Jeremias
6 Benjaminachea putamno, Jeruzalema thaun pois asro gheiat.
Tekoant xing vazoiat,
Beth-hakeremant khunna mhunn uzo pettoiat!
Karonn utʼtore thaun ek odruxtt ieta,
Ek vhoddlem odruxtt ieta.
2 Sionachi dhuv eke sobit ani nazuk baile bhaxen dista.
3 Gonvlli ani tanche hindd ietole.
Te tachea charui vatten aple tombu ube kortole,
Dor ek gonvlli aplea hinddak chorvak vhortolo.
4 “Jeruzalema lagim zhuzonk toiari korat!
Utthat, ami donparchea vellar tacher akromonn korum-ia!”
“Amcher hai, karonn dis sompot asa,
Sanjechi savlli vaddot voita.”
5 “Utthat, ami ratchea vellar tacher akromonn korum-ia,
Ani tachea vhoddlea gopurancho nas korum-ia.”
6 Karonn fouzancho Dev Jehova oxem mhunntta:
“Lakudd kator ani Jeruzalemacher akromonn korunk tachea durgam bhonvtonnim choddtti toiar kor.
Hem tem xar zachea koddlean hixob ghevop gorjecho,
Tantunt fokot zulum zatat.
7 Zoxi baim aplem udok tajem* dovorta,
Toxench tem aplem noxtteponn tajem dovorta.
Thoim sodanch maramarichi ani nisonttonachi bob aikonk ieta,
Hanv thoim sodanch duensam ani pidda polloitam.
8 Jeruzalema, xittkaunnecher dhean di, na zalear mhaka tuji vitt ietoli, ani hanv tuka fatt kortolom.
Hanv tuzo hea toren nas kortolom, ki tujea desant ekui munis urchona.”
9 Fouzancho Dev Jehova oxem mhunntta:
“Drakxanchea valicher urlolim soglim drakxam punzaitat toxe, te Izraelant urlolea sogleank punzaitole.
Drakxam punzaitolea bhaxen ek pavtt porot drakxanche valicher hat bhonvddai.”
10 “Hanv konnank sangom, ani konnank xittkaunni dium?
Mhojem konn aikotolo?
Polloi! Tanche kan bond asat,* taka lagon te matui dhean dinant.
Polloi! Te Jehovachea utracheo moskoreo kortat,
Tankam tim utram avoddnant.
11 Taka lagon, Jehovachea ragacho uzo mhojea bhitor pettla.
Ani hanv to mhojea bhitor anik damun dovrunk xokona.”
“Rostear aslolea bhurgeacher,
Ektthaim zalʼlea tornatteanchea zomeancher to votoi.
Tankam sogleank, eka dadleak tachea baile sangata vhortole,
Zanntteank, ani ekdom zanntte zalʼleank sangata koidi korun vhortole.
12 Tanchim ghoram dusreanchim zatolim,
Toxench, tanchim xetam ani bailo dusreancheo zatoleo.
Karonn desant ravtolea lokam add hanv mhozo hat ubartolom,” oxem Jehova mhunntta.
13 “Karonn lhana thaun vhodd, soglim fottingponn korun zoddttat.
Provadi tosoch iadnik dor eklo fosoita.
14 ‘Xanti asa! Xanti asa!’
Oxem mhunnon te mhojea lokanchem moddlolem hadd voilea-voir zoddcho proitn kortat,
Punn khorem mhunnttlear xanti nanch.
15 Tankam tanchea vitt haddttat toslea kamanchi loz bhogta kai?
Na, tankam matui loz bhogona!
Tankam loz mhunntta ti nanch!
Taka lagon, poddleat tanchea sangata te-ui poddttole.
Hanv tankam khast laitolom tednam te addkhollon poddttole,” oxem Jehova mhunntta.
16 Jehova oxem mhunntta:
“Nakeancher ube ravat ani polloiat.
Adlea kalla voilea rosteam vixim vicharat,
Khoinchi vatt bori tem vicharat ani tacher cholat,
Ani tumchea jivak visov diat.”
Punn te mhunnttat: “Ami te vatter cholchenant.”
17 “Hanvem rakhonndarank nemle zannim oxem mhunnttlem,
‘Xingachea avazacher dhean diat!’”
Punn tannim mhunnttlem: “Ami dhean diunchenant.”
18 “Taka lagon, raxttramno, aikat!
Lokamno, tanchea sangata kitem zaunchem asa,
Tem zannam zaiat.
19 Prithume voilea soglea lokamno, aikat!
Hanv hea soglea lokancher odruxtt haddttam,
Ho tancheach manddnneancho porinnam,
Karonn tannim mhojea utrancher matui dhean diunk na,
Ani tannim mhozo kaido nakarlo.”*
20 “Tumi je Sheba thaun mhojea pasot dhovo dhump haddttat,
Ani eka poisulʼlea desa thaun vasachi boddi haddttat, tachem mhaka kainch poddlolem na.
Tumcheo hulpailʼleo bhetto mhaka manvonant,
Ani tumchea bolidanam vorvim mhaka khuxalkai mellona.”
21 Taka lagon Jehova oxem mhunntta:
“Hanv hea lokam mukhar addkholleo ghalun dovortam,
Ani te tankam lagon addkhollon poddttole,
Bapui ani put sangata poddttole,
Xezari ani tacho sangati pasun poddttolo,
Ani te sogle kabar zaun voitole.”
22 Jehova oxem mhunntta:
“Polloi! Utʼtorechea eka desa thaun lok ietat,
Prithumechea sogleam-von poisulʼlea vattarantlean ek vhoddlem raxttr uttʼttholem.
23 Te aplea hatant dhonu ani bhalo* gheun ietole.
Te krur asat ani te konnanchich kakut korchenant.
Te doria bhaxen goroztole,
Ani ghoddeancher boson ietole.
Sionache dhuve, zhuzari zalʼlea porim te tujea add zhuz kortole.”
24 Ami hi khobor aikolea.
25 Xetant vochom nakat,
Ani rosteancher bhonvom nakat,
Karonn dusmanachea hatant tolvar asa,
Soglea vattamnim bhirant posorlea.
26 Mhojea lokanchea dhuve,
Sak ghal ani gobrant loll.
Konnui aplea ekleach puta pasot dukh korta tea bhaxen, vhoddlean bob marun dukh kor,
Karonn nas korpi okosmat amcher akromonn kortolo.
27 “Hanvem tuka* mhojea lokam modem dhatu topaspi munxa sarko kela,
Zo bariksannen topasta,
Tunvem tanchea vagnnukecher dhean diunk zai ani tanchi choukoxi korunk zai.
28 Te sogle samke hottʼtti* asat, tanchea osle lok anik khoinch mellchenant,
Te fott marun dusreanchem nanv piddʼddear korit bhonvtat.
Te tambe ani lokhnna sarke asat,
Te sogle broxtt.
29 Eklo tankam xudʼdh korunk khub vavr korta,
Itlo ki bhato* pasun zollon voita.
Punn tankam xudʼdh korpachea tachea vavracho kosloch faido zaunk na,
Karonn ujeantlean fokot xinxem bhair sorta.
30 Lok tankam ‘nakarloli chandi’ oxe mhunnttole,
Karonn Jehovan tankam nakarleant.”