7. Valores

QUE IMPLICA

Os valores son principios que rexen o comportamento das persoas. Por exemplo, se te esforzas por ser honrado en todo, seguro que intentarás que os teus fillos tamén o sexan.

Estes valores tamén inclúen principios éticos, por exemplo ensinarlles a ser traballadores, xustos e a preocuparse polos demais. Cando alguén é novo é máis fácil que se quede con estes valores.

O QUE DI A BIBLIA: “Afai ó mozo ó seu vieiro: aínda de vello non se apartará del” (Proverbios 22:6).

POR QUE É IMPORTANTE

Os valores morais son fundamentais na era dixital. Unha nai chamada Karyn di: “Por medio dos aparellos electrónicos, os nosos fillos poden ser vítimas das malas influencias en calquera momento. Incluso mentres están sentados ó noso lado poden estar vendo algo que non está ben”.

O QUE DI A BIBLIA: “A mantenza sólida é para xente grande, que ten o sentido xa afeito polo costume e é capaz de distingui-lo bo do malo” (Hebreos 5:14).

Os valores éticos tamén son fundamentais. Isto inclúe ter bos modais, por exemplo, pedir as cousas por favor ou dar as grazas. Pero tamén inclúe preocuparse polos demais, algo que é cada vez máis raro, xa que parece que a xente lles presta máis atención ós aparellos electrónicos que ás persoas.

O QUE DI A BIBLIA: “Tratade á xente tal como queredes que vos traten a vós” (Lucas 6:31).

QUE PODES FACER

Déixalles claro cales son os teus valores morais. Por exemplo, hai estudos que demostran que é máis probable que os adolescentes non teñan relacións sexuais antes de casar se se lles di con claridade que iso está mal.

CONSELLO: Usa algo que pasou hai pouco para falar sobre os valores. Por exemplo, se nas noticias se fala dun delito de odio, podes dicir algo como: “É horrible que algunhas persoas traten con tanto odio a outras. Por que pensas que a xente chega ata ese punto?”.

“É moito máis difícil para os rapaces escoller entre o ben e o mal se non saben que está ben e que está mal” (Brandon).

Ensínalles valores éticos. Incluso ata os nenos máis pequenos poden aprender a pedir as cousas por favor e a dar as grazas, e tamén a preocuparse polos demais. O libro Parenting Without Bordersa (Pais sen fronteiras) di: “Canto máis conscientes sexan os nenos de que forman parte de algo máis grande ca eles, é dicir, da familia, da escola ou da comunidade, máis dispostos estarán a facer cousas boas polos demais en vez de mirar só por eles”.

CONSELLO: Encárgalles ós teus fillos algunha tarefa para ensinarlles a importancia de axudar ós demais.

“Se os teus fillos collen o costume de colaborar coas tarefas da casa, estarán máis preparados para cando se independicen porque xa saberán cumprir coas súas responsabilidades” (Tara).