SEGUNDA CARTA ÓS TESALONICENSES

1 De parte de Paulo, Silvano* e Timoteo para a congregación dos tesalonicenses que está unida a Deus, o noso Pai, e ó Señor Xesucristo:

2 Que teñades bondade inmerecida e paz de parte de Deus, o Pai, e do Señor Xesucristo.

3 Irmáns, sempre nos sentimos obrigados a darlle grazas a Deus por vós. E é xusto que o fagamos porque a vosa fe está medrando moitísimo, e o amor que todos e cada un de vós sentides uns polos outros está aumentando. 4 Por iso falamos de vós con orgullo ás congregacións de Deus, polo aguante e a fe que demostrades no medio de tanta persecución e das dificultades que estades pasando. 5 Isto demostra que o xuízo de Deus é xusto e fai que se vos considere dignos do Reino de Deus, que é a razón pola que en realidade estades sufrindo.

6 De feito, é xusto que Deus castigue con tribulación ós que vos están causando sufrimentos*. 7 Pero vós, que estades pasando por sufrimentos*, deixaredes de sufrir, igual ca nós. Isto pasará cando o Señor Xesús apareza* desde o ceo cos seus poderosos anxos 8 entre chamas de lume, cando se vingue dos que non coñecen a Deus e dos que non aceptan as boas noticias sobre o noso Señor Xesús. 9 O noso Señor xulgaraos e o seu castigo será a destrución eterna. Así, serán eliminados de diante del e da súa gloriosa forza. 10 Isto pasará cando el veña para ser glorificado cos seus santos* e admirado por tódolos que demostraron fe. Vós, que crestes o testemuño que vos demos, estaredes entre eles.

11 Por iso oramos sempre por vós, para que o noso Deus vos considere dignos da vida á que vos chamou, e para que complete co seu poder todo o bo que quere facer e todo o que estivestes facendo motivados pola fe*. 12 Así, o nome do noso Señor Xesús será glorificado polo que facedes e vós seredes glorificados porque estades unidos a el, de acordo coa bondade inmerecida do noso Deus e do Señor Xesucristo.

2 Pero, irmáns, no que ten que ver coa presenza* do noso Señor Xesucristo e co feito de que imos ser reunidos con el, pedímosvos 2 que non perdades facilmente o bo xuízo. Tampouco vos asustedes por unha mensaxe inspirada*, nin por unha mensaxe transmitida de maneira oral, nin por unha carta que pareza nosa e que diga que xa chegou o día de Xehová*.

3 Que ninguén vos engane* de ningunha maneira, porque antes de que chegue ese día ten que vir a apostasía* e ten que quedar ó descuberto* o home que desafía a lei, o fillo da destrución. 4 El é un opositor e ponse por enriba de todo o que a xente considera un deus e de calquera cousa que se adore. Desta maneira, séntase no templo de Deus e preséntase publicamente coma se fose un deus. 5 Non vos acordades de que eu xa vos dicía estas cousas cando aínda estaba con vós?

6 Agora xa sabedes quen* está facendo de barreira*, para que o home que desafía a lei quede ó descuberto ó tempo debido. 7 É certo que a maldade deste home que desafía a lei, que está escondida, xa está actuando. Pero vai seguir escondida ata que desapareza quen agora está facendo de barreira. 8 Entón, o home que desafía a lei quedará ó descuberto*, e o Señor Xesús destruirao co poder que sae da súa boca* cando a presenza do Señor se faga evidente. 9 Pero a presenza do home que desafía a lei débese á influencia de Satanás, que lle dá poder para facer todo tipo de obras poderosas, cousas impresionantes, milagres* falsos 10 e todo tipo de enganos inxustos que van dirixidos ós que van camiño á destrución. Eles van ser destruídos como castigo por non aceptar e amar a verdade que os podería salvar. 11 Por iso Deus permite que unha influencia enganosa os confunda para que crean na mentira, 12 e que así todos sexan xulgados porque non creron a verdade, senón que desfrutaron da inxustiza.

13 Irmáns, Xehová* quérevos moito. Nós sempre nos sentimos obrigados a darlle grazas a Deus por vós, porque vos escolleu desde o principio para a salvación. Fixo isto ó santificarvos co seu espírito pola vosa fe na verdade. 14 Foi para isto para o que el vos chamou por medio das boas noticias que anunciamos, para que poidades conseguir a gloria do noso Señor Xesucristo. 15 Así que, irmáns, mantédevos firmes e apegádevos ás cousas que se vos ensinaron, fose de palabra ou nunha carta nosa. 16 Ademais, que o noso Señor Xesucristo e Deus, o noso Pai, que nos amou e nos deu o consolo eterno e unha esperanza marabillosa por bondade inmerecida, 17 vos consolen* e vos fortalezan* para que sempre fagades e digades o que está ben.

3 Por último, irmáns, seguide orando por nós para que a palabra de Xehová* siga estendéndose rapidamente e siga sendo glorificada entre a xente, igual que está sendo glorificada entre vós. 2 Seguide orando tamén para que se nos libre dos homes malvados e perversos, porque non todo o mundo ten fe. 3 Pero o Señor é fiel á súa palabra, e el fortaleceravos e protexeravos do Maligno*. 4 E nós, como seguidores do Señor, confiamos en que estades obedecendo as nosas instrucións e que o seguiredes facendo. 5 Que o Señor siga guiando os vosos corazóns para que amedes a Deus e mostredes o aguante que necesitades para servir o Cristo.

6 Agora, irmáns, no nome do noso Señor Xesucristo, dámosvos instrucións de que vos apartedes de calquera irmán que se comporte de maneira indisciplinada* e que non siga o que recibistes* de nós. 7 Vós sabedes o que tedes que facer para imitarnos, porque non nos comportamos de maneira indisciplinada* cando estivemos con vós 8 nin lle pedimos a ninguén que nos dese comida gratis. Todo o contrario, traballamos día e noite sen descanso e con moito esforzo para non ser unha carga económica para ningún de vós. 9 E non é porque non teñamos dereito a pedir algo*, senón porque queriamos poñervos un bo exemplo para que nos imitásedes. 10 De feito, cando estabamos con vós xa vos dabamos esta orde: “Se alguén non quere traballar, que tampouco coma”. 11 Pero escoitamos que algúns están comportándose de maneira indisciplinada* entre vós porque, en vez de traballar, métense nas cousas dos demais. 12 A esas persoas mandámoslles e suplicámoslles* polo Señor Xesucristo que traballen ocupándose dos seus propios asuntos e que coman o que ganen por elas mesmas.

13 Pero vós, irmáns, non vos cansedes de facer o que está ben. 14 E se algún non obedece o que dicimos nesta carta, mantédeo sinalado e deixade de relacionarvos con el, para que se avergonce. 15 Aínda así, non o vexades como un inimigo. En vez diso, seguídeo aconsellando como a un irmán.

16 Que o Señor da paz vos dea paz en todo momento e en todo. Que o Señor estea con todos vós.

17 Eu, Paulo, escríbovos este saúdo coa miña propia man, que é o sinal que identifica tódalas miñas cartas. Así é como escribo.

18 Que a bondade inmerecida do noso Señor Xesucristo estea con todos vós.