Izaias
16 Desacher raz choloupeak ek menddro dhaddat,
Taka Selantlean, ranvott vattarantlean,
Sionachea dhuvechea dongrar dhaddat.
2 Ghontterantlean dhanvddailolea suknnea bhaxen,
Moabacheo dhuvo Arnonachea vhanvtea udka lagim astoleo.
3 “Solʼlo diat, nirnnoi ghetla tea pormonnem korat.
Donparchea vellar tumchi savlli, ratchea datt kallkha sarki korat.
Hanga-thoim ximpoddloleank lipoiat ani pollon voitoleank dusmananchea hatant ghalinakat.
4 O Moab, hanga-thoim ximpoddloleank tujea bhitor ravonk di.
Nas korpea thaun vanchon uronk, tum tanchea pasot lipʼpacho zago zav.
Zulum kortoleacho nas zatolo,
Nisontton kabar zatolem,
Ani dusreank maddoitat te prithume voile nanch zatole.
5 Uprant, ek xinvason stapon zatolem, zachi buniad visvaxi mog astolo.
Davidachea tombunt, tea xinvasonar bostolo to visvaxi astolo,
To sarke toren neai kortolo ani nitivontponnachim kamam rokddea-rokddim korun kaddttolo.”
6 Ami Moabachea gorva vixim aikolam—to khub gorvixtt asa—
Tachea ghomondda vixim, tachea gorva vixim ani tachea raga vixim ami aikolam,
Punn to marta ti boddai sogli polki!
7 Moab svota pasot vhoddlean bob marun roddttolo,
Tache sogle lok bob marun roddttole.
Zankam marleat te Kir-haresethachea pasanchea bakrecho ugddas korun roddttole.
8 Karonn Heshbonantle molle sukon geleat,
Raxttrantlea raz korpeamnim Sibmacheo drakxancheo vali,
Tiche tambdde-tambdde khande* maddoileat,
Te Jazer poriant pavlole
Ani ranvott vattara poriant vaddlole.
Tache fantte doria itle pois poriant posorlole.
9 Taka lagon, hanv Jazera pasot roddlom toso, Sibmachea drakxanchea vali pasot roddttolom.
O Heshbon ani Eleale, hanv tumkam mhojea dukamnim bhizoitolom,
Karonn tumchea thoim gimachea follanchea vellar ani lunvnnechea vellar zatalo to bovall bond zala.*
10 Bage thaun sontos ani khuxalkai kaddun ghetli,
Drakxanchea molleant konnuch gitam gaina vo khuxalkaien bob marina.
Drakxam maddoupachea zagear konnuch drakxam maddoun soro kaddina,
Karonn hanvem tancho soglo bovall bond kela.
11 Taka lagon, Moaba pasot hanv bhitorlean tollmollttam,
Vazoilʼlea kinore* bhaxen,
Hanv bhitorlea-bhitor Kir-haresetha pasot tollmollttam.
12 Unch zageancher voitana Moab thoklo zalear pasun ani povitr zageancher vochon tannem magnnem kelear pasun tacho kainch faido zaunchona.
13 Moaba vixim Jehovan ho sondex poilinch dilolo. 14 Atam Jehova mhunntta: “Tin vorsam bhitor* Moabachi mhoima kabar zatoli. Sogle vatten gondholl astolo, ani je urtole tancho ankddo khub unno astolo, mhunnche te asonui naslolea bhaxen astole.”