Palu 1
Naan, bhalɩban palu faa e wɩboin paan munun jii?
1. Bhalɩban palu a nɔn min ti tɛrɛ taa?
MIN ti tɛrɛ ta min ciɛrɩ a ye e zinman le wo Bhalɩ ban. Naan, wo ká dɔlɩ a ban bɛ ta lo. A cɩnun a baan bhazʋrʋkɔn ji, ye eziin a cɩnun e wo tranun gɔnnɔnla yʋ ɛ baan. Ye a pɔnnɛnnun e go leglizi la. A fɩlɩ léé bhalɩban palu a yaa té min ti tɛrɛ ta, bhɛ a vie ɲan. Bhazʋrʋvanun e wʋrʋnan wole belidɔwɩnun vale wo palawɩnun a e silɩ ecɩman. Tɛrɛ faa ta munun le gɔnnɔnla yʋ ban bɛ ká dʋ lo. Leglizinun e wʋrʋnan, wo dere ká dʋ lo, Leglizinun le wo wó dɔɔ bhɛ, bhɛnun e bɛ wuo leglizi yɔ soru e ta a eziin min ti tɛrɛ faa ta.
E a le kaale bhalɩban palu pun e klɛ e drɔalɩ wɩboin ta
2. (a) Bɛ ká zʋle min dʋ ele bhalɩban palu sie a vaa? (b) Mɛn fɛ ɛ nangɔɔn-an léé kaale bhalɩban palu ká sɔlɛ Bhalɩ lɛ lo?
2 Mɛnmanle munun e Bhalɩ baan wo bhlibhɔmanwɩ yramaan? Min ciɛrɩ wo yaamunun le bhalɩban bɛ ɛ ɲin sie. Eli, wɩnun yraman wɩnun ɛ munun le bhalɩban palu man nɔnlaan cɔɔ. Sɛbhɛ dʋ Africains: un héritage triple (angl.) a fɩ léé: “Bhazʋrʋvanun le wɩ jijɛ Sahara (ɲɛnnɛn saa) yirinwuannan bɛyilazia gulidanlɩ pli zi, a zʋ duole leglizi le wɩ jijɛ Sahara yirinwuannan bɛbolazia. De Bhazʋrʋvanun le wɩ jijɛ Sahara yirinwuannan bɛyilazia gɔɔn ɲan, leglizi le wɩ jijɛ poo ɲan Sahara yirinwuannan bɛbolazia.” Eziin, e a kaa va min ciɛrɩ bhli ji léé wole bhalɩban palu sɔ Bhalɩ lɛ. De kaa yaamunun a bhalɩban palu dʋ ji, taa de bɛntɛrɛ plɛplɛ dʋ ɛ dɔ kaa tranun nwiin gla ɲan oo, bhɛ kaan bhɛ a nangɔɔn-an léé e a wɩboin ɲan lo.
3-5. Wɩdanmanwɩ káá ɛ bhɔa kaa va ye kaa yɩ léé bhalɩban palunun faa ká wɩboin paan munun ji loo?
3 Naan, Bhalɩban palunun faa ji munun a fe léé wo bhalɩban bɛ tɩgɩlɩ ɛ nangɔɔn-an, te wo fɩwɩnun a e silɩ ecɩman. Woo wɩ bɛnun paan munun ji Bhalɩ a min-an ɲan e vale e a wɩ an va kaa ze ɲan, bɛnun ta. I jibɔrɔ wɩ kʋ́ ta: Te e klɛ léé i ɲran yɩ ɲran panan blɛn dʋ nan. Ile ɲran pa yi vininzan ɲan, ye bhe man léé yɩɩ ɲranpanan nwiinzan ká a nan lo. Ye bhe laa ɲran pamunun yaa lee, naan, e a le an ɲran káá ɛ paa. A vininzan le ilɛ léé, naan, kaa nwiinzan le i fɛ nan sia. A fiezan le ilɛ léé, e a le i kɔn man wʋ. Ye a yaazan le, naan, i lɛtrɛnun guli.
4 Bɛ zuo, bhe laa yɩɩ ɲranpamunun lee, naan, ka nwiinzan a káá? A vininzan le ilɛ léé, e a e trʋlɩ, ye e a pɛɛniɛn ɲan, e vale a bhli a tɔntɔn. A fiezan le e a kpeklenɛn, e a kwa, e a drɔɔ. A yaazan le ilɛ léé, kaa nwiinzan a lɩ ɲan e ká gɔnnɛn ɲan lo. Wɩboin ɲan, i daan a fɩlɛ léé, woo ɲranpamunun yaanun kʋ́ a viewʋ nan. De i a va léé i vʋ ile ɲran dɛrɛ la, i daan a va glin lɛ min-an cɩ ka nwiinzan ɲan wɩboin ɲan, e vale e a ji le i fɛan klɛ.
5 A zʋ duo le bhalɩban palu le wɩ cɩ. Bhalɩ a min-an ɲan e vale ee wɩ an laan kaa lee, munun ji wɩnun a e silɩ ecɩman bhɛ́ wɩnun kʋ́ ta. E a le kaa va glin te de kaale bhalɩban palu a wɩboin yraman. Naan, bɛ ká zʋle kaa bhɔale kaa wɩboin draan Bhalɩ le wɩ taa?