Palu 6
Bhalɩban palu faa sɔ Bhalɩ lɛɛ?
1. Bhalɩ Dere yraman, bhalɩban palu fie káá ɛ cɩɩ?
“KÁ WƆRA zi lée ciɛnnɛn nan,” a zʋle Zesu a fɩ. “Zi le éé goo min sanlɩnun gʋnan, a lée a blɛn ye a laala a e jɛlɩ, ye min ciɛrɩ é wɔraan yɩɩ ɛ nan. Naan, zi lé éé goo min bheli nan, a lée a ciɛnnɛn ye a laala a pɔrɔnɛn ye min ciɛrɩ ká a ye lo.” (Matio 7:13, 14) Bhalɩ Dere yraman, bhalɩban palu gɔnnɔn a fie te: a boin a ye a dɛn a, a dʋ e go vʋlɩ e yuɛman zi lée; ye a dʋ e go min srɛ zi lée.
2. Bɛ ká zʋle Biblu a nangɔɔn-an léé, bhalɩban palu faa ká sɔlɛ Bhalɩ lɛ loo?
2 E a min cɩnun bhli ji léé, bhalɩban palu faa sɔ Bhalɩ lɛ. Biblu ji wɔlɛnun le cɩ trɛ bhɛ, bhɛnun a nangɔɔn-an léé, wɩ kʋ́ a vie ɲan:
● “Izraɛl le nɛnnun wo Zoova nanmanwɩ klɛ eziin; Baalnun koo, Asatatenun koo, Siri lé bhalɩnun koo, Sidɔn le bhalɩnun koo, Moab le bhalɩnun koo, Amɔn bɛnnun le bhalɩnun koo, Filisitinun le bhalɩnun koo, wo wó bhɔ ye wo Zoova vʋ, te wo ká a baan e dɛrɛ lo. Zoova bhli fli Izraɛl man.” (Weblezannu 10:6, 7) De kaa yʋnun ɛ baan-oo de kaa bhalɩ bɛnun ɛ baan-oo te bhɛnun ká Bhalɩ boin ɲan lo, kaa ká daan sɔlɛ Zoova lɛ lo.
● “Munun kʋ́, woo an tɔ bhɔa wo lɔlu ɲan, naan, wo bhli a e silɩ an man baa. Woo an bhɔa e pla, té woo gɔnnɔnlawɩnun paan munun ji.” (Maak 7:6, 7) Munun le wa fe wobo lɛ léé wo a Bhalɩ ɛ bannan, te wo wó wuo jiwɩnun ɛ paan munun ji, ye wɩ le Biblu a fɩ ye wo bhɛ vʋ, wole Bhalɩ banlɩ a boawɩ ɲan. Ye Bhalɩ ká a ɲin sie lo.
● “Kazanbhalɩ a leli ɲan, ye munun le woo Kazanbhalɩ bhɔa, e a le wa bhɔ leli vale wɩboin ɲan man.” (Jan 4:24) E a le kaale Bhalɩ ban bɛ e klɛ wɩboin le e cɩ Bhalɩ Dere ji a yraman.
Vie bhalɩban palu pʋrʋnun
3. Bɛ ká zʋle min e bhɔale e vie bhalɩban palu vasi nan dɔɔ, bhalɩban palu boin maan?
3 Bɛ ká zʋle kaa bhɔale kaa ji dɔɔ léé bhalɩban palu dʋ sɔ Bhalɩ lɛ, taa e ká sɔlɛ a lɛ loo? Zesu a fɩ léé: “Yili zinman faa e pʋrʋ zinman bhaan, yé yili lrɛlrɛ e pʋrʋ lrɛlrɛ bhaan [...] A manle ka daan viebhalɩlayɩmunun dɔɔ lɛ wo klɛwɩ man. Bhɛ ji léé, de bhalɩban palu dʋ e sie Bhalɩ ɛ va ee pʋrʋ zinman ɛ bhaan; ye de bhalɩban palu dʋ e sie Satan ɛ va, e pʋrʋ vɔnlɩ ɛ bhaan”.—Matio 7:15-20.
