Tumi Jehova Vixim Chodd Kiteak Xinkot Ravunk Zai?

1. Bible xinkot ravlear tumkam koxi modot zatoli?

Dubhaviret, Bible-achi thoddi mullavi xinkounn gheun, Jehova passot tumcho mog vaddla astolo. Ho mog odik ghott korunk tumi vavrunk zai. (1 Pedru 2:2) Tumi sasnachem jivit melloun ghetolim zalear, Bible-acho obheas korun, Jehova thaim tumchi ixttagot anink ghott korit ravunk gorjechem zaun asa.​—Juanv 17:3; Jude 21 vachat.

Devachem ginean ghei-it ravlear, tumcho bhavart ghott zatolo. Ho bhavart, Devak manvota tem korunk tumkam modot kortolo. (Hebrevank 11:1, 6) Hea bhavarta vorvim, tumchea adlea patkank lagun poshchatap korun, tumchea jivitant goroz thoim bodol korunk tumkam modot zatoli.​—Itihas 3:19 vachat.

2. Tumi jem xinkleam tachi herank koxi modot zatoli?

Tumi jem xinkleam tem herank sangunk sodtolim. Amkam soglleank bori khobor sangunk khuxi bhogta. Bible-acho obheas korit ravlʼlean, Jehovacher aslolo tumcho bhavart dakhounk ani bori khobor herank sangche passot, Bible uzar korunk tumi xinktolim.​—Matev 28:19, 20 vachat.

Survatek, choddso lok aplea ixttank vo soireank hi bori khobor sangtat. Oxem kortana ami chotrai dovorunk zai. Heranchea dhormancheo chuki dakhounche bodlek, Devachea bhasavnneam vixim tankam sanglear chodd borem. Tumchea utram poros tumche bore vagnnukecho, lokancher chodd porinnam zatolo.​—2 Timotak 2:24, 25 vachat.

3. Deva sangata tumi koslo sombondh zhoddum ieta?

Devachea Utracho obheas kelear, Deva thaim tumcho sombondh ghott korunk tumkam modot zatoli. Ami Tachea ghorabeacho bhag zatolim.​—2 Korintkarank 6:18 vachat.

4. Deva lagim sombondh ghott korit ravunk tumi kitem korunk zata?

Devachea Utracho obheas korit ravun, tantuntleo adnea tumchea jivitant lagu korunk, xinkunk zai. (Hebrevank 5:13, 14) Bible Khorench Kitem Xikoita? hem pustok uzar korun Bible xinkounk, tumchean eka Jehovachea Sakxeak sangum ieta. Jitlim tumi Devachem Utor xinktat, tumchea jivitant tumi ies melloitolim.​—Stotram 1:1-3; 73:27, 28 vachat.

Khuxalkaiecho Dev Jehova thaun, bori khobor ieta. Tachi bhokti kortat tancho sangat dovrun, Jehova thaim tumcho sombondh anink chodd ghott zatolo. (Hebrevank 10:24, 25) Jehovak manvota tem korunk proitn korit ravlear, tumchean ek borem jivit, mhunnge sasnachem jivit melloun gheunk zata. Khoreanich, Deva kodden ek lagincho sombondh zhoddunk khub gorjechem.​—1 Timotak 1:11; 6:19 vachat.