Jeremias

32 Judacho Raza Zedekiachea razvottkechea 10-vea vorsa, mhunnche, Nebukadnezarachea* razvottkechea 18-vea vorsa, Jeremiasak Jehova koddlean sondex mellʼllo. 2 Tea vellar, Babilonachea razachea foujen Jeruzalemak gherav ghatlolo aslo. Ani Jeremias provadi, Judachea razachea rajmahalant, Rakhonndarachea Angnnant koidi aslo. 3 Karonn Judacho Raza Zedekian taka oxem mhunnon koidi kelʼlo, “Tum oxi bhasaunni kiteak korta? Tum mhunntta, ‘Jehovan oxem mhunnttlam: “Hanv hem xar Babilonachea razachea hatant ditolom ani to tem aplea tabeant ghetolo. 4 Judacho Raza Zedekia Kaldeikaranchea hatantlo suttchona. Zedekiak Babilonachea razachea hatant ditolech, ani taka raza mukhar ubo ravon ulounk poddttolem.”’ 5 Jehova mhunntta: ‘To Zedekiak Babilonant gheun voitolo ani hanv tacher dhean dina tea meren, to thoinch urtolo. Tumi Kaldeikaram lagim kitle-i zhogoddlear pasun tumkam ies mellchem na.’”

6 Jeremiasan mhunnttlem, “Jehovacho ho sondex mhaka mellʼllo: 7 ‘Tujea bapaicho bhav Shalumacho put Hanamel, tujea lagim ietolo ani mhunnttolo: “Tum Anathotant aslolem mhojem xet viktem ghe, karonn tem porot viktem gheuncho poilo hokʼk tuka asa.”’”

8 Jehovan sanglolem toxem mhojea bapaichea bhavacho put Hanamel, Rakhonndarachea Angnnant mhojea lagim ailo, ani tannem mhaka mhunnttlem: “Upkar korun tum Benjaminachea desant aslolem mhojem Anathotantlem xet viktem ghe. Karonn tem porot viktem gheuncho ani tem soddouncho hokʼk tuka asa. Tum tem tujea pasot viktem ghe.” Tednam hem Jehovachea utra pormonnem zalam mhunn mhaka kollʼllem.

9 Tor hanvem mhojea bapaichea bhavacho put Hanamela koddlean Anathotantlem xet viktem ghetlem. Hanvem taka 7 shekel* ani chandiche 10 kuddke zokhun dile. 10 Magir hanvem hea zomnichem kagod toiar kelem, tacher xikʼko marlo, sakxeank apoile, ani poixe tagddent zokhun taka dile. 11 Hanvem adnea pormonnem ani kaidea pormonnem xikʼko marlolo aslo tem zomnichem kagod ghetlem, toxench xikʼko marunk naslo, tem-ui kagod ghetlem. 12 Hanvem tem zomnichem kagod mhojea bapaichea bhavacho put Hanamela mukhar, tacher sain* marlolea sakxeam mukhar ani Rakhonndarachea Angnnant boslolea soglea Judevam mukhar Barukak dilem. Baruk, Neriacho put ani Mahseiacho natu aslo.

13 Uprant hanvem tanchea mukhar Barukak hi adnea dili: 14 “Izraelacho Dev, fouzancho Dev Jehova oxem mhunntta, ‘Tum xikʼko aslolem ani xikʼko naslolem zomnichem kagod ghe, ani tim donui kagdam zaito temp surokxit urchim mhunn matiechea aidonant dovor.’ 15 Karonn Izraelacho Dev, fouzancho Dev Jehova oxem mhunntta, ‘Hea desant ghoram, xetam ani drakxanche molle vikte ghevop porot suru zatolem.’”

16 Neriacho put Barukak tem zomnichem kagod dilea uprant hanvem Jehova lagim oxem magnnem kelem: 17 “Akʼkhea Vixvachea Dhonia Jehova Deva! Polloi! Tunvem tuzo hat fuddem kaddun, tujea vortea xokten mollob ani prithum rochli. Tujea lagim zaina oxem kainch na. 18 Tum hozarank tuzo visvaxi mog dakhoita, punn bapainchea guneanvanchi khast tanchea bhurgeank dita. Tum khoro, vorto ani xoktivont Dev zaun asa, zachem nanv fouzancho Dev Jehova. 19 Tuzo udʼdhex* vorto ani tum xoktivont kamam korta. Dor ekleak tachea kamam pormonnem ani tachea vagnnuke pormonnem farik korunk, tuje dolle munxanchim soglim kamam dhean diun polloitat. 20 Tunvem Ejiptt desant oslim khunna ani vizmitam kelim, zanchea vixim lokank aiz pasun khobor asa. Hea toren tunvem Izraelant ani akʼkhea sonvsarant ek vortem nanv zoddlam. Ani tem aizui vortem asa. 21 Tunvem khunna ani vizmitam korun, aplo xoktivont hat fuddem kaddun ani bhirant haddtta toslim vhoddlim-vhoddlim kamam korun tujea lokank, Izraelitkarank Ejiptt desantlean bhair haddlim.

