Como a guerra e os conflitos violentos nos afectan a todos

A guerra pode empezar en lugares que agora están en paz. Incluso os que están lonxe dun conflito poden verse afectados, pois o mundo está máis interconectado ca nunca. E os danos séguense sufrindo moito despois de que acabe a guerra. Vexamos algúns exemplos:

• 

  Falta de comida. Segundo o Programa Mundial de Alimentos, “os conflitos seguen sendo a principal causa da fame, dado que o 70% das persoas que a sofren viven en zonas afectadas pola guerra e pola violencia”.

• 

  Danos físicos e mentais. O medo á guerra e a inseguridade que esta produce pode facer que a xente sufra estrés e ansiedade. Os que viven en zonas onde hai conflitos non só son máis propensos a sufrir danos físicos, senón tamén mentais. E, tristemente, na maioría dos casos non poden conseguir a axuda médica que necesitan.

• 

  Desprazamentos forzados. Segundo o Alto Comisionado das Nacións Unidas para os Refuxiados, ata setembro de 2023 máis de 114 millóns de persoas por todo o mundo foron forzadas a fuxir das súas casas. A principal causa disto son a guerra e os conflitos armados.

• 

  Problemas económicos. A miúdo a xente pasa por problemas económicos causados pola guerra, como a inflación. Quizais sofren cando os recursos do goberno destinados para a saúde e a educación se redirixen a financiar operacións militares. Ademais o custo de reconstrución despois da guerra é enorme.

• 

  Problemas medioambientais. As persoas sofren cando se destrúen deliberadamente os recursos naturais dos que dependen. A contaminación da auga, do aire e da terra pode causar moitos problemas de saúde e, incluso despois da guerra, a xente pode resultar ferida polos explosivos que quedaron.