LECCIÓN 37
Que di a Biblia sobre o traballo e os cartos
Sentícheste algunha vez angustiado polo traballo ou polos cartos? Poida que non sexa fácil conseguir o que necesitamos e ó mesmo tempo adorar a Xehová como el merece. A Biblia dá consellos prácticos que nos poden axudar.
1. Que di a Biblia sobre o traballo?
Deus quere que desfrutemos do noso traballo. A Biblia di: “Non lle resta ó home cousa mellor senón [...] darse boa vida do froito do seu esforzo” (Eclesiastés 2:24). Xehová traballa moito. Cando o imitamos e somos bos traballadores, agradámoslle a el e sentímonos ben con nós mesmos.
O traballo é importante. Pero nunca deberiamos permitir que chegue a ser máis importante que a nosa adoración a Xehová (Xoán 6:27). Deus promete que se o poñemos a el en primeiro lugar na nosa vida, axudaranos a conseguir o que necesitamos para vivir.
2. Cal é o punto de vista equilibrado sobre os cartos?
Aínda que a Biblia di que “os cartos son unha protección”, tamén nos advirte de que o simple feito de telos non pode facernos felices (Eclesiastés 7:12, TNM). Por iso nos anima a non amar o diñeiro e a estar contentos co que temos (le Hebreos 13:5). Cando seguimos este consello, liberámonos da frustración que senten os que sempre queren ter máis, e evitamos débedas innecesarias (Proverbios 22:7). Tamén escapamos dos perigos do xogo por diñeiro, das apostas e dos negocios que prometen facernos ricos rapidamente.
3. Como podemos ser xenerosos cos nosos cartos?
Xehová é un Deus xeneroso e nós imitámolo cando somos “xenerosos en dar e dadiveiros cos demais” (1 Timoteo 6:18). Somos xenerosos cando usamos os nosos cartos para apoiar a congregación e para axudar a quen o necesita, sobre todo ós nosos irmáns. O que de verdade lle importa a Xehová non é canto damos senón a razón pola que o facemos. Se somos xenerosos de corazón, seremos felices e agradarémoslle a Xehová (le Feitos 20:35).
AFONDA MÁIS
Mira como te beneficia poñer o traballo no seu lugar e estar contento co que tes.
4. Honra a Xehová coa túa forma de traballar
A nosa amizade con Xehová debería influír na nosa forma de ver o traballo. Poñede o VÍDEO e logo comentade estas preguntas:
Que che chamou a atención da actitude e do comportamento de Jason no seu traballo?
Que fixo para poñer o traballo no seu lugar?
Lede Colosenses 3:23, 24 e logo comentade esta pregunta:
Por que é importante que sexamos bos traballadores?
O traballo é importante. Pero nunca deberiamos permitir que chegue a ser máis importante que a nosa adoración a Xehová
5. Estar contentos co que temos benefícianos
Moitas persoas intentan acumular tantos cartos como poden. Pero a Biblia anímanos a ver o diñeiro dun xeito diferente. Lede 1 Timoteo 6:6-8 e logo comentade esta pregunta:
Que nos anima a facer a Biblia?
Aínda que teñamos poucas cousas, podemos ser felices. Poñede o VÍDEO e logo comentade esta pregunta:
Por que son felices as familias do vídeo a pesar de ter poucos cartos?
Pero, cal é o problema de querer máis cando xa temos moito? Xesús puxo un exemplo para explicar este perigo. Lede Lucas 12:15-21 e logo comentade esta pregunta:
Que aprendemos do exemplo que puxo Xesús? (Ver o versículo 15).
Lede e comparade Proverbios 10:22 e 1 Timoteo 6:10 e logo comentade estas preguntas:
Que pensas que é máis importante, ser amigo de Xehová ou ter moitos cartos? Por que?
Cales son os problemas de ir detrás dos cartos?
6. Xehová vaiche axudar a ter o necesario
Os problemas no traballo e a falta de cartos poden poñer a proba a nosa confianza en Xehová. Poñede o VÍDEO para ver que podemos facer cando pasamos por unha situación así. Logo comentade estas preguntas:
Que desafío afrontou o irmán do vídeo?
Que fixo para superar ese desafío?
Lede Mateo 6:25-34 e logo comentade esta pregunta:
Que lles promete Xehová ós que o poñen en primeiro lugar?
HAI QUEN DI: “Téñoche que traballar moito para manter a familia, non podo ir a tódalas reunións”.
Que texto te convence de que poñer a Xehová en primeiro lugar é sempre a mellor decisión?
RESUMO
O traballo e os cartos son necesarios, pero nunca deberían distraernos de servir a Xehová.
Repaso
Que pode axudarche a manter un punto de vista equilibrado sobre o traballo?
Como te beneficia estar contento co que tes?
Como podes demostrar que confías na promesa de Xehová de que el coida dos seus?
INVESTIGA
Analiza se a Biblia di que os cartos son malos.
Aprende que tipo de xenerosidade lle agrada a Deus.
É o xogo por diñeiro unha diversión inocente?
“O punto de vista bíblico. O xogo por diñeiro” (¡Despertad!, marzo 2015)
Mira que motivou a un home que era xogador e ladrón a cambiar o seu estilo de vida.
“Encantábanme as carreiras de cabalos” (La Atalaya, 1 novembro 2011)