Jehova Elijak Ghottai Dita

Baalachea provadeanchem kitem zalem tem aikon, Jezebel khub ragar zata. Ti Elijak oso sondex dhaddtta: ‘Baalachea provadeank tunvem jivexim marleat teach toren tuka-i faleam jivexim martole.’ Hem aikon Elija khub bhieta ani oronnʼnneant pollon voita ani magnneant mhunntta: ‘Jehova, mhojean anik sosunk zaunchem na, hanv moronk sodhtam.’ Elija khub thoklolo aslo dekhun eka zhadda ponda to nhidta.

Ek devdut taka utthoita ani mogan mhunntta: ‘Utth ani unddo kha.’ Elija utthon polloit zalear, taka fatracher gorom kelʼlo ek unddo ani udkachem jug dista. To khata, pieta ani porot nhidonk voita. To devdut taka porot utthoita ani taka sangta: ‘Unddo kha. Karonn lamb vatt cholonk tuka boll zai poddttolem.’ Tor Elija anik thoddem khata. Uprant to 40 dis ani 40 rat cholon Horeb dongra lagim pavta. Thoim Elija eke dholint vochon nhidta. Punn Jehova, tachea lagim uloita ani taka mhunntta: ‘Tum hanga kitem korta, Elija?’ Elija zap dita: ‘Izraelitkaramnim tuka dilʼli promise moddlea. Tannim tuji vedi moddun uddoilea ani tujea provadeancho jiv kaddla. Ani atam te mhozo-i jiv kaddunk sodhtat.’

Jehova taka sangta: ‘Voch ani dongrar ubo rav.’ Poilem, dholi mukar ek khor varem marta. Uprant, ek bhuimkamp zata ani magir uzo ieta. Xekim, Elijak ek xitoll avaz aikonk ieta. Tednam, to aplea kopddean aplem tondd dhampta ani dholi bhair vochon ubo ravta. Tum kiteak dhanvlo kai mhunn Jehovan taka vicharlem. Tednam Elija mhunntta: ‘Tuji bhokti korpi hanv ekloch urlam.’ Punn Jehova taka sangta: ‘Tum ekttoch na. Izraelant azunui 7,000 lok asat je mhoje bhokti kortat. Voch ani tujea bodlek, Elishak provadi mhunn vinchun kadd.’ Jehovan sanglolem toxem, Elija rokddoch korta. Jehovachem aikolear to tuka-i modot kortolo mhunn tuka dista? Hoi, to kortoloch. Dukholl poddlo tednam kitem zalem, tea vixim ami fuddem zannam zatolim.