Jeremias
34 Jednam Babilonacho Raza Nebukadnezar* ani tachi akʼkhi fouz ani tachea razvottke khala aslolim prithumechim soglim rajeam ani sogle lok, Jeruzalem ani tachea soglea xaram add zhuz kortale, tednam Jehovacho ho sondex Jeremiasak mellʼllo:
2 “Izraelacho Dev Jehova oxem mhunntta, ‘Tum Judacho Raza Zedekia koddem voch ani taka sang: “Jehova oxem mhunntta, ‘Hanv hem xar Babilonachea razachea hatant diunchom asam, ani to tem lasoun uddoitolo. 3 Tum tachea hatantlo suttchona, tuka dhortole ani tachea hatant ditolech. Ani tum Babilonachea razak polloitolo ani to tujea mukhar ubo ravon tujea lagim uloitolo, ani tum Babilonant voitolo.’ 4 Punn Judachea Raza Zedekia, Jehovacho ho sondex pasun aik, ‘Jehova tujea vixim oxem mhunntta: “Tum tolvarin morchona. 5 Tum xantin mortolo. Ani tujea purvozam pasot, mhunnche, tujea poilim aslolea razam pasot dhump zolloilʼlo toso, te tujea pasotui zolloitole. Te oxem mhunnon tujea pasot dukh kortole, ‘Are re, mhojea dhonia!’ Oxem zatolench, karonn Jehova mhunntta, ‘Hanvem hem sanglam.’”’”’”
6 Uprant Jeremias provadean, Jeruzalemant, Judacho Raza Zedekiak hem soglem sanglem. 7 Tea vellar, Babilonachea razachi fouz Jeruzalema add ani Judachea urlolea soglea xaram add, mhunnche Lakish ani Azeka add zhuz kortali. Fokot hea xarancher azunui kobzo korunk naslo karonn heach xaram bhonvtonnim ghott durgam aslim.
8 Jeruzalemant aslolea soglea lokamnim aplea chakrank suttka diunchea vixim kollounni korunk, Zedekia Razan tanchea sangata korar kelea uprant, Jehovacho ho sondex Jeremiasak mellʼllo. 9 Hea korara pormonnem, konnench aplea Judev bhav vo bhoinnik chakor korun dovorcho nhoi. Dor eklean aplea Hebrev chakrak ani chakornik suttka diunchi. 10 Tor soglea kunvramnim ani soglea lokamnim hi adnea pallʼlli. Dor eklean, apunn aplea chakrak ani chakornik suttka ditolo ani tankam hea fuddem chakram korun dovorchona mhunn korar kelo. Hea korara pormonnem tannim aplea chakrank vochonk dilem. 11 Punn uprant, suttka dilʼlea chakrank ani chakornink porot haddun tannim tankam porot aplim chakram kelim, ani zobordosten tanche koddlean seva korun gheunk lagle. 12 Taka lagon, Jehovacho sondex Jeremiasak mellʼllo. Jehovan mhunnttlem:
13 “Izraelacho Dev Jehova oxem mhunntta, ‘Jea disa hanvem tumchea purvozank gulamponnachea desantlean,* mhunnche, Ejiptt desantlean bhair haddlolim, tea disa hanvem tanchea sangata ek korar kelʼlo. Hanvem tankam mhunnttlolem: 14 “Sat vorsanchea xevottak, tumchea modlea dor eklean tumkam viklolea tumchea Hebrev bhavak suttka diunchi. Tannem sov vorsam tuji seva keli, taka lagon tunvem taka suttka diunk zai.” Punn tumchea purvozamnim mhojem aikonk na, nhoi mhunn mhaka kan diunk na. 15 Ani halinch,* tumi pasun tumcheo vatto bodolʼleo ani chakram aslolea tumchea bhavank suttkechi kollounni korun, mhoje nodren sarkem tem kelem. Mhojem nanv aslolea ghorant* tumi mhojea mukhar korar kelo. 16 Punn uprant, tumi tumcheo vatto bodolʼleo. Jea chakrank ani chakornink tumi tanchea khuxe pormonnem suttka dilʼli, tankam tumi porot haddlim ani zobordosten tanche koddlean porot seva korun gheunk laglim. Oxem korun tumi mhojea nanvacho opman kelo.’
17 “Taka lagon, Jehova oxem mhunntta: ‘Dor eklean, chakor aslolea tumchea bhavak suttkechi kollounni korchi mhunn hanvem dilʼli adnea tumi pallunk na. Taka lagon, hanv tumchea pasot suttkechi kollounni korun tumkam soddun ditolom. Mhunnche tolvarin, pidden* ani bhuken moronk hanv tumkam soddun ditolom. Ani hanv tumchi oxi poristhiti kortolom, ki prithumechim soglim rajeam tumkam polloun samkinch thottaktolim,’ oxem Jehova mhunntta. 18 ‘Jea lokamnim paddkuleachim don ordam kelʼlim ani tachea modlean pasar zaun mhojea mukhar korar kelʼlo, punn tannim tea korara pormonnem kam korunk na ani to moddlo tankam oxem ghoddttolem. 19 Mhunnche, tea Judachea kunvrank, Jeruzalemachea kunvrank, iadnikank, dorbarantlea odhikareank ani paddkuleachea don ordam modlean pasar zalʼle tea soglea lokank oxem ghoddttolem: 20 Hanv tankam tanchea dusmananchea ani tancho jiv gheunk sodhtoleanchea tabeant ditolom. Tanchim moddim, mollba voilea suknneank ani prithume voilea zonvarank jevonn zatolim. 21 Hanv Judacho Raza Zedekiak ani tachea kunvrank, tanchea dusmananchea ani tancho jiv gheunk sodhtoleanchea tabeant ditolom, ani tumchea add zhuzonk ailʼleo Babilonachea razacheo fouzo jeo atam porot voitat, tanchea hatant hanv tumkam ditolom.’
22 “Jehova mhunntta, ‘Hanv tea fouzank hukum ditolom ani tankam porot hea xarant haddttolom. Teo fouzo hea xara add zhuz kortoleo, tem xar aplea tabeant ghetoleo ani tem ujeant lasoitoleo. Hanv Judachea xarank eka padd zalʼlea zagea bhaxen kortolom, zoim ekui munis ravchona.’”