Jeremias
40 Rakhonndaracho mukheli Nebuzaradanan, Jeremiasak Rama thaun suttka dilea uprant, Jehovacho sondex Jeremiasak mellʼllo. Jeruzalemantlea ani Judachea jea lokank koidi korun Babilonant vhortale, tea soglea lokam sangata Nebuzaradanan Jeremiasak beddio ghalun Ramant vhelʼlo. 2 Uprant rakhonndarachea mukhelean Jeremiasak kuxin vhelo ani taka mhunnttlem: “Tuzo Dev Jehovan, hea zageacher hem odruxtt ietolem mhunn sanglolem, 3 ani apnnem sanglolem toxench Jehovan kelem. Karonn tumi Jehova add patok kelem ani tachem aikon gheunk na. Taka lagon tumchea sangata oxem ghoddlam. 4 Atam hanv tujea hatacheo beddio kaddttam ani tuka soddttam. Tuka borem dista zalear, tunvem mhojea sangata Babilonant ieunk zata ani hanv tuji kallji ghetolom. Punn tum Babilonant ieunk sodhina zalear, ienaka. Polloi! Ho akʼkho des tujea mukhar asa, tuka zai thoim tum voch.”
5 Portun voichea vixim Jeremiasan nirnnoi gheunchea poilinch, Nebuzaradanan taka mhunnttlem: “Tum Ahikamacho put ani Shafanacho natu Gedalia lagim voch, zaka Babilonachea razan Judachea xarancher odhikar diun nemla. Tum tachea sangata lokam modem rav. Na zalear, tuka zai thoim tum voch.”
Uprant rakhonndarachea mukhelean taka thoddem jevonn ani ek dennem diun vochonk dilem. 6 Tor Jeremias, Ahikamacho put Gedalia lagim Mizpant gelo, ani desant urlolea lokam sangata ravonk laglo.
7 Thoddea vella uprant, Babilonachea razan, Ahikamacho put Gedaliak desant odhikar diun nemla mhunn kheddea ganvamnim ravtolea soglea senapotimnim ani tanchea munxamnim aikolem. Babilonant koidi korun vhoronk nasle tea desantlea soglea gorib dadleancher, bailancher ani bhurgeancher tannem Gedaliak odhikari mhunn nemlolo. 8 Tor, te senapoti ani tanche munis Gedalia lagim Mizpant aile. Te mhunnttlear, Nethaniacho put Ishmael, Kareache put Johanan ani Jonathan, Tanhumethacho put Seraia, Netofantle Efaiache put, ani Makathantlea eka munxacho put Jezania ani tache munis. 9 Ahikamacho put ani Shafanacho natu Gedalian soput gheun tankam ani tanchea munxank mhunnttlem: “Tumi Kaldeikaranchi seva korunk bhienakat. Tumi heach desant ravat ani Babilonachea razachi seva korat ani tumchem soglem borem zatolem. 10 Hanv zalear, hanga Mizpant ravtolom ani hanga ietat tea Kaldeikaram lagim tumchea vatten uloitolom.* Punn tumi, drakxancho soro, gimant piktat tim follam* ani tel ektthaim korat, tankam tumchea aidonamnim bhorun dovrat ani tumi tabeant ghetlolea xaramnim ravat.”
11 Babilonachea razan thoddea lokank Judant ravonk dilam ani Ahikamacho put ani Shafanacho natu Gedaliak tancher odhikar diun nemla mhunn Moab, Amon, Edom ani dusrea desamnim ravpi Judevamnim pasun aikolem. 12 Taka lagon, he sogle Judev ximpoddlole tea soglea zageam thaun Judachea desant porot ieunk lagle. Te sogle Gedalia lagim Mizpant aile. Ani tannim vhodd promannan drakxancho soro ani gimant piktat tim follam* ektthaim kelim.
13 Kareacho put Johanan ani kheddea ganvamnim ravtale te sogle senapoti Gedalia lagim Mizpant aile. 14 Tannim taka mhunnttlem: “Amonitkarancho raza Baalisan, Nethaniacho put Ishmaelak tuka jivexim marunk dhaddla mhunn tum zannam?” Punn Ahikamacho put Gedalian tancher visvas dovrunk na.
15 Tednam Kareacho put Johananan, Mizpant Gedaliak guptim oxem sanglem: “Mhaka vochon, Nethaniacho put Ishmaelak jivexim marum-di, ani konnankuch kainch kollchem na. Taka tuzo jiv gheunk kiteak diuncho, ani tujea lagim hanga ailʼle Judache sogle lok kiteak ximpoddche, ani Judachea urlolea lokancho nas kiteak zauncho?” 16 Punn Ahikamacho put Gedalian, Kareacho put Johananak mhunnttlem: “Na, tum oxem korinaka. Karonn Ishmaela vixim tum jem sangta tem fott zaun asa.”