Jeremias

7 Jehovacho ho sondex Jeremiasak mellʼllo: 2 “Tum Jehovachea ghorachea darvontteacher rav ani ho sondex kolloi, ‘Judachea soglea lokamno, tumi je Jehova mukhar bagonk hea darvontteantlean bhitor sortat, tumi sogle Jehovacho sondex aikat. 3 Izraelacho Dev, Fouzancho Dev Jehova oxem mhunntta: “Tumi tumcheo vatto ani tumchi vagnnuk bodlat ani hanv tumkam hea zagear ravonk ditolom. 4 Tumi fottkirea utrancher visvas dovrun oxem mhunnonakat, ‘Hem* Jehovachem mondir, Jehovachem mondir, Jehovachem mondir!’ 5 Tumi tumchi vagnnuk khorench bodolʼli zalear, ani sarke toren neai kelo zalear, 6 pordexiancher, onathancher* ani vidvancher tumi zulum korinant zalear, hea zagear tumi niropradi rogot varoinant zalear ani tumchem luksonn zaunchem nhoi mhunn dusream devam fattlean vochonant zalear, 7 hanv tumkam hea desant ravonk ditolom, zo hanvem tumchea purvozank sodankal* ravonk dila.”’”

8 “Punn tumi fottkirea utrancher visvas dovortat—tantuntlean tumkam kosloch faido zaunchona. 9 Tumi chorun, jivexim marun, pordvar korun, khotto soput gheun, Baal devak bolidanam* bhettoun ani tumi vollkhonant tea devam fattlean vochon, 10 oslim soglim vitt haddttat toslim kamam korun, mhojem nanv aslolea hea mhojea ghorant* tumi mhojea mukhar ubim ravonk xoktat kai? Ani ‘Ami salvar zatolim,’ oxem mhunnonk xoktat kai? 11 Mhojem nanv aslolem hem mhojem ghor tumchea nodrent choranchi dhol zalea kai? Tumi kitem-kitem kortat tem hanvem mhojea dolleamnim polloilam,” oxem Jehova mhunntta.

12 “‘Atam tumi, mhojea povitr zagear Shilont vochat, jem hanvem mhojea nanvam pasot sogleant poilim vinchun kaddlolem. Thoim vochon, mhojea lokanchea, mhunnche Izraelachea vaittponnak lagon hanvem kitem kelam tem polloiat. 13 Punn tumi him soglim kamam korit ravlim,’ oxem Jehova mhunntta. ‘Hanv tumkam porot-porot sangot ravlom, tori astana tumi mhojem aikonk na. Hanv ulo marit ravlom, punn tumi zobab diunk na. 14 Taka lagon, hanvem Shiloche je hal kelʼle tech hanv hea ghorache kortolom, zacher mhojem nanv asa ani zacher tumi visvas dovortat. Ho zago zo hanvem tumkam ani tumchea purvozank dilʼlo, tacho hanv tech hal kortolom. 15 Hanvem tumchea bhavank, mhunnche Efraimachea sonstik zoxe mhojea nodre mukhavoile pois kelʼle, toxech hanv tumkam-i mhojea nodre mukhavoile pois kortolom.’

16 “Punn tum, hea lokam pasot magnnem korinaka. Tanchea pasot tum roddonaka, mhojea lagim magnnem vo vinoti korinaka, karonn hanv tujem aikochom na. 17 He lok Judachea xaramnim ani Jeruzalemachea rosteancher kitem kortat tem tuka dixtti poddona? 18 Tanche put lakddam ektthaim kortat, bapui uzo pettoitat, ani tancheo bailo Sorginche Ranniek* bolidan mhunn bhakreo bhettounk pitt mollttat, ani te mhaka rag haddunk dusrea devank soreachi bhett bhettoitat. 19 Jehova mhunntta, ‘Punn oxem korun te mhaka dukhoitat* kai? Na, te apleakuch dukhoitat ani aploch opman korun ghetat.’ 20 Taka lagon, Akʼkhea Vixvacho Dhoni Jehova oxem mhunntta, ‘Polloi, hanv hea zagear mhozo rag ani mhozo krodh votoitolom. Munxancher toxench zonvarancher, ranantlea zhaddancher ani zomnintlean upzota tea sogleacher hanv to votoitolom. Mhojea krodhacho uzo pettot ravtolo ani to palvochona.’

