LECCIÓN 59
Ti podes aguantar a persecución
Antes ou despois, tódolos cristiáns afrontaremos oposición e incluso persecución. Debería asustarnos iso?
1. Por que contamos con que nos persigan?
A Biblia di claramente: “Tódolos que queiran vivir coma bos cristiáns padecerán persecución” (2 Timoteo 3:12). Xesús foi perseguido porque non era parte do mundo de Satanás. E como nós tampouco o somos, non nos sorprende que os gobernos e as organizacións relixiosas deste mundo nos persigan (Xoán 15:18, 19).
2. Como podemos prepararnos para a persecución?
É agora cando temos que fortalecer a nosa confianza en Xehová. Saca tempo tódolos días para orarlle e para ler a súa Palabra. Asiste con regularidade ás reunións de congregación. Todo isto darache as forzas que necesitas para afrontar calquera tipo de persecución con valor, mesmo se vén dos teus familiares. O apóstolo Paulo, que foi perseguido moitas veces, escribiu: “Teño no Señor o meu abeiro: por iso non teño medo” (Hebreos 13:6).
Outra cousa que nos axudará a ser máis valentes é predicar con regularidade. A predicación ensínanos a confiar máis en Xehová e a superar o medo ó home (Proverbios 29:25, TNM). Se fas que medre o teu valor para predicar agora, estarás ben preparado para seguir predicando incluso se os gobernos nolo prohiben (1 Tesalonicenses 2:2).
3. Como nos beneficia aguantar a persecución?
Claro, non nos gusta que nos persigan. Pero cando aguantamos a persecución, a nosa fe faise máis forte. Tamén nos achegamos máis a Xehová porque vemos a súa axuda cando sentimos que xa non podemos máis (le Santiago 1:2-4). A Xehová dóelle vernos sufrir, pero agrádalle ver que nos mantemos leais. A Biblia di: “Se vos portades ben e, mesmo así, aguantades sufrimentos, isto é precioso ós ollos de Deus” (1 Pedro 2:20). A recompensa que Xehová lles dará ós que aguanten fieis é vida eterna nun mundo no que ninguén se opoña á adoración verdadeira (Mateo 24:13).
AFONDA MÁIS
Repasa por que podes estar seguro de que serás capaz de seguir sendo leal a Xehová a pesar da persecución. E mira como te vai recompensar.
4. Podes aguantar a oposición da familia
Xesús foi realista e recoñeceu que quizais a nosa familia non apoiaría a nosa decisión de adorar a Xehová. Lede Mateo 10:34-36 e logo comentade esta pregunta:
Que podería pasar se alguén da familia decide adorar a Xehová?
Para ver un exemplo disto, poñede o VÍDEO e logo comentade esta pregunta:
Que farías se un familiar ou un amigo intenta que deixes de servir a Xehová?
Lede Salmo 27:10 e Marcos 10:29, 30. Despois de ler cada texto comentade esta pregunta:
Como che pode axudar esta promesa se estás a sufrir oposición da familia ou dos amigos?
5. Continúa servindo a Xehová a pesar da persecución
Fai falta valor para servir a Xehová cando outros intentan impedircho. Poñede o VÍDEO e logo comentade esta pregunta:
Como te fortalece o exemplo destes irmáns?
Lede Feitos 5:27-29 e Hebreos 10:24, 25. Despois de ler cada texto comentade esta pregunta:
Por que é tan importante seguir adorando a Xehová aínda que a predicación ou as reunións estean prohibidas?
6. Xehová axudarache a aguantar
Testemuñas de Xehová de diferentes idades e culturas continuaron sendo leais a Xehová a pesar da persecución que sufriron. Para ver o que lles axudou, poñede o VÍDEO. Logo comentade esta pregunta:
Que lles axudou ás testemuñas de Xehová do vídeo a aguantar?
Lede Romanos 8:35, 37-39 e Filipenses 4:13. Despois de ler cada texto comentade esta pregunta:
Por que te convence este texto de que poderás aguantar calquera proba?
Lede Mateo 5:10-12 e logo comentade esta pregunta:
Por que podes ser feliz aínda que te persigan?
Millóns de adoradores de Xehová conseguiron aguantar a oposición. Ti tamén podes!
HAI QUEN DI: “Eu non podería aguantar a persecución”.
Que textos poderían darlle a esa persoa a confianza que precisa?
RESUMO
Xehová valora moito os nosos esforzos por servilo a pesar da persecución. Coa súa axuda, podemos aguantar calquera proba!
Repaso
Por que deberiamos os cristiáns contar con que nos van perseguir?
Que podes facer xa agora para estar preparado cando veña a persecución?
Que pode axudarche a estar convencido de que podes servir a Xehová a pesar de calquera proba?
INVESTIGA
Mira como Xehová axudou a un mozo a aguantar cando estivo no cárcere por ser neutral.
Analiza que lle axudou a unha parella a seguir servindo a Xehová a pesar de sufrir persecución durante anos.
Aprende como afrontar a persecución con valor.
“Preparémonos agora para a persecución” (La Atalaya, xullo 2019)
Como debemos ver a oposición da familia e que podemos facer para manter a paz e seguir sendo leais a Xehová?
“A verdade non trae ‘paz senón espada’” (La Atalaya, outubro 2017)