Jeremias
42 Uprant sogle senapoti, ani Kareacho put Johanan, Hoshaiacho put Jezania, ani lhan toxench vhodd sogle lok aile, 2 ani Jeremias provadeak mhunnttlem: “Upkar korun amchi vinoti aik, ani amchea vatten, urleat tea soglea lokanchea vatten, tuzo Dev Jehova lagim magnnem kor. Karonn ami khub thodde lok urleat mhunn tum tor polloitach. 3 Ami khoinche vatten cholchem ani kitem korchem tem tuzo Dev Jehova amkam sangom.”
4 Jeremias provadean tankam mhunnttlem: “Borem, tumi sanglam toxem hanv tumcho Dev Jehova lagim magnnem kortolom, ani Jehova jem sangta tem soglem hanv tumkam sangtolom. Hanv tumchea thaun kainch lipounchom na.”
5 Tannim Jeremiasak sanglem: “Tuzo Dev Jehova tujea udexim amkam jem sangta toxench ami kortole. Ani ami toxem korinant zalear, Jehovan ek khoro ani visvaxi sakxi zaun, amchea add panvl gheunchem. 6 Amkam boreak poddom vo na, ami amcho Dev Jehovachem aikotole, zachea lagim ami tuka dhaddttat. Hea toren, ami amcho Dev Jehovachem aikolem dekhun amchem borem zatolem.”
7 Dha disam uprant Jehovacho sondex Jeremiasak mellʼllo. 8 Tednam Jeremiasan, Kareacho put Johananak, tachea sangata aslolea soglea senapotink ani soglea lokank, lhanank toxench vhoddank, aplea lagim apoile. 9 Tannem tankam mhunnttlem: “Tumi mhaka zachea lagim vinoti korunk dhaddlolo, to Izraelacho Dev Jehova oxem mhunntta: 10 ‘Tumi heach desant ravle zalear, hanv tumkam bandun kaddttolom ani moddun uddounchom na, hanv tumkam roitolom ani umttun kaddchom na. Karonn hanvem tumcher jem odruxtt haddlolem, tachea vixim mhaka vaitt distolem.* 11 Jea Babilonachea razak tumi bhietat, taka bhienakat.’
“Jehova mhunntta, ‘Taka bhienakat, karonn hanv tumkam salvar korunk ani tachea hatantlean vanchounk tumchea sangata asam. 12 Hanv tumchi kakut kortolom. To pasun tumchi kakut kortolo, ani tumkam tumchea desant porot dhaddttolo.
13 “‘Punn tumi zor oxem mhunnttat, “Na, ami hea desant ravchenant!” ani tumcho Dev Jehovachi adnea moddun tumi zor 14 oxem mhunnttat, “Na, tachea bodlek ami Ejipttant voitole. Thoim amkam zhuz pollounk poddchem na, vo xingacho* avaz aikonk ieunchona vo ami upaxim urchenant. Ami thoinch vochon ravtole,” 15 zalear Judachea urlolea lokamno, Jehovacho sondex aikat. Izraelacho Dev, fouzancho Dev Jehova oxem mhunntta: “Tumi zor Ejipttant vochon ravpacho ghott nichov kela, ani tumi thoim ravonk gele* 16 zalear jea dusmanak tumi bhietat, to tolvar gheun Ejipttant tumcher akromonn kortolo, ani jea bhukek tumi bhietat, ti bhuk tumchea fattlean Ejipttant pavtoli ani tumi thoim mortole. 17 Jitlea lokamnim Ejiptt desant vochon ravpacho nichov kela, te sogle tolvar, bhuk ani pidden* mortole. Hanv tancher jem odruxtt haddttolom, tachea thaun konnuch salvar zaunchona vo suttchona.”’
18 “Karonn Izraelacho Dev, fouzancho Dev Jehova oxem mhunntta: ‘Tumi Ejipttant gele zalear, hanvem Jeruzalemant ravtoleancher mhojea ragacho ani krodhacho pelo votoilʼlo toso, hanv tumcher pasun mhojea krodhacho pelo votoitolom. Tumi xirap poddlole lok zatole, tumchi poristhiti oxi zatoli, ki polloitat te sogle thottaktole, tumchem nanv piddʼddear kortole, ani tumcho opman kortole ani tumi ho zago porot kednanch pollounk pavchenant.’
19 “Judachea urlolea lokamno, Jehovan tumkam sanglam, Ejipttant vochonakat. Ugddas dovrat, hanvem tumkam aiz oxi xittkaunni dilea, 20 tumi thoim vochpachi chuk keli zalear tumi tumcho jiv hogddaitole. Karonn tumi mhaka oxem sangon tumchea Deva lagim, Jehova lagim dhaddlolo, ‘Amchea vatten, amcho Dev Jehova lagim magnnem kor, ani amcho Dev Jehova kitem sangta tem soglem amkam sang ani ami toxench kortole.’ 21 Ani aiz, hanvem tem tumkam sanglem. Punn tumi tumcho Dev Jehovachi adnea pallchenant, vo tannem mhojea udexim tumkam jem sanglam, tantuntlem tumi kainch korchenant. 22 Taka lagon, tumkam jea zagear vochon ravpachi itsa asa, thoim tumi tolvarin, bhuken ani pidden mortole mhunn tumi sarkem zannam zaiat.”