Karmel Dongrar Porikxa

Dha kullanchea Izrael rajeacher zaitea vaitt razamnim raj kelem. Tantuntlo sogleant vaitt raza Ahab aslo. To Jezebel-a lagim kazar zata, ji Baal devachi bhokti kortali ani khub vaitt asli. Ahab ani Jezebel, Jehovachea zaitea provadeank marun uddoitalim ani tankam lagon Izraelantlo choddso lok Baalachi bhokti korunk lagtat. Hem polloun Jehova kitem korta? To Elija provadeak Ahaba sorxim ek sondex diun dhaddtta.

Elijan Raza Ahabak sanglem ki tachea vaittponnak lagon Izraelant paus poddchona. Atam paus bond zalear tin vorsam maiz zalʼlim. Xetant pik zaunk na ani lokank jevonn-khann naslem. Uprant Jehova, Elijak porot Ahaba lagim dhaddtta. Tednam Elijak polloitanch raza mhunntta: ‘Hem soglem tuka lagon zalam!’ Elija tednam zobab dita: ‘Hem mhaka lagon nhoi, punn tum Baalachi bhokti korta dekhun zalam. Soglea lokank ani Baalachea provadeank Karmel dongracher apoi, ami ek porikxa korum-ia.’

Soglo lok dongracher ektthaim zalo. Elija mhunntta: ‘Tumi konnachi bhokti kortolim tem vinchun kaddat. Jehova khoro Dev zalear tachi bhokti korat, punn Baal khoro dev zalear tachi bhokti korat. Tor khoro Dev konn tachi ami porikxa korum-ia. Baalache 450 provadeamnim ek bolidan toiar korun aplea devak ulo marcho. Ani hanv ek bolidan toiar kortolom ani Jehovak ulo martolom. Zo bolidanacher uzo dhaddttolo toch khoro Dev mhunn kollon ietolem.’ Hem aikon lok oxem korunk toiar zatat.

Baalache provadi ek bolidan toiar kortat ani akʼkho dis aplea devak ulo martat: ‘Baal deva, amchem aik!’ Punn Baal kainch zobab dina. Tednam, Elija tanchim fokannam korta ani mhunntta: ‘Zata titlea vhoddlean ulo marat. Taka ghoddie nhid poddlea astoli. Taka uttounchi goroz asa.’ Sanz zait aili ani Baalache provadi taka ulo marit asle, punn torui kainch zobab ieunk na.

Elija aplem bolidan vedicher ghalta ani tachea voir udok rokhoita. Uprant to magnnem korta: ‘Jehova, tunch khoro Dev mhunn soglea lokank please dakhoun di.’ Tednam rokddoch, sorgar thaun uzo dhaddun, Jehova tachem bolidan manun gheta. Hem polloun lok vhoddlean bob martat: ‘Jehovach khoro Dev!’ Tednam Elija mhunntta: ‘Soglea Baal provadeank dhorat. Ekleak pasun vochonk dinakat!’ Tea disa, Baalachea soglea 450 provadeank jivexim marle.

Jednam doriacher ek lhan kup dixtti poddtta, Elija Ahabak sangta: ‘Atam vadoll ieupachem asa. Tujem roth gheun, ghora voch.’ Mollob kallea kupamnim bhorta, varem marunk lagta, ani khub paus poddonk lagta. Xekim, dukholl kabar zata. Ahab aplem roth gheun zata title begin vochonk lagta. Jehovachea adaran, Elija tachea poros vegan dhanvta. Punn Elijacheo sogleo oddchonneo kabar zaleo kai? Ami fuddem polloum-ia.