Como podo resistir a presión de ter relacións sexuais?

“Cando estaba no instituto, se alguén dicía que xa tivera relacións sexuais, todo o mundo pensaba que eles tamén tiñan que facer o mesmo. Despois de todo, ninguén quere ser un bicho raro” (Elaine, 21).

Sentiches algunha vez que debías ter relacións sexuais só porque parecía que todo o mundo o facía?

Insistiuche moito algunha vez alguén a quen querías para practicar sexo?

Se che pasou algunha destas cousas, este artigo pode axudarche a resistir a presión dos demais e dos teus propios desexos, e así ser capaz de tomar mellores decisións.

• Ideas equivocadas e realidades

• Como resistir a presión de ter relacións sexuais

• O que opinan outros mozos

Ideas equivocadas e realidades

IDEA EQUIVOCADA: Todo o mundo o fai, menos eu.

REALIDADE: Segundo unha enquisa, dous de cada tres rapaces e rapazas de 18 anos din que xa mantiveron relacións sexuais. Pero iso significa que máis do 30 %, unha cantidade bastante grande, aínda non o fixo. Así que non “todo o mundo” mantivo relacións sexuais.

IDEA EQUIVOCADA: O sexo vaime unir máis á outra persoa.

REALIDADE: Isto é o que din moitos rapaces para convencer as rapazas de que teñan relacións sexuais con eles, pero non é certo. A miúdo, son eles os que rompen a relación despois de practicar sexo con elas, algo que as deixa moi impactadas e abatidas, xa que pensaban que o rapaz estaba namorado delas ou sentía algún tipo de compromiso.a

IDEA EQUIVOCADA: A Biblia di que o sexo está mal.

REALIDADE: A Biblia promove un punto de vista positivo sobre o sexo, pero di que é só para desfrutar dentro dun matrimonio composto por un home e unha muller (Xénese 1:28; 1 Corintios 7:3).

IDEA EQUIVOCADA: Se sigo as normas morais da Biblia vou ter unha vida moi aburrida.

REALIDADE: Se esperas a casar para ter relacións sexuais, serás máis feliz porque sentirás a tranquilidade de saber que evitaches a preocupación, o arrepentimento e a inseguridade que produce con frecuencia manter relacións sexuais antes do matrimonio.

En resumo: Esperar a casar para manter relacións sexuais nunca lle fixo dano a ninguén. Pero ter sexo antes do matrimonio, si que llo fixo.

Como resistir a presión de ter relacións sexuais

• Fortalece as túas conviccións. A Biblia di que a xente madura “ten o sentido xa afeito polo costume e é capaz de distingui-lo bo do malo” (Hebreos 5:14). Estas persoas teñen moi claro o que está ben e o que está mal, por iso resisten máis facilmente a presión que exercen os demais para que fagan cousas malas.

  “Esforceime moito para facer o correcto e ter boa reputación, así que non quero facer nada que bote por terra o que conseguín” (Alicia, 16).

  Pensa nisto: Que reputación che gustaría ter? Vale a pena sacrificar esa reputación tan só por conseguir a aprobación de alguén?

• Pensa nas consecuencias. A Biblia di: “O que a persoa semente é o que recollerá” (Gálatas 6:7). Pensa no futuro e en como cambiaría a túa vida e a da outra persoa se cedes á presión de manter relacións sexuais con ela.b

  “As relacións sexuais antes do matrimonio adoitan ir seguidas de culpa, arrepentimento e sentimentos de abandono, sen mencionar a posibilidade dun embarazo non desexado ou unha enfermidade de transmisión sexual” (Sienna, 16).

  Pensa nisto: No libro Sex Smart faise a seguinte pregunta: “Se os teus amigos te están empuxando a facer cousas que te poden prexudicar, son eles a clase de persoas coas que che gustaría pasar tempo e seguir os seus consellos en asuntos importantes?”.c

• Ten un punto de vista equilibrado. O sexo non é un inimigo. De feito, a Biblia di que os matrimonios deberían desfrutar dese aspecto da súa relación (Proverbios 5:18, 19).

  “O sexo é unha parte moi fermosa da creación. Deus quere que desfrutemos del, pero só baixo o arranxo que el deseñou para iso, o matrimonio” (Jeremy, 17).

  Pensa nisto: Se algún día te casas, poderás manter relacións sexuais e desfrutarás delas coa tranquilidade de saber que non vas sufrir as consecuencias negativas mencionadas antes.