O anxo de Xehová protexe a Ezequías

O imperio de Asiria conquistara as dez tribos de Israel. E agora Senaquerib, o rei de Asiria, quería facer o mesmo coas dúas tribos de Xudá. Así que comezou a conquistar as cidades de Xudá unha a unha. Tíñalle moitas ganas a Xerusalén, pero o que non sabía era que Xehová protexía esa cidade.

Ezequías, o rei de Xudá, pagoulle moitos cartos a Senaquerib para que non atacase Xerusalén. Pero el colleu os cartos e mandou ó seu gran exército que atacase a cidade. O pobo estaba moi asustado porque os asirios estaban cada vez máis preto. Entón Ezequías díxolles: “Non teñades medo. Os asirios son fortes, pero coa axuda de Xehová nós seremos aínda máis fortes ca eles”.

Entón, Senaquerib mandou un dos seus oficiais a Xerusalén para burlarse da xente. O oficial quedou de pé fóra da cidade e berrou: “Xehová non vos pode salvar! Que Ezequías non vos engane: ningún deus poderá protexervos!”.

Ezequías preguntoulle a Xehová que podían facer, e Xehová contestoulle: “Non teñades medo do que vos diga o oficial. Senaquerib non vai conquistar Xerusalén”. Despois, Ezequías recibiu unhas cartas de Senaquerib que dicían: “Rendédevos! Xehová non vos pode salvar”. Ezequías orou: “Por favor, Xehová, sálvanos! Que todos saiban que ti es o único Deus verdadeiro”. Xehová respondeulle: “O rei de Asiria non conquistará Xerusalén. Eu protexerei a miña cidade”.

Senaquerib estaba seguro de que Xerusalén pronto sería súa. Pero aquela mesma noite, Xehová mandou un anxo onda os asirios que estaban acampados fóra da cidade. O anxo matou 185.000 soldados! Naquela noite, Senaquerib perdeu os seus mellores homes. Non lle quedou outra que marchar derrotado para a casa. Tal e como prometera, Xehová protexeu a Ezequías e a cidade de Xerusalén. Imaxínate que estiveses alí. Confiarías ti tamén en Xehová?