22 “Vell ailo tednam, tunvem tanchea purvozank soput dilʼlea pormonnem ho des dilo, zoim dudh ani mhonv vhanvta. 23 Tannim hea desant ieun to aplea tabeant ghetlo. Punn tannim tuzo tallo aikonk na ani te tujea kaidea pormonnem cholonk nant. Tunvem tankam dilʼli ekui adnea tannim pallunk na, taka lagon tunvem tancher hem soglem odruxtt ieunk dilem. 24 Polloi! Hem xar aplea tabeant korunk tea foujen, durgam bhonvtonnim matiechi ani fatranchi choddtti toiar keli. Tolvar, bhuk ani piddek* lagon hem xar tachea add zhuz kortolea Kaldeikaranchea hatant poddttolench. Tunvem sanglolem soglem ghoddlem mhunn tum atam polloita. 25 Akʼkhea Vixvachea Dhonia Jehova Deva, hem xar Kaldeikaranchea hatant poddttolench. Tori astana tum mhaka oxem sangta, ‘Poixe diun tujea pasot tem xet viktem ghe ani sakxeank apoi.’”

26 Tednam Jehovacho ho sondex Jeremiasak mellʼllo: 27 “Hanv Jehova, soglea munxakullacho Dev, mhojean korunk zaina oxem kitem-i asa kai? 28 Taka lagon Jehova oxem mhunntta, ‘Hanv hem xar Kaldeikaranchea hatant korchom asam, Babilonacho Raza Nebukadnezarachea* hatant diunchom asam ani to tem xar aplea tabeant kortolo. 29 Hea xara add zhuz kortat te Kaldeikar, tantunt bhitor ghustole ani xarak uzo laitole. Xara sangata te hanga aslolim soglim ghoram lasoun uddoitole, zancher,* mhaka rag haddunk lok Baal devak bolidanam bhettoitale ani dusrea devank soreacheo bhetto bhettoitale.’

30 “Jehova mhunntta, ‘Izrael ani Judachea lokamnim lhanponnim thaun mhojea nodren vaitt asat tinch kamam keleant. Izraelache lok aplea kamamnim porot-porot mhaka rag haddit ravtat. 31 Hem xar bandlolem tednam thaun tem aiz meren, tea xaran mhaka rag haddla ani mhozo krodh vaddoila. Taka lagon, hanv taka mhojea mukhavoilem kaddun uddoitolom. 32 Izrael ani Judachea lokamnim vaittponn korun mhaka rag haddla—tea lokamnim, tanchea razamnim, kunvramnim, iadnikamnim, provadeamnim ani Judant ani Jeruzalemant ravtolea sogleamnim mhaka rag haddla. 33 Mhaka tondd dakhounchea bodlek, te mhaka apli fatt dakhoit ravle. Hanvem tankam porot-porot xikouncho proitn kelo, punn tanchea modlea ekleanui mhojem aikonk na ani mhoji xist manun gheunk na. 34 Mhojem nanv aslolea ghorant* tannim kanttallo haddtta tosleo murteo dovorleo, ani tannim tem oxudʼdh kelem. 35 Titlench nhoi, Moleka pasot aplea putank ani dhuvank ujeant lasounk, tannim Hinomachea Putachea Falkeant,* Baala pasot unch zage bandle. Oxem korunk hanvem tankam adnea diunk nasli ani hem mhojea kallzant pasun kednanch ieunk naslem.* Oslem vitt haddtta toslem kam korun tannim Judak patkant uddoilem.’

36 “Taka lagon, hem xar, jea vixim tumi mhunnttat ki tem tolvar, bhuk, ani piddek lagon Babilonachea razachea hatant ditole, tea xara vixim Izraelacho Dev Jehova oxem mhunntta, 37 ‘Hanvem tankam ragan, tiddkin ani krodhan ximpddailʼlim tea soglea desam thaun hanv tankam porot ektthaim kortolom. Hanv tankam porot heach zagear haddttolom ani tankam surokxit ravonk ditolom. 38 Tednam hanv tancho Dev zatolom, ani te mhoje lok zatole. 39 Tannim sodanch mhoji bhirant dhorchi mhunn hanv tankam sogleank ek kalliz ditolom ani ekech vatten choloun vhortolom. Hea vorvim, tanchem ani tanchea uprant tanchea bhurgeanchem borem zatolem. 40 Ani hanv tanchea sangata sasnacho korar kortolom. To mhunnttlear, hanv tankam borem korop kednanch soddun diunchom na. Hanv mhoji bhirant tanchea kallzant ghaltolom, jea udexim tim mhaka fatt korchimnant. 41 Hanv tanchea pasot boreo vostu korun khuxal zatolom, ani mhojea soglea kallzan ani soglea jivan tankam hea desant thiraien roitolom.’”

42 “Karonn Jehova oxem mhunntta, ‘Zoxem hanvem hea lokancher vhoddlem odruxtt haddlolem, toxench hanv tankam utor ditam tea pormonnem hanv tankam boreponn dakhoitolom.* 43 Tumi mhunnttat: “Ho des padd zalʼlo asa. Thoim ekui munis vo zonvar ravona, ani to Kaldeikaranchea hatant dila.” Punn hea desant porot xetam viktim gheunk suru kortole.’

44 “Jehova mhunntta, ‘Benjaminachea vattarant, Jeruzalemachea bhonvtonnchea vattarant, Judachea xaramnim, dongri vattarachea xaramnim, sokoilea vattarachea xaramnim ani dokxinnechea xaramnim, lok poixe diun xetam viktim ghetole, zomnichim kagdam toiar kortole ani tancher xikʼko martole, toxench sakxeank apoitole. Karonn hanv tanchea koident aslolea lokank porot hanga haddttolom.’”