beeláfùl ge nèe ã̀àne tení dú ló gè nè lòbèl gbẹá kèsĩ́ zivekà bõ̀ònatõ̀ò. Lòbèla ólò naa kọọ̀ pá vígà á bii dẽesĩ́ íb nen ea dì belí vó, vaá bà náa ólò zọ̀ nà nená naaá tọ́ọ̀ nu daalá lọl ló ge zọ̀ẹ sí nònù nè ge kọ́ kpẹ̀a.

Sõò kátogóí, è dã́à ból ló kọ dùùlà bá deè tṍ e Pọ́ọ̀l beè nèa tõó dọ̀ kọọ̀ buù nen ea di mm̀ bõ̀ònatõ̀ò á nè béèlàfùl kilma ló nú e bà é náa. Vóà naa, náa dú ná bíi kọọ̀ gbò kànen á nè lòbèl ea é ãane pá vígà kọ bàá bii dẽesĩ́ neǹ vígà e náa tõó boo gbò dùùlà bá deè tṍ ea di mm̀ Kpá Káí. Éé ní ea náa vaá è nyaaná bá ló bé e beè olòó dã́ ból ló nú ea di mm̀ 2 Tẹ̀sàlónaikà 3:14 é? Bugi togó boo nú e Pọ́ọ̀l géè ló bel kilma ló tṍó ea ne nakà dùùlà bá deè tṍá.

Pọ́ọ̀l beè mòn kọọ̀ sìgà gbò e bà di mm̀ bõ̀ònatõ̀ò géè labví láb e náa bọ́ló vaá bà náa beè zìgà ge tõó boo gbò dùùlà bá deè tṍ ea di mm̀ Kpá Káí. Besĩ́ à kalá dọ̀ tṍó ea né va dùùlà bá deè tṍá, a beè kọ́ nè va kọọ̀: “Nen e bè náa gbĩ́ gè sí tóm, á gá dé gyã́á.” Sõò bã̀àna tṍó ea ni né va dùùlà bá deè tṍá lọ̀l, sìgà gbò e ba beè di mm̀ bõ̀ònatõ̀òa beè dú kpọ̀lọ̀ vaá bà náa beè zìgà gé sí tóm naa ní e bà é íe nu gè tõ̀òma dùm náa kal ló béè kọọ̀ ba beè ié kói e bà gáẹ̀ beè láá siimá tóm. Gbá ló vó, ba beè olòó ló bel e náa kuú va. Mó bá ní ea beè dú bíi kọ gbò e bà géè nyoone nvéè Kráìst á sẹ̀ẹ̀mà íb gbò e bà dì naa vó é?​—2 Tẹ̀s. 3:​6, 10-12.

Pọ́ọ̀l beè kọ́ nè va kọọ̀ “Palàge biilii dẽesĩ́ íb nen ea dì belí vó. Moǹ bel Gríìk e Pọ́ọ̀l beè loomá bel kĩí tõó dọ̀ kọ bàá palàge ié ọ̀ẹ̀ dẽe kọbé íb nen ea dì belí vó náa kyọ́ va. Vóà naa Pọ́ọ̀l géè ló belá nè dénè nen ea di mm̀ bõ̀ònatõ̀ò, níì áá gbò kànen nì. (2 Tẹ̀s. 1:1; 3:6) Boo béè vó, buù nen ea di mm̀ bõ̀ònatõ̀ò é láá sà kọ náa é zọẹ̀ neǹ vígà e náa tõó boo gbò dùùlà bá deè tṍ ea di mm̀ Kpá Káí naaá nu.

É kọ níí tõó dọ̀ kọọ̀ bà é sẹlẹ nená belí nen e ba beè kpòòlà lọl mm̀ bõ̀ònatõ̀ò? Ẽ́èe. Pọ́ọ̀l beè kpáá kọọ̀: “Duulaíe bá deè tṍ dìgà belí bọọ vígà.” Vóà naa, gbò e bà di mm̀ bõ̀ònatõ̀ò é láá zọ̀ nená ĩiá tẽ́ kẽ gbẹá nònù vaá zọ̀ẹ kọ́ kpẹ̀a, sõò bà náa é zọ́ẹ naaá dõona kà nu. Ló éé? Pọ́ọ̀l beè kọ bàá naa vó “kọbé kẹ́ẹ sííe.” Tṍó e née zọọ̀ nen ea dì belí vó naaá nu, kẹ́ẹ é sííe naa ní ea é nyaaná bé ea ólò labví láb naa vaá naa nú ea dú lé.​—2 Tẹ̀s. 3:​14, 15.

Mósĩ́ deè ní e gbò e bà gé nyoone nvéè Kráìst deè nieí é láá tú dùùlà bá deè tṍí siimá tóm ẽ́? Túá kà, èé zẹ́ẹ́ agala boo kọọ̀ nená gé lábví gbò láb e neǹ tóm Pọ́ọ̀l beè kọ́ nú ea kil ló mm̀ dọ̀ Kpá Káíá. Pọ́ọ̀l náa géè ló bel kilma ló gbò e ba kpóó bug sọ́va tọ́ deè kọ bàá naa nú ea dú kèle ló ńbeele, sõò nú e bà náaá náa bé uú boo nòòkúu ea di mm̀ Kpá Káí. Vaá náa géè ló bel kilma ló gbò e bà náa nú ea kyẽ́i. Tãa vó, à géè ló bel kilma ló gbò e bà nyímá ló nú e Kpá Káí kọ́, sõo bà sa gè naa nú ea dú pọ́lọ́.

Deè nieí, be è mon neǹ vígà e náa tõó boo gbò dùùlà bá deè tṍ ea di mm̀ Kpá Káí,a èé láá beeláfùl kọ née é zọ íb nen ea dì naa vó naaá nu. Tã́gíní bé ea dú béèlàfùl buù nená, náa bọ́ló kọ é zọ̀ dõona gbò e níì pá bẹẹ tọ nì loá bel boo. Èé láá zọ̀ nená naaá nu gbẹá nònù nè tṍó e gé kọ́ kpẹ̀a. Vaá èé láá kpáá zọ̀ nená naaá dõona kà nu be à nyááá.