Izaias
8 Jehovan mhaka mhunnttlem: “Ek vhoddlo folleacho kuddko ghe ani tacher sadhe lekhnnen oxem boroi, ‘Maher-shalal-hash-baz.’* 2 Ani tunvem hem boroilam hachi govai mhunn visvaxi sakxeamnim mhunnche, iadnik Urian ani Jeberekiacho put Zekarian boroun puravo dilʼlo mhaka zai.”
3 Uprant hanvem provadin aslole mhoje baile lagim sombond dovorlo* ani ti gorbest zali. Tinnem eka putak zolm dilo. Tednam Jehovan mhaka mhunnttlem: “Taka Maher-shalal-hash-baz mhunn nanv dovor. 4 Karonn ho bhurgo ‘Pai!’ ani ‘Mai!’ mhunnonk xikchea poilinch, Damaskachi girestkai ani Samariecho lutticho mhal, Asiriechea raza fuddem ubarun vhortole.”
5 Jehovan mhaka oxem-i mhunnttlem:
6 “Hea lokamnim xantponnim vhanvta tem Shiloachem* udok nakarlam,
Ani te Rezin ani Remaliachea putak lagon khuxal asat.
7 Taka lagon polloi!
Jehova Nhoim-chem* bollixtt ani zaitem udok tanchea add haddttolo,
Hoi, Asiriecho raza aple sogle xokten tanchea add zhuzonk ietolo.
To ieun tancheo nhoim-o ani vhall bhortolo,
Ani tancheo dego bhoron votʼtoleo
8 Ani Judantlean voitoleo.
Buddttechea udka bhaxen vhanvon to gollea meren pavtolo.
O Imanuel!*
To aple pakhotte posraun tuzo akʼkho des dhamptolo.”
9 Lokamno, tankam hat lavun tori polloiat, tumcho churo zatolo!
Prithumechea poisulʼlea desantlea lokamno, aikat!
Zhuzachi toiari korat, punn tumcho churo zatolo!
Zhuzachi toiari korat, punn tumcho churo zatolo!
10 Tumkam zai ti manddnni kaddat, punn ti fiskotton voitoli!
Tumkam zai tem mhunnat, punn tem ghoddon ieunchench na,
Karonn Dev amchea sangata asa!*
11 Jehovacho xoktivont hat mhojer aslo ani lok voitat te vatter cholona zaunk tannem mhaka xittkailo ani mhunnttlem:
12 “He lok zaka manddnni mhunnttat, taka tumi manddnni mhunno nakat.
He lok zaka bhietat, taka tumi bhienakat.
Tumi tachi koslich bhirant dhorinakat.
13 Fouzancho Dev Jehova—to povitr mhunn tumi manun gheunk zai.
Tumi tachich bhirant dhorunk zai,
Ani tacheach mukhar tumi kampunk zai.”
14 To tumchea pasot ek povitr zago koso zatolo,
Punn Izraelachea donui ghoranneam pasot,
Adllonk ek fator koso zatolo
Ani addkhollonk ek khoddop koso zatolo,
Ani Jeruzalemant ravtolea lokam pasot,
Ek fas ani ek zall koso zatolo.
15 Zaite lok addkhollttole, poddttole ani tankam mar lagtolo,
Te fasak sampoddttole ani tankam dhortole.
16 Sondex boroilʼlo asa to kovllo guttlaun dovor,
Ani mhojea xisam modem kaideak* xikʼko marun dovor!
17 Hanv Jehovachi vatt* polloit ravtolom, zo Jakobachea ghorannea thaun aplem tondd lipoita, ani hanv tacher mhozo bhorvonso dovortolom.
18 Polloi! Hanv ani he bhurge je Jehovan mhaka dileat, te Izraelant khunna ani vizmitam zaun asat. Heo khunna ani him vizmitam fouzancho Dev Jehova koddlean asat, zo Sion Dongrar ravta.
19 Ani tannim tumkam oxem sanglem zalear: “Meloleam lagim uloitat vo fuddar parkhitat tea ghaddiam lagim vochat, hoi, je chinvchinvtat ani boddboddttat tanchea lagim vicharunk vochat,” tor tumi oxem kortole kai? Jivim asat tanchea pasot tannim meloleam lagim ulovop sarkem asa kai? Eka munxan Deva lagim modot magchi nhoi kai? 20 Tachea bodlek, Devachea kaideant ani tannem boroilʼlea vostumnim tannim sodh korunk zai!
Je tachea adarit uloinant, tanchea lagim kosloch uzvadd* na. 21 Dor eklo dukhi zaun ani bhuken desant hanga-thoim bhonvtolo. Ani to bhukelʼlo ani ragar asa dekhun aplea razak ani voir polloun aplea Devak xirap ditolo. 22 Uprant to prithumer polloitolo tednam, taka fokot sonkoxtt ani kallokh distolo, niraxiponn ani dukh distolem, domott distolem ani kosloch uzvadd dischona.