Jeremias
8 Jehova mhunntta, “Tea vellar, Judachea razanchim ani tachea kunvranchim, iadnikanchim ani provadeanchim ani Jeruzalemant ravtoleanchim haddam tanchea fonddam thaun kaddttole. 2 Tankam suria, chondrim ani mollba voilea soglea fouje mukhar posraitole, zancho te mog kortale, seva kortale, zanchea fattlean te voitale, zankam te sodhtale ani zanchea mukhar te man bagoitale. Tea haddank lok ektthaim korchenant vo purchenant. Tim zomnir sarem koxim poddlolim astolim.”
3 Fouzancho Dev Jehova mhunntta: “Hea noxttea ghoranneantlea urlolea lokank hanvem jea-jea zagear posrailole, tea soglea zageancher te jivitachea bodlek moronn vinchun kaddttole.
4 “Ani tum tankam sang, ‘Jehova oxem mhunntta:
“Te poddon porot utthchenant kai?
Eklo portun ailear dusro-i portun ieunchona kai?
5 Jeruzalemache he lok, mhojea sangata ovisvaxiponnan kiteak vagot asat?
Te fottingponnacher visvas dovrit ravtat,
Te porot ieunk nakartat.
6 Hanvem tancher dhean dilem, te uloitat tem aikot ravlo, punn te jea toren uloitale tem sarkem naslem.
Aplea noxtteponnak lagon ekleanui poschatap korunk na vo oxem vicharunk na, ‘Hanvem hem kitem kelem?’
Ghoddo zoso nettan zhuzant dhanvta, toso dor eklo porot-porot teach rosteacher voita, zoim soglim voitat.
7 Mollbar uddttolea bokeak pasun, tannem khoinchea vellar uddon dusrea zagear vochonk zai tem* khobor asta.
Parvo ani dusrim suknnim pasun, aplo porot ieuncho vell zannant.*
Punn hanv Jehova, mhojea lokancho neai kednam kortolom, to vell tankam khoborna.”’
8 ‘Tumi oxem koxem mhunnonk xoktat: “Ami zannvaieche, ani amchea lagim Jehovacho kaido* asa”?
Khorem mhunnttlear, xastreanchem khottem pen* fokot fott borounkuch uzar kelam.
9 Zannarank lojek ghatleat.
Te samke bhieleat, ani sampoddttole.
Polloi! Tannim Jehovachem utor nakarlam,
Tor tanche lagim zannvai koxi astoli?
10 Taka lagon, hanv tanchea bailank dusrea dadleank ditolom,
Ani tanchim xetam dusrea dhoniank ditolom.
Karonn lhana thaun vhodd, dor eklo fottingponnachi zodd ektthaim korta,
Iadnika thaun provadi meren, dor eklo nagoita.
11 “Xanti asa! Xanti asa!”
Oxem mhunnon te mhojea lokanchea dhuvechem moddlolem hadd voilea-voir zoddpacho proitn kortat,
Punn khorem mhunnttlear xanti nanch.
12 Tankam tanchea vitt haddttat toslea kamanchi loz bhogta kai?
Na, tankam matui loz bhogona!
Tankam loz mhunntta ti nanch!
Taka lagon, poddleat tanchea sangata te-ui poddttole.
Hanv tankam khast laitolom tednam te addkhollon poddttole,” oxem Jehova mhunntta.
13 Jehova mhunntta, ‘Hanv tankam ektthaim kortolom tednam, hanv tancho nas kortolom.
Drakxanchea valicher drakxam urchimnant, anjirachea zhaddacher anjiram urchimnant ani soglim panam sukon voitolim.
Ani hanvem tankam dilam tem, te hogddaitole.’”
14 “Ami hanga kiteak bosleat?
Cholat, ami ektthaim zaun bhonvtonnim ghott durgam aslolea xaramnim bhitor sorom-ia ani thoim morom-ia.
Karonn amcho Dev Jehova amkam kabar kortolo,
To amkam vikari udok pieunk dita,
Karonn ami Jehova add patok kelam.
15 Ami xantichi vatt polloit aslim, punn kainch borem zaunk na,
Ami borim zatolim mhunn vatt polloitalim, punn amcher akant aila!
16 Dana thaun ghodde hungtat to avaz aikonk ieta.
Tache ghodde killonch martat tea avazan,
Akʼkhi prithum halta.
Te bhitor ietat ani akʼkho des ani tantunt aslolem soglem khaun uddoitat,
Xar ani tantunt ravtolea sogleank gillun uddoitat.”
17 Jehova mhunntta: “Hanv tumchea modem sorop dhaddttam,
Osle vikari sorop, zancher tumchim montram-tontram cholchimnant,
Ani te tumkam chabtolech.”
18 Mhojem hem dukh borem zaunk xokona,
Mhojem kalliz dukhant asa.
19 Eka poisulʼlea desa thaun mhojea lokanchi dhuv,
Modoti pasot ulo marta to avaz aikonk ieta:
“Jehova Sionant na kai?
Vo ticho raza thoim na kai?”
“Te aplea kantoilʼlea murteamnim
Ani valor naslolea devamnim, kiteak mhunn mhaka rag haddttat?”
20 “Lunvnni sompli ani gim kabar zalo,
Punn amkam salvar korunk nant!”
21 Mhojea lokanchea dhuveche ghave polloun hanv samkoch tunttlam,
Hanv khub dukhi asam,
Bhirantin mhaka gherav ghatla.
22 Gileadant balsam* na kai?
Thoim konnuch dotor na kai?
Tor mhojea lokanchea dhuvechi bholaiki bori kiteak zaunk na?