4. Dɔbɛ káá le Zoova banmunu a nangɔɔn-aan?
4 Bhalɩ le munun le wo sɔ wo cɩ lɛ, ye wo bhɔlunun sɔ wo lɛ, bhalɩban palu boin ɛ wo bhaan. De bhɛ a kʋʋ, bhɛ ji le Zoova boin a Bhalɩ le min sɔ a lɛ a ɲan. Zesu a fɩ léé: “De ka sɔ ka cɩ lɛ, bhɛ le wɩ man lé min faa e daan a ji dɔɔ lɛ léé, ka a an zuomunun ɲan”. Bɛ ká zʋle bhalɩban palunun e bhɔale wo dɔbɛ klɛ bhalɩban palu boin yramaan?—Jan 13:35; Luk 10:27; 1 Jan 4:8.
5. Bɛ ká zʋle sɛbhɛ pa dʋ min ti luu yaabhʋlɩ le wɩ fɩɩ?
5 Kaa min ti tɛrɛ ta luunun yaabhʋlɩ le wɩ fɩ. Sɛbhɛ pa le wa laan La Nouvelle encyclopédie britanique a fe kʋ́ zʋ: “Naan, e a bhele wo min ti 18.000.000 dan luu ɲan Islamikɩ Sahara vale flanun le wo cɩ Ɛndiɛn wɛyi sɔnnɔn wo nan, e sia lɛɛ 650 man ye e bhɔ lɛɛ 1905 ji. Lɛɛ yɔ soru gɔnnɔn vu ta soruzan kulu fiezan ji, min fuunun kun yaabhʋlɩ man yirivɔnanzia yi man min tinun ɲrannan, ye lɛ 1867 ji e sia min ti 7.000.000 man ye e bhɔ 10.000.000 man, wo wó vʋ yitagʋrʋ ji ye wo gʋ wo ɲan tɛrɛ dɛrɛ ta.”
6. Bɛ ká zʋle vie bhalɩban palu tɔ wɔra luu yaabhʋlɩ le wɩ jii?
6 Bhleyian vale wo min ti gɔnnɛnnun koo, lomunun koo, e vale nɛnnun koo, wo wó si wole kɔnnun vale wo gɔnnɔnlamunun va, ye wo wó yrɩ gɔgɔbalɩ ɲan, wo tɔmansɩ pa wo man foliɛwɔlɛ cɛ ɲan, ye wo wó dan bhele trʋbhɛnun zʋ, bhalɩban palunun dɔbɛ klɛ kaa? Bɛtwɛl ogɔt a jɛ Nairobi le Daily Nation, Kenya ji léé: “Leglizinun vale Lislamɔn a paan munun ji léé bhlaminnun faa e zɛn ecɩva, te wo jimunun a e dɔlɩ luu klɛlɩ zuo te woo min va bho. [...] E a le kaa a ji dɔɔ léé Bhazʋrʋvanun koo, Kretiɛnnun koo, tuɔnun vale ɛndiɛn wɛyi sɔnnɔn flanun koo, woo faa a e wɔralɩ min wuo ji lɛtanlɩ kʋ́ bhɛ ji, ye bhɛ a klɛ ye min tinun klɩlebɔnnɔn bhlɩ lɛɛ ciɛrɩ ji”
Bhalɩban palu vale gulidanlɩ
7. Bhalɩban palu zilɛzannun mɛn wɩ e klɛ gulidanlɩ le wɩ jii?
7 Vie bhalɩban palu e pʋrʋ lrɛlrɛ bhaalɩ nangɔɔn bɛ cɩnun ji. Wɩdanmanwɩ ɲan, Biblu a fe-anwʋ wɩboin ɲan léé “i bhɔluzan lɔrɔ pa,” naan, tɛrɛ faa ta bhalɩban palu zilɛzannun dɔ gulidanlɩ zuo gligli ye wo munun fuu dɔ wo ta a ji.—Matio 22:39.
