UN MUNDO EN CRISE

4 | Mantén a esperanza

POR QUE É IMPORTANTE?

A ansiedade polos problemas do mundo pode afectarlles ás persoas física e emocionalmente. Por culpa diso moitos perderon a esperanza e non pensan que haxa luz ó final do túnel. Como se comportan?

Deixan de pensar no futuro.
Calman as penas con alcohol e drogas.
Hai quen incluso se pregunta “Para que seguir loitando?” e pensa que é mellor morrer.

O que deberías saber

Algúns dos problemas ós que te enfrontas quizais sexan temporais e poden cambiar para mellor en calquera momento.
Incluso se a túa situación non cambia, hai cousas que podes facer para soportala.
A Biblia promete unha solución permanente para os problemas da humanidade.

O que podes facer xa agora

O que di a Biblia: “Así que non vos angustiedes polo día seguinte, porque o día seguinte terá as súas propias preocupacións. Xa chega cos problemas que hai cada día” (Mateo 6:34).

Vai día a día. Non deixes que as preocupacións de mañá che impidan facerte cargo das responsabilidades que tes hoxe.

Preocuparte polas cousas negativas que poderían pasar só che fará sentir máis estrés e debilitará a túa esperanza dun futuro mellor.

COMO FACERLLE FRONTE. Algúns consellos

CÉNTRATE NO POSITIVO

O que di a Biblia: “Tódolos días do desgraciado son tristes; para o de ánimo alegre, un banquete continuo” (Proverbios 15:15). Se te centras demasiado no problema é posible que non poidas ver a solución. Pero, se tes unha actitude positiva, poderás encontrar maneiras de enfrontarte a esa situación.

Limita o tempo e a atención que lles dedicas ás noticias.
Ó final de cada día, fai unha lista de dúas ou tres cousas polas que podes estar agradecido.
Fai unha lista só co que podes facer hoxe. Divide as tarefas grandes noutras máis pequenas para poder ver os resultados ó final do día.

PIDE AXUDA

O que di a Biblia: “O que se illa [...] rexeita toda sabedoría práctica” (Proverbios 18:1, TNM). Ti só non podes saír dun pozo profundo. Necesitas que che boten unha man.

Pídelle á túa familia ou amigos que che axuden.
Busca maneiras nas que ti lles podes axudar a eles. Facer cousas por outros permitirache ver os teus problemas con outra perspectiva.
Se perdiches a esperanza e sentes que non ten sentido vivir, pensa en buscar axuda médica. Ás veces sentirse así é un síntoma de que tes unha enfermidade, como a depresión. A moita xente foille ben seguir un tratamento médico.a

a Despertade! non recomenda ningún tratamento en particular.

A Biblia dános verdadeira esperanza

Hai moitos anos, un salmista díxolle a Deus en oración: “A túa palabra é o faro [ou lámpada] dos meus pés” (Salmo 119:105). Analiza como a Biblia, a Palabra de Deus, é coma unha lámpada.

Nunha noite escura, unha lámpada permítenos ver por onde camiñar. De maneira parecida, a Biblia contén consellos prácticos que nos poden guiar cando teñamos que tomar unha decisión difícil.

Unha lámpada pode iluminar o noso camiño e permitirnos ver que hai máis adiante. Do mesmo xeito, a Biblia pode mostrarnos o que nos espera no futuro.

A Biblia é un libro sagrado que non só fala da orixe da humanidade. Tamén dá unha esperanza verdadeira para o futuro. Responde estas preguntas:

Como?

Como empezou o sufrimento? A Biblia di que “o pecado entrou no mundo por un home só, pero como polo pecado entrou a morte, a morte pasou a tódolos homes e, en consecuencia, todos quedaron incursos no pecado” (Romanos 5:12).

Por que?

Por que os seres humanos non puidemos arranxar os nosos problemas? A Biblia explica que “o home non é dono do seu camiñar” (Xeremías 10:23). Os problemas deste mundo demostran que isto é un feito.

Que?

Que fará Deus para arranxar esta situación? A Biblia mostra que el “enxugará tódalas bágoas dos seus ollos, e a morte xa non existirá máis. Nin haberá máis loito nin pranto nin dor” (Apocalipse 21:4).