21 “Izraelacho Dev, fouzancho Dev Jehova oxem mhunntta, ‘Tumchea dusrea bolidanam sangata, tumcheo hulpailʼleo bhetto bhettoiat ani tumi tachem mas khaiat. 22 Karonn jea disa hanvem tumchea purvozank Ejiptt desantlim bhair haddlim, tea disa hulpailʼleo bhetto vo bolidanam vixim hanv tanche lagim ulounk na vo hanvem tachea vixim koslich adnea diunk na. 23 Punn hanvem tankam hi adnea dilʼli: “Mhozo tallo aikat ani hanv tumcho Dev zatolom, ani tumi mhoje lok zatole. Hanv tumkam jea vatter cholchi adnea ditam, tech vatter tumi cholonk zai, oxem kelʼlean tumchench borem zatolem.”’ 24 Punn tannim aikonk na vo kan diunk na. Tachea bodlek, te apleach manddnneam* pormonnem cholʼle, hottʼtti* zaun tannim apleach noxttea kallzachem aikolem, ani bore zaunchea bodlek te anikui paxtt zale. 25 Jea disa tumche purvoz Ejiptt desa thaun bhair sorle, tednam thaun tem atam poriant tumi oxem korit aileat. Taka lagon, hanv mhojea soglea sevokank, mhojea provadeank tumchea lagim dhaddit ravlom. Tankam hanv dor disa ani porot-porot dhaddit ravlom. 26 Punn tannim mhojem aikonk na ani mhaka kan diunk na. Tachea bodlek, te hottʼtti* zale ani tanchea purvozam poros paxtt zale!

27 “Tum vochon heo sogleo vostu tankam sangtolo, punn te tujem aikochenant. Tum tankam ulo martolo, punn te tuka zap diunchenant. 28 Ani tum tankam mhunnttolo, ‘Hem tem raxttr, zannim aplo Dev Jehovacho tallo aikonk na ani tachi xist nakarli. Visvaxiponn tanchea modlem nanch zalam! Hem utor pasun tanchea tonddantlean bhair sorona.’

29 “Tuje lamb* kens tasun uddoi, ani voir porvotancher* ek dukhachem git* mhunn. Karonn hea pillgen Jehovacho rag choddoila dekhun tannem tika nakarlea ani to tika soddun ditolo. 30 Jehova mhunntta, ‘Judachea lokamnim mhojea nodren vaitt kamam keleant. Mhojem nanv aslolem ghor boxttaunk, tannim kanttallo haddtta tosleo murteo tantunt bosoileat. 31 Aplea putank ani dhuvank ujeant lasounk, tannim Hinomachea Putachea Falkeant,* Tofethache unch zage bandleat. Oxem korunk hanvem tankam adnea diunk nasli ani hem mhojea kallzant pasun kednanch ieunk naslem.’*

32 “Jehova mhunntta, ‘Taka lagon polloi! osle dis ietat jednam hea zageak porot kednanch Tofeth vo Hinomachea Putachem Falkem* mhunnchenant, punn Jivexim Marpachem Falkem mhunnttole. Ani purunk zago urona tea meren te Tofethant moddim purtole. 33 Ani him moddim, mollba voilea suknneam pasot ani prithume voilea zonvaram pasot jevonn zatolim, ani tankam dhanvddaunk konnuch aschona. 34 Hanv Judachea xaramnim ani Jeruzalemachea rosteancher zata to soglo khuxalkaiecho ani sontosacho avaz bond kortolom, toxench novro vhokle sangata khuxalkai monoita to avaz pasun hanv bond kortolom. Akʼkho des padd zaun voitolo.’”