8. (a) Bɛ ká zʋle bhalɩban palu zilɛzannun munun bɛ dɔ plɛplɛ min jɛlɩ man min ti tɛrɛ ta gulidanlɩ jii? (b) Mɛnwɩle pastɛ dʋ a fɩ bhalɩban palu zilɛzannun le wɩ yraman, Nango min planun wʋrʋnan gulidanlɩ le wɩ jii?
8 Min ciɛrɩ a ji dɔɔ léé 1994 ji, katoliki ji bhulu cɩnun vale pɛrɩ cɩnun min ciɛrɩ jɛ Rwanda tɛrɛ ta. Bhalɩban palu wɩ blɛnblɛn dʋ klɛ min ti tɛrɛ ta gulidanlɩ cɩnun ji. Wɩdanmanwɩ ɲan, Nangonun wʋrʋnan gulidanlɩ le wo min ciɛrɩ jɛ a ji, a bhleyi va bhalɩban palu fienun munun bɛ dɔ plɛplɛ gulidanlɩ man. Gulidanlɩ jijɛ bhleyian va, pastɛ dʋ léé, Bhalɩ ɲranman an bɛ pa leglizi zilɛmunun lee wo bɛ vʋ.” E le eziin léé: “kʋan kʋ bo laan Bhalɩ wuozannun kʋ klɛ Satan wuo munun ɲan.”
9. Mɛnwɩle Biblu a fe Satan wuo ɲranmanpazannun le wɩ taa?
9 Biblu a yraman wɩ taa fɩ: “Satan boziin e ebo man nɔnlaan Bhalɩ le lanzi zʋ. Bhɛwɩmanle de alé ɲranmanpazannun wobo man nɔnla wɩ tɩgɩlɩ ji ɲranmanpazannun zʋ, bɛ́ ká jivuruwɩ ɲan lo.” (2 Korɛnt munu 11:14, 15) Bɛan zʋle min ɲannɛnnun e dabhli kla wobo klɛlɩ ɲan le wo a min tɩgɩlɩnun ɲan, a zʋ duo le Satan e munun dabhli kla e wuo munun klɛlɩ ɲan bhele wo dɔbɛ a tɩgɩlɩ, dɔ léé te wo pa ɲranman a e plɩ ye te wo pʋrʋ lrɛlrɛnun bhaan.
10. Mɛn wɩnun ji le bhalɩban palu zilɛzannun, Bhalɩ tɔ srɛɛ?
10 Tɛrɛ faa ta bhalɩban palu zilɛzannun, wo sɔlɛlɩ koo, vʋlɩ-drɔɔ koo, e vale wɩziin klɛlɩ koo, ale wɩ paa munun ji, naan, ye wo min zapalɩ koo, gulidanlɩ koo, wɩɲannɛn koo, wo bhɛnun ɛ klɛ. Biblu e wo gɔɔn-an e zinman. E a fe léé: “Woo wɩ fe wo lɔlu ɲan léé, wo Kazanbhalɩ dɔɔ, naan, wo sɔn vɔa a man wo klɛwɩnun ɲan.”—Tite1:16.
Ka si “Babilɔn fla blɛn ta”
11. Biblu e vie bhalɩban palu daan mɛn fɛ ɛ maan?
11 Zoova e vie bhalɩban palu le wɩ ye bɛan zʋ, de kaa wɩgɔɔnlɩ le sɛbhɛ tafɩnan kaa bhɔale kaa bhɛ yɩ. Anan, wo vie bhalɩban palu dan lɩ dʋ man, “Fla blɛn Babilɔn.” (Wegɔɔnle 17:5) Bhalɩ a man wɩ fɩ bɛan zʋ:
● “Gɔnnɛnglin lɩ bhabha [...] a vale tɛrɛlamunun wóbo nɔn pɛnpɛnnɛnjɛlɩ lɛ.” (Wegɔɔnle 17:1, 2) De e nɔn vʋo kɔɔn e yrɩlɩ Bhalɩ man, vie bhalɩban palu wɔra politiki klɛlɩ ji, te e a fe bheyi cɩ va léé, wɩan e a le min nwiinzannun a klɛ.
● “Bhalɩlayɩmunun koo, Kazanbhalɩ le munun koo, munun faa le wo wó bhɔrɔ bhʋ tɛrɛ la koo, wo wo ɲɛn yɩ bii babilɔn ta bhɛ zaman.” (Wegɔɔnle 18:24) Vie bhalɩban palu jidanwɩ ciɛrɩ bhɔ bhalɩban munun boin man, ye e wo jɛ, e vale min miliɔn le wo wo jɛ guli man bhɛnun faa ɲɛn wɩ a e dɔlɩ a nwiin.
● “E ebo tɔ kla blɛn ye e ebo nɔn fua ciɛrɩ bhlɩlɩ lɛ.” (Wegɔɔnle 18:7) Fua fɛ ciɛrɩ a vie bhalɩban palu lee, te a zilɛmunun a sie te woo fua bhle a ɲan.
● “I bɛnnun faa saan ile yʋklɛlɩnun ɲan.” (Wegɔɔnle 18:23) Ale vie wɩ le e a paan min ji léé, min boin ká gaan lo, bhɛ le wɩ man, vie bhalɩban palu zilɛ sʋ yʋklɛlɩ koo, zɔɔtanlɩ koo, wolɛ, ye e munun bɛ dɔ plɛplɛ léé wo kannan min galɩnun lee, ye wo tra gamunun ban.
12. Mɛnwɩle Biblu a vɔa munun tɔnnɛn man vie bhalɩban palu le wɩ taa?
12 A fɩlɩ dere plɛplɛ ɲan léé bhlaminnun e bhɔra vie bhalɩban palu ji e klɩklɩ, Biblu a fe léé: “Anle munun ká si fla kʋ́ la, de ka pa a va ale wɩɲannɛn klɛlɩ ji. Ye bawuruman jɛ le e daan a jɛ lɛ bhɛ, de e da vɔ ka man.”—Wegɔɔnle 18:4, 5.
13. Mɛn wɩ ɛ daan bhɔlɛ vie bhalɩban palu vale e jimunun maan?
13 E vʋ sɛ ye Babilɔn fla Blɛn vie bhalɩban palu faa le plalɩ min nwiin e daan srɛlɛ tata. Biblu a fe léé: “Yi dʋ man bawurumanwɩ kʋ́nun e daan bhɔ lɛ a man: ga koo, jɛbhʋlɩ koo, lɔrɔ koo, woo le, ye a cɛ e daan bhlɩlɛ. Mizanbhalɩ le e ale wɩ bhlɩ, e a plɛplɛ.” (Wegɔɔnle 18:8) De kaa ká a va léé kaaze e klɛ a jɛ jɛnun va lo, e a léé kaa klinin vie bhalɩban palu klɛlɛwɩnun koo, ale fɛtinun koo, e vale ale wɩpaalɩ min ji le e ká sɔlɛ Bhalɩ lɛ lo wo man, te kaa ká bhɛnun ji lo. Wɩ kʋ́ a cɛamanwɩ ɲan. Kaa vʋlɩ e yuɛman vale ga wʋrʋnan!—2 korɛnt munu 6:14-18.
[Fotonun a laa 20,21]
Vie bhalɩban palu bɛ a gulidanlɩ vale luu yaabhʋlɩ ji.
[Credit Lines]
Blessing troops: Daily Times of Nigeria; child laborers: © Penny Tweedie/Panos Pictures; slave boat: Schomburg Center for Research in Black Culture/The New York Public Library/Astor, Lenox and Tilden